ქართველი ჩოგბურთელები: ბასილაშვილი ძირითად ბადეში ვერ მოხვდა

ქართველი ჩოგბურთელი ნიკოლოზ ბასილაშვილი (რეიტინგით 107-ე) შაბათს პარიზის მასტერსის (საპრიზო ფონდი 3.748.925 ევრო) საკვალიფიკაციო რაუნდში ჩაება.

სტარტზე ესპანელ ინიგო სერვანტესს (81-ე) დაუპირისპირდა. ეს ჩოგბურთელები პირველად 2014 წლის 30 ივლისს დადგნენ ერთმანეთის პირისპირ. მაშინ იტალიის ტურნირის მეთექვსმეტედფინალში ჩვენებურმა სამ სეტში აჯობა მეტოქეს - 7:6, 5:7, 7:5. ბასილაშვილს პირენეელთან წარმატების მისაღწევად ამჯერადაც სამი სეტი დასჭირდა: პირველი ხელი ქართველმა ჩოგბურთელმა მშრალი ანგარიშით (6:0) მოიგო, მეორე 4:6 დათმო, მესამე სეტში 6:4 გაიმარჯვა და კვალიფიკაციის ფინალში გავიდა, სადაც რეიტინგში 64-ე საფეხურზე მყოფ რობინ ჰაასეს (ჰოლანდია) სათანადო წინააღმდეგობა ვერ გაუწია - 5:7, 2:6 დამარცხდა და შეჯიბრებას გამოეთიშა.

არადა, პირველ ხელს თავიდან ბასილაშვილი 3:0-ს იგებდა.

ანტალიაში,  ჩოგბურთელ ქალთა საერთაშორისო ტურნირში (საპრიზო ფონდი 10.000 დოლარი) მონაწილეობდა სოფიო ქვაცაბაია.

ასპარეზობის რეიტინგფავორიტმა ქართველმა ზედიზედ დაამარცხა ანდრინა პეერი (შვეიცარია, 6:3, 6:3), დენიზე-ანტონელა სტოიცა (რუმინეთი, 6:2, 6:3) და მეოთხედფინალში გავიდა, სადაც პირველი ხელი რუს ულიანა აიზატულინას 7:6 მოუგო, მეორეში, როცა ანგარიში გახდა 2:2, ქვაცაბაიამ ტრავმა მიიღო და შეხვედრის გაგრძელება ვერ შეძლო.

სამწუხაროდ, ვერც წყვილებში ითამაშა, არადა, ბულგარელ დია ევტიმოვასთან ერთად ნახევარფინალს უწია. ქართულ-ბულგარული დუეტის მეტოქეები - ტაისია და იანა მორდერგერები (გერმანია) ფინალში უბრძოლველად გავიდნენ, მერე გადამწყვეტი პაექრობა მოიგეს და მთავარი პრიზი მოიპოვეს.

ქვაცაბაია ანტალიაში რჩება და ახალი 10.000-იანი ტურნირის განაცხადში მისი გვარი მესამე ნომრადაა შეტანილი.

ჩინურ ჩანჟოუში (საპრიზო ფონდი 25.000 დოლარი) ითამაშებს სოფიო შაფათავა, რომელიც განთესვით მეორეა და სტარტზე ნორვეგიელ მელანი სტოკს შეხვდება.

წყვილებში შაფათავა და ანგელინა გაბუევა (რუსეთი) მასპინძლებთან - ფენ იინ ქსანსა და იინ ჟანთან გაარკვევენ ურთიერთობას.

მარიამ ბოლქვაძე ინგლისში იმყოფება და შეფილდის 10.000-იან ტურნირში მოსინჯავს ძალებს, ხოლო გიორგი ცივაძე ეგვიპტეში ჩოგბურთელ ვაჟთა შარმ ელ შეიხის საერთაშორისო ტურნირში (საპრიზო ფონდი 10.000 დოლარი) ითამაშებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"