24 დეკემბერს სასტუმრო "თბილისი-მარიოტში" გაიმართა სეოკ-ის ყოველწლიური საანგარიშო ყრილობა, რომელიც დაჯილდოებებით დაიწყო. სეოკ-მა წლის საუკეთესო სპორტსმენად ძიუდოში პირად პირველობაში ევროპის ჩემპიონი და მსოფლიოს ვერცხლისმედალოსანი, გუნდურში ევროპისა და მსოფლიოს გამარჯვებული, საქართველოს ჩემპიონი ავთანდილ ჭრიკიშვილი დაასახელა.
"ოლიმპიურ იმედად" ასევე ძიუდოისტი, 17-წლამდელებში ევროპის ჩემპიონი, მსოფლიოს ვერცხლისა და ახალგაზრდული ოლიმპიური ფესტივალის ბრინჯაოსმედალოსანი მარიამ ჯანაშვილი და თავისუფალ ჭიდაობაში ევროპისა და მსოფლიოს მესამე პრიზიორი გენო პეტრიაშვილი მიიჩნიეს.
სამივე მათგანი ფულადი პრემიით დაჯილდოვდა, თუმცა დამატებით ისინი, როგორც ძიუდოისტი ვალერი ლიპარტელიანი და "თავისუფლად" მოჭიდავე გიორგი ედიშერაშვილი, სოკ-ის სტიპენდიებსაც
* * *
სეოკ-ის პროგრამების განხორციელების საქმეში შეტანილი წვლილისთვის ოლიმპიური მედლით დაჯილდოვდნენ "სოკარ ჯორჯია პეტროლიუმის" გენერალური დირექტორი მაირ მამედოვი, "ავერსის" დამფუძნებელი პაატა კურტანიძე და მოსკოვში მცხოვრები ქართველი ბიზნესმენი, ქართული ოლიმპიზმის სტაჟიანი მეცენატი პეტრე ცანავა. ამასთან, მამედოვს გადაეცა სოკ-ის მიერ დაწესებული პიერ დე კუბერტენის სახელობის ჯილდო.
ცანავას დამსახურებით, ოლიმპიურ დელეგაციას სოჭში სპორტული და ცივილიზებული ეკიპირებით ჰოლანდიური Tittalon შემოსავს - ეს ფორმები ცანავამ უსასყიდლოდ გადმოგვცა. ის სოჭში ჩვენი დელეგაციის ოლიმპიური ატაშე იქნება.
ყრილობაზე ახალი სამოსის წარდგინებაც გაიმართა, ხოლო ფირმისა და საკუთარი ნაწარმის შესახებ მისმა წარმომადგენელმა, ჰოლანდიელმა ჰერმან ვლირჰოისიმ ისაუბრა.
"ვამაყობთ, რომ ოლიმპიური გუნდი ჩვენი ნაწარმით შევმოსეთ. ესაა მსოფლიოში ერთ-ერთი საუკეთესო კომპანია ხარისხით და მაღალტექნოლოგიურ დონეზე შესრულებული პროდუქციით, რომელიც თავისი არსით პირდაპირ მოგვიწოდებს - ენდეთ ტალანტს!" - განაცხადა სტუმარმა.
მასთან ერთად, ყრილობას ფირმის პრეზიდენტი ფრენკ ჟოაო და დიზაინერი ანდრეი პავლოვიც ესწრებოდნენ. აღსანიშნავია, რომ ქართული დროშის თეთრ-წითელ ფერებში გადაწყვეტილმა სამოსმა მოწონება დაიმსახურა.
ყრილობა მშვიდ ვითარებაში ჩაივლიდა, რომ არა ჟურნალ "ოლიმპიელის" რედაქტორ პაატა ნაცვლიშვილის სენსაციური განცხადება, რომელმაც, ერთი შეხედვით, რიტორიკული კითხვა დასვა - ვინ არის პირველი ქართველი ოლიმპიური ჩემპიონი? ეს კითხვა ქართული ოლიმპიზმისთვის თითქოს ამოხსნილია, მაგრამ ისიც ცხადია, რომ ისეთი მრავალმხრივი ნიჭის შემოქმედი, როგორიც ჟურნალისტი და პუბლიცისტი, ქართული ოლიმპიზმის ისტორიის მკვლევარი ნაცვლიშვილია, ასეთ კითხვას შემთხვევით არ დასვამდა...
ლაპარაკია გიორგი ნიკოლაძესა და 1900 წელს პარიზში გამართულ გაჯანჯლებულ-სკანდალურ თამაშებზე, სადაც ნიჩბოსნობაში გამარჯვებულ ჰოლანდიელ წყვილს მესაჭედ "უცნობი პარიზელი ბიჭუნა" ჰყავდა.
ზოგიერთი ცნობით, ის 12 წლის გიორგი ნიკოლაძეა და ნაცვლიშვილმაც ამ საკითხის გამოკვლევა მოითხოვა საგანგებო კომისიის შექმნით ან ნებისმიერი ფორმით.
