შარშან, ოქტომბერში, დედაქალაქის ხუთი საჯარო სკოლის ინიციატივით ჩამოყალიბდა სასპორტო კლუბი "მორკინალი" (პრეზიდენტი ოლიმპიური ჩემპიონი გიორგი ასანიძე, ვიცე-პრეზიდენტები - გია ბეგიაშვილი და დავით ხავთასი), რომლის მიზანია დედაქალაქის საჯარო და კერძო სკოლების მოსწავლე-მასწავლებელთა დაახლოება-დამეგობრება და მათი მასობრივ სპორტულ ღონისძიებებში ჩაბმა. კლუბის მიერ დღემდე ჩატარებულ შეჯიბრებებში (მინი-ფეხბურთი, ქართული ჭიდაობა, ფრენბურთი, კალათბურთი) უკვე თბილისის ათობით სკოლამ მიიღო მონაწილეობა.
ახლახან მაგიდის ჩოგბურთელთა პაექრობაში 8 საჯარო და 2-მა კერძო სკოლამ (ყოველ გუნდში 5-5 მონაწილე, მათ შორის - თითო ქალ-ვაჟი მასწავლებელი, 2 ბიჭი და 1 გოგონა) იასპარეზა.
8 მაისს აგრარული უნივერსიტეტის სპორტდარბაზმა ნახევარფინალურ შეხვედრებს უმასპინძლა. 115-ე სკოლის წარმომადგენლებმა დიმიტრი ყიფიანის სახელობის კერძო სკოლის ჩოგბურთელებს 4:1 მოუგეს.
ასეთივე ანგარიშით 207-ესკოლელებმა კერძო სკოლა "მარჯის" გუნდს აჯობეს. ფინალში 115-ე სკოლის ნაკრებმა დაძაბულ პაექრობაში 207-ე სკოლის წარმომადგენლები 3:2 დაამარცხა (მასწავლებლები: გია ბეგიაშვილი - გიორგი კალანდაძე 2:3, ნანა ოჩხიკიძე - მზევინარ თავდგირიძე 3:2. მოსწავლეები: ნიკა გობეჯიშვილი - მიხეილ კობალაძე 3:1, გიორგი ჯაოშვილი - გიორგი მეტრეველი 3:2, მარიამ ხმალაძე - ზინაიდა ორუჯოვა 1:3).
მესამე ადგილი ყიფიანის სახელობის სკოლამ დაიკავა.
წლის ბოლომდე "მორკინალი" კიდევ ორ სახეობაში ჩაატარებს შეჯიბრებებს. სექტემბრიდან კი ტურნირებში რეგიონების წარმომადგენლებსაც მიიწვევენ.
"მორკინალი" გეოგრაფიას ზრდის (იბეჭდება მცირე ცვლილებით)
ყოველდღიური სპორტული გაზეთი "ლელო"
