როტერდამში ახალგაზრდა მოკრივეთა ევროპის პირველობაზე 15 აგვისტოს მეოთხედფინალური შეხვედრები გაიმართა. შეჯიბრებაში საქართველოს ექვსი წარმომადგენელი ჩაება. მათგან მხოლოდ ორმა გაიმარჯვა: წარმატებით იასპარეზა ფოთელმა დათო ნანავამ (49 კგ), რომელმაც აზერბაიჯანელი მუნასიბ მამამადოვი დაამარცხა და სულ მცირე, ბრინჯაოს მედალი გაინაღდა.
ნახევარფინალში იგი ბულგარელ ზდრავკო მიხაილოვს შეხვდება. ამ უკანასკნელმა, თავის მხრივ, უნგრელი პატრიკ ჰორვატი ჩამოიშორა გზიდან.
ნანავას მხარი აუბა 69 კილოში კონსტანტინე ხვისტანმა: გიდაიათ მუსაევისა (აზერბაიჯანი) და ჰუგო სილვას (პორტუგალია) გზას 15 აგვისტოს ბელორუსი ილის აძინაიეუ გაუყენა და ნახევარფინალში გავიდა, სადაც ტამერლან მაგომედოვს (რუსეთი)
64 კილოში პირველ ნომრად იყო განთესილი ჯემალ შალამბერიძე. იგი სტარტზე თავისუფალი იყო, მეორე წრეში ბერნარდ ბარშონი (უნგრეთი) დაამარცხა, მაგრამ 15 აგვისტოს მეოთხედფინალში ალიაქსანდრ ვაშილკასთან (ბელორუსი) წააგო და საბოლოოდ მე-5 ადგილზე გავიდა.
75 კილოში ირაკლი ქათამაძე კრისტიან ასომო მბილს (საფრანგეთი) ვერ გასცდა, გიორგი ურჯუმელაშვილი ალბონ პერვიზაჯს (გერმანია) დანებდა, დემურ მაჭარაშვილი კი ვიტალი ჰორინთან (ბელორუსი) შეხვედრისას ტრავმის გამო პირველსავე რაუნდში მოხსნეს შეჯიბრებიდან მწვრთნელებმა.
15 აგვისტოს ჰოლანდიაში საქართველოს კრივის ფედერაციის გენერალურ მდივან ვლადიმერ ახალკაცს შევეხმიანეთ.
"სასიამოვნოა, რომ ორმა ქართველმა მოკრივემ ნახევარფინალში გააღწია და სულ მცირე, ბრინჯაოს მედლები გაინაღდეს, თუმცა მათ მეტის მიღწევა შეუძლიათ, თუ არბიტრები გზას არ გადაუღობავენ, როგორც ეს სომეხმა მსაჯმა გაუკეთა შალამბერიძეს, რომელიც, ასევე, მედლის კანდიდატი იყო.
რაც შეეხება მძიმეწონოსან მაჭარაშვილს, მან პირველსავე რაუნდში ბეჭი ამოიგდო და ბრძოლის გაგრძელება ვერ შეძლო. იმედია, ჩვენი ნახევარფინალისტები დღესაც გაგვახარებენ".
ყოველდღიური სპორტული გაზეთი "ლელო"
