პატარა ქალაქის კვალობაზე ჭიათურელი მოკრივეები ჩვენი ქვეყნის სხვადასხვა რეგიონის შეჯიბრებებში საკმაოდ გამოირჩევიან. გამოდიან საქართველოს ასაკობრივ ნაკრებ გუნდებშიც. ქალაქის მოკრივეთა მთავარ მწვრთნელს გელა ცარციძეს ინტერვიუ ვარიანში, გიორგი კარელიძის სახელობის ტურნირზე ჩამოვართვით. - ოთხი ათეულ წელია, რაც ჭიათურის სპორტულ სკოლაში ფუნქციონირებს კრივის სექცია. ჩვენი რაიონის სპორტულ ცხოვრებაში თუ რომელიმე სახეობას შეუძლია წარმატებებით დაიკვეხნოს, ერთ-ერთი უპირველესი კრივია. ფიზკულტურის ინსტიტუტის დამთავრების შემდეგ 23 წელიწადია მწვრთნელად ვმუშაობ - აქტიური სპორტული კარიერა გავლიე. ხელი კი მწვრთნელობას მივყავი. - ამბობს თავის დროზე საქართველოს ჩემპიონი და სსრ კავშირის
- რამდენი მწვრთნელი მუშაობთ?
- ექვსი მწვრთნელი ასამდე ბავშვს ამეცადინებს. არიან როგორც ახალგაზრდა, ისე გამოცდილი სპეციალისტებიც. სხვათა შორის, პატარებს ავარჯიშებს ჭიათურის კრივის ყველაზე ტიტულოვანი წარმომადგნელი კონსტანტინე კუპატაძე, რომელიც დიდებში ევროპის ჩემპიონატების ორგზის პრიზიორია.
- სახელოვანთა მემკვიდრეებიდან ვის გამოყოფდით?
- გვყავს საქართველოს ჩემპიონები შალვა ღვალაძე (დიდებში), გიორგი ჯაფარიძე და სანდრო ჯაჯანიძე (ჭაბუკებსა და ახალგაზრდებში). პერსპექტიული მოკრივეები არიან ქვეყნის პრიზიორი ჩვენი შეგირდებიც. ჭიათურას წარმომადგენლები საქართველოს ყველა ასაკობრივ ნაკრებში ჰყავს.
- ინფრასტრუქტურაზე რას იტყვით?
- წელიწადნახევარია რაც ახალ დარბაზში ვაგრძელებთ მუშაობას. ყოველმხრივ უზრუნველყოფილ დარბაზს შარშან ფედერაციის მიერ გადმოცემული ახალი ოლიმპიური რინგიც დაემატა, რაც, ბუნებრივია, ენთუზიაზმს გვიორმაგებს. ნორმალურ სავარჯიშო პირობებში მოსწავლეთა ნაკადიც იზრდება.
სკოლის დირექტორის ბადრი ვაშაძის და რაიონის გამგებლის გოგი ჩიკვილაძის მხარდაჭერით არ გვაკლია სპორტული ინვენტარი და ფორმა, რამდენიმე წელია ჩვენი ქვეყნის არცერთი პირველობა არ გამოგვიტოვებია. ერთ პირველობს ჩვენი ქალაქიც მასპინძლობს. ესაა სსრკ ორგზის ჩემპიონის ჭიათურელი მოკრივის თემურ ჯაოშვილის ხსოვნის ტურნირი, რომელიც ათი წელიწადია ტარდება.
ყოველდღიური სპორტული გაზეთი "ლელო"
