ნიკოლოზ ბასილაშვილი და გიორგი ცივაძე სტარტზევე დამარცხდნენ

9 თებერვალს, იტალიურ ბერგამოში, ჩოგბურთელ ვაჟთა ჩელენჯერტურნირის (საპრიზო ფონდი 42.500 ევრო) პირველ წრეში მესამე ნომრად განთესილმა ნიკოლოზ ბასილაშვილმა ბელორუს ეგორ გერასიმოვთან წააგო - 5:7, 3:6 და შეჯიბრებას გამოეთიშა.

საქართველოს ჩოგბურთელ ვაჟთა ნაკრების წევრი გიორგი ცივაძე ბაქოში 10.000-იან საერთაშორისო ტურნირში ჩაება, მაგრამ პირველივე ბარიერი მისთვის დაუძლეველი აღმოჩნდა.

წყვილებში უკრაინელ დმიტრი ბადანოვთან ერთად სტარტზე ვიქტორ ბალუდასა და ივან კალინინთან დამარცხდა - 6:7, 3:6, ხოლო ერთეულებში რუს ევგენი კარლოვსკისთან პირველი სეტი 1:6 დათმო; მეორეს 0:2-ს აგებდა, ტრავმა რომ მიიღო და თამაშის გაგრძელება ვერ შეძლო.

ქალთა ნაკრების წევრები ეკატერინე გორგოძე და სოფიო ქვაცაბაია ეილათიდან (ისრაელი), სადაც ფედერაციის თასზე პირველ ევროაფრიკულ ზონაში იასპარეზეს, ანტალიას ეწვივნენ და დღეიდან ქალთა 10.000-იან საერთაშორისო ტურნირში მოსინჯავენ ძალებს.

ერთეულებში მეორე ნომრად განთესილი გორგოძე პირველ წრეში ნატაშა პილუდუს (იტალია) შეხვდება. წარმატების შემთხვევაში მასპინძელ ზეინეპ შაკირესის მძლეველ (6:1, 6:1) პეტია არშინკოვასთან (ბულგარეთი) გაარკვევს ურთიერთობას.

ასპარეზობის მეოთხე ნომერ ქვაცაბაიას იაპონელი სეირა შიმიზუ გაუწევს მეტოქეობას. ამ წყვილში გამარჯვებულს მერვედფინალში ინდოელი კურა შროფი ელოდება, რომელმაც გუშინ ელის დავენდერი (აშშ) ჩამოიშორა გზიდან - 6:3, 6:2.

წყვილებში გორგოძე და ქვაცაბაია ტურნირის რეიტინგფავორიტები არიან და შეჯიბრებაში მეოთხედფინალიდან ჩაებმებიან.

(იბეჭდება მცირე ცვლილებით)
ყოველდღიური სპორტული გაზეთი "ლელო"