ქართველი ჩოგბურთელები: ბასილაშვილმა რუსეთის ამომავალ ვარსკვლავს მოუგო

20 წლის ჩოგბურთელი კარენ ხაჩანოვი რუსეთის ამომავალ ვარსკვლავად მიაჩნიათ, საერთაშორისო კლასიფიკაციაში მას მე-100 ადგილი უკავია. ქართველი ნიკოლოზ ბასილაშვილი ჩრდილოელ მეზობელს რეიტინგში ოთხი საფეხურით ჩამორჩება.

გუშინ, 6 ივლისს, ისინი გერმანული ბრაუნშვაიგის ვაჟთა საერთაშორისო ტურნირის (საპრიზო ფონდი 106.500 ევრო) მერვედფინალში დაუპირისპირდნენ ერთმანეთს. ჩვენებურმა მე-8 განთესვის მქონე მეტოქე სამ სეტში დაამარცხა - 6:2, 4:6, 6:4 და მეოთხედფინალში გავიდა, თან სარეიტინგო 25 ქულა გამოიმუშავა.

რიოს ლიცენზიანტ ქართველს მესამე მეტოქედ ასპარეზობის ბრაზილიელი რეიტინგფავორიტი, კლასიფიკაციაში 62-ე საფეხურზე მყოფი 28 წლის ტომას ბელუჩი ეყოლება. ამ უკანასკნელმა მეორე წრეში ანტე პავიჩს (ხორვატია) მოუგო - 6:4, 6:3.

ბუდაპეშტში ჩოგბურთელ ქალთა 100.000-იან ტურნირში ეკატერინე გორგოძემ ზედიზედ მეორე გამარჯვება იზეიმა. მასპინძელ აგნეს ბუკტას დამარცხების შემდეგ მის გზას გაუყენა მე-7 ნომრად განთესილი ბარბარა ჰაასი (ავსტრია).

ავსტრიელმა ჩვენებურს მხოლოდ პირველ სეტში გაუწია წინააღმდეგობა, თუმცა მაინც დანებდა - 5:7, მეორეში კი გორგოძე კორტის ბატონ-პატრონი იყო - 6:1.

მეოთხედფინალში ქართველი ბულგარელ ელიცა კოსტოვას გაუწევს მეტოქეობას. ამ უკანასკნელმა გუშინ გზიდან თანამემამულე სესილ კარანტაჩევა ჩამოიშორა - 6:4, 6:2, არადა, კარატანჩევამ სტარტზე ასპარეზობის ჩინელ რეიტინგფავორიტ საისაი ჟანს აჯობა.

წყვილებში ეკატერინე გორგოძემ და სოფიო ქვაცაბაიამ აგნეს ბუკტას (უნგრეთი) და ვივიენ იუჰაშოვას (სლოვაკეთი) მოუგეს - 7:5, 7:5. ნახევარფინალში ქართველთა მეტოქე იქნება მე-2 ნომრად განთესილი ჩეხების (ლენა კუნჩიკოვა, კაროლინა სტუჩლა) დუეტი, რომელმაც ოლგა იანჩუკისა (უკრაინა) და ანასტასია პრიბილოვას (რუსეთი) ტანდემი დაჯაბნა - 6:3, 6:0.

მესამე განთესვის მქონე სოფიო შაფათავამ იტალიის ქალაქ ტურინის ქალთა 25.000-იანი ტურნირის მერვედფინალშიც მასპინძელს აჯობა: ამჯერად თანამემამულე ფედერიკა არჩიდიაკონოს მძლეველი ნასტასია ბურნეტი ჩამოიშორა გზიდან - 6:3, 6:3.

მეოთხედფინალში ჩვენებური მაკედონიელ ლინა ჯორჩესკას შეხვდება. ლინამ მეორე წრეში პოლონური ბარიერი (მაგდანელა ფრეჩი) გადალახა - 6:3, 6:1.

წყვილებში იტალიელ ალის მატეუჩისთან შეამხანაგებული შაფათავა ასპარეზობის რეიტინგფავორიტია. ქართულ-იტალიურმა დუეტმა ჯულია გატო-მონტიკონე-ანასტასია გრიმალსკას (ორივე - იტალია) ტანდემს მოუგო - 6:4, 5:7, 10:7.

ნახევარფინალში სოფიოსა და ჯულიას არგენტინელები - ხულიეტა ლარა ესტაბლე და დანიელა ფარფანი გაუწევენ მეტოქეობას. მეორე ნახევარფინალში ოლგა პარესი (ესპანეთი), კამილა როსატელო (იტალია) და ლინა ჯორჩესკა (მაკედონია), დალილა იაკუპოვიჩი (სლოვენია) ითამაშებენ.

18 წლის თბილისელმა მარიამ ბოლქვაძემ (რეიტინგით 486-ე) უიმბლდონის გოგონათა ტურნირის ძირითად ბადეში ორი გამარჯვების შემდეგ მესამე შეხვედრა 17 წლის ამერიკელ სოფიო კენინთან (328-ე) წააგო - 6:4, 3:6, 2:6 და შეჯიბრებას გამოეთიშა.

(იბეჭდება მცირე ცვლილებით)
ყოველდღიური სპორტული გაზეთი "ლელო"