11 ოქტომბერს, ქართველი ჩოგბურთელი ეკატერინე გორგოძე იტალიის ქალაქ სანტა მარგარიტა დი პულას ქალთა 25.000-იან ტურნირში ჩაება და წყვილებში გერმანელ ლიზა პონომარისთან ერთად ასპარეზობას ჩამოშორდა. ქართულ-გერმანულმა დუეტმა სტარტზე შეჯიბრების რეიტინგფავორიტებს - ლინა ჯორჯესკას (მაკედონია) და ანასტასია კომარდინას (რუსეთი) პირველი ხელი დამაჯერებლად მოუგო - 6:1, შემდეგ სეტებში კი ინიციატივა დათმო და 5:7, 3:10 დამარცხდა.
ერთეულებში გორგოძე მე-8 ნომრად განთესილ მასპინძელს - ჯესიკა პერის შეხვდება. ამ წყვილში გამარჯვებულს მერვედფინალში ტერეზა მრდეზა (ხორვატია) ელოდება, რომელმაც გუშინ ალბერტა ბრიანტის (იტალია) აჯობა - 6:2, 6:3.
* * *
აქვე შეგახსენებთ, რომ ეგვიპტური შარმ ელ შეიხის ქალთა 10.000-იან ტურნირზე მარიამ ბოლქვაძე ერთეულებში შვედ ჟაკლინ კაბაი ავადის გაუწევს მეტოქეობას, წყვილებში უკრაინელ ალონა ფომინასთან ერთად პაექრობებში მეოთხედფინალიდან ჩაებმება.(იბეჭდება მცირე ცვლილებით)
ყოველდღიური სპორტული გაზეთი "ლელო"
