მეოთხედფინალური წყვილებიდან ორი დუელი გამორჩეული იყო: შოტლანდიური დერბი სტივენ მაგუაირსა და მის სეხნია ჰენდრის შორის; აგრეთვე მატჩი რონი ო’სალივანსა და ნილ რობერტსონს შორის, რომელიც ბევრმა წინასწარ ფინალად მონათლა. მართლაც, შანსი იმისა, რომ ჩემპიონი ამ წყვილში გაირკვევა, მართლაც მაღალია და ის 25 პროცენტზე მეტს უდრის.მაგრამ მანამდე ჰენდრის ფიასკოსა და მის მეტად ნაღვლიან გადაწყვეტილებაზე უნდა ვთქვათ. შოტლანდიელმა პირველ ორ რაუნდში გაანადგურა თავისი მოწინააღმდეგეები, მეოთხედფინალში კი საპირისპირო სურათი ვიხილეთ.
მაგუაირი, რომელიც ჰენდრიზე 12 წლით უმცროსია, აღიარებს, რომ ჰენდრი მისთვის ყოველთვის კერპი იყო
მაგუაირმა უკეთ დაიწყო შეხვედრა, მაგრამ მის მეტოქეს 0:2-ზე მატჩში შესვლის კარგი შანსი გაუჩნდა - სამწუხაროდ, ჰენდრი ბოლოს ვარდისფერ ბურთზე შეცდა.
შესაძლოა, ეს ფრეიმი გახდა გადამწყვეტი, რადგან ჰენდრის ასეთი შანსი დიდი ხანი აღარ მიეცა. მაგუაირი მშვიდად ატარებდა სერიებს, მისი მეტოქე კი ყოველ მეხუთე ბურთზე შეცდომას უშვებდა. მსოფლიოს შვიდგზის ჩემპიონმა მხოლოდ 0:6-ზე მოიგო პირველი ფრეიმი, მაგრამ მისი სარკასტული ღიმილით ჩანდა, რომ სტივენს არანაირი შანსი არ გააჩნდა. მისმა მოწინააღმდეგემ შესანიშნავი მატჩი ჩაატარა და თითქმის წინააღმდეგობის გარეშე მოიგო ორ სესიაში - 13:2.
ასეთი განადგურების მიუხედავად, ჰენდრი მხოლოდ შექებას იმსახურებს იმისთვის, რომ 43 წლის ასაკში პირველ ორ შეხვედრაში შესანიშნავი სნუკერი აჩვენა და კარიერაში მე-11 მაქსიმალური ბრეიკი გააკეთა. ბევრი ისე აღფრთოვანდა ჰენდრის თამაშით, რომ დაიწყეს მის მერვედ გაჩემპიონების შესახებ ლაპარაკი, მაგრამ ეს არ მოხდა და არც არასოდეს მოხდება.
"მე ოფიციალურად ვასრულებ ჩემს პროფესიულ კარიერას. ეს ჯერ კიდევ სამი თვის წინ გადავწყვიტე, მაგრამ ამის შესახებ თითქმის არავისთვის მითქვამს. დღეს ბრძოლისთვის მზად არ ვიყავი, თუმცა მაინც მოხარული ვარ იმის გამო, რომ ორი ფრეიმი მოვიგე და კარიერა 0:13-ით არ დავასრულე.
რატომ მივიღე ასეთი გადაწყვეტილება? ჯერ ერთი, ტურნირების განრიგი არ მაწყობს; გარდა ამისა, ვეღარ ვთამაშობ ძველ დონეზე და თან სიამოვნებას ვეღარ ვიღებ ვარჯიშებისგან. ასე რომ, ეს საკმაოდ მარტივად მისაღები გადაწყვეტილება იყო", - ახსნა ჰენდრიმ.
რა თქმა უნდა, სნუკერის სამყაროში ეს ამბავი შოკისმომგვრელი გახლდათ, რადგან წასვლის შესახებ გამოაცხადა ყველა დროის საუკეთესო სნუკერისტმა. ბოლო წლებში სტივენის შედეგები მართლაც ძალიან გაუარესდა. ის აღარ შედის 16 საუკეთესოს შორის, მაგრამ ამ კონკრეტულმა ტურნირმა გვიჩვენა, რომ ისევ შეუძლია უმაღლეს დონეზე თამაში. მით უმეტეს, რთულია მისი გადაწყვეტილების აღქმა.
1/4 ფინალი
ჰენდრი-მაგუაირი (8) 2:13
ჯონსი-კარტერი (13) 3:5*
ო’სალივანი (14)-რობერტსონი (6) 3:5*
დეი-სტივენსი (15) 5:11*
* - მატჩები გრძელდება
სტივენ ჰენდრი
დაიბადა 1969 წლის 13 იანვარს ედინბურგში (შოტლანდია)
მეტსახელები: "მაესტრო", "ოქროს ბიჭი"
პროფესიული კარიერის დასაწყისი: 1985
მაქსიმალური ბრეიკი: 11-ჯერ
ასიანი ბრეიკი: 775-ჯერ
ტიტულები: 74 (მათ შორის, შვიდჯერ მსოფლიოს ჩემპიონი და 29 სარეიტინგო ტურნირის გამარჯვებული)
ყოველდღიური სპორტული გაზეთი "ლელო"