მისი თქმით, ჰოლანდიელებმა გაჭირვების გამო შემთხვევით ნაპოვნი ბიჭუნა მიივიწყეს, მაგრამ საქართველოს, როგორც თავმოყვარე ერის ვალია, გამოიძიოს ეს საქმე. ისევ მისივე ცნობით, თუ ეს ამბავი დადასტურდა, მაშინ ქართული ოლიმპიზმის ისტორიაც ხომ მთელი 50 წლით გამდიდრდება, შესაძლოა, 12 წლის ნიკოლაძე ოლიმპიური თამაშების ყველაზე ახალგაზრდა ჩემპიონად გამოცხადდეს.
არადა, ის "უცნობი პარიზელი ბიჭუნა" რომ იქნებ სულაც უმრწემესი ჩემპიონი შეიძლება იყოს, ამას არც ოლიმპიური თამაშების ისტორიის ერთ-ერთი ყველაზე ავტორიტეტული მკვლევარი, ამერიკელი დევიდ ვალეჩინსკი გამორიცხავს საკუთარ კვლევებში.
* * *
ყრილობაზე გარკვეული კამათი მოჰყვა "თბილისი-2015"-ის საორგანიზაციო კომიტეტის თავმჯდომარე ალექსი ახვლედიანის გამოსვლას, რომელმაც ფესტივალისთვის მზადების მიმდინარეობა და ბაზების სარემონტო სამუშაოები მიმოიხილა.
მისი თქმით, 7 სპორტულ ბაზას უტარდება სერიოზული რემონტი და მაკეტებიც წარმოადგინა, თუმცა საკუთარი შენიშვნები და რიგ შემთხვევებში - სამუშაო ტემპების შესახებ უკმაყოფილებაც გამოთქვეს ტანვარჯიშის, ველოსპორტისა და სხვა სახეობების წარმომადგენლებმა.
ყრილობაზე სოჭის ოლიმპიადისთვის მზადებაზე ისაუბრა ფიგურული ციგურაობის ფედერაციის პრეზიდენტმა მარიამ გიორგობიანმა, ხოლო ძალოსანთა ნაკრებში მომხდარ დოპინგ-სკანდალზე ნაკრების ახალმა მთავარმა მწვრთნელმა გიორგი ასანიძემ ილაპარაკა.
მისი თქმით, მომხდარი პირდაპირი გამოძახილია ნაკრებში ბოლო ხანს შექმნილი დაძაბულობისა და ვანო გრიქუროვის გუნდიდან გაშვებისა, ხოლო დაახლოებით 120-ათასდოლარიან ჯარიმას ფედერაცია იხდის.
მანვე მომხდარში პირადი მწვრთნელები დაადანაშაულა, რომლებიც უკვე დაისაჯნენ და იქვე ოპტიმისტურად ისაუბრა მომავალზე:
"2015 წელს ჩვენ ღირსეულად დავბრუნდებით, ხოლო 2016 წელს რიო დე ჟანეიროს ოლიმპიადაზე მაღალი ხარისხის მედლისთვის ვიბრძოლებთ.
ამ სკანდალის გამო გაისად თბილისში გასამართ ევროპის ჩემპიონატს არაფერი ემუქრება, ოღონდ ხელისუფლების თანადგომა გვინდა, რადგან დაახლოებით 700-მდე სტუმარს ველოდებით".
დოპინგის თემა ყრილობაზე აქტუალური იყო და მას ოლიმპიური გუნდის მთავარი ექიმი ზურაბ კახაბრიშვილიც შეეხო, რომელმაც ასევე პირადი მწვრთნელები დაადანაშაულა:
"გვარ-სახელები შემიძლია დავასახელო იმ მწვრთნელებისა, რომლებმაც ეს წამლები მიაღებინეს თავიანთ მოსწავლეებს და ექიმების სახელის შებღალვის უფლებას არავის მივცემ" - განაცხადა მან და თან მოუწოდა სპორტსმენებს, რომ თვითნებურად, ექიმთა დაუკითხავად წამლები არ მიიღონ.
ძიუდოს ფედერაციის პრეზიდენტმა დავით ქევხიშვილმა გვამცნო, რომ ჭრიკიშვილს თავის წონაში საუკეთესოდ საერთაშორისო ფედერაციაც ასახელებს. მისი თქმით, ჩვენი ძიუდოისტები საერთაშორისო ფედერაციიდან "დიდი პრიზის" პრესტიჟული ტურნირის გარდა, დაახლოებით 300 000 დოლარის დახმარებას იღებენ ინვენტარ-ხელფასებად.
საინტერესო იყო იმერეთის რეგიონული ოლიმპიური კომიტეტის პრეზიდენტ რევაზ რობაქიძის ინიციატივაც, პარლამენტის ქუთაისიდან თბილისში გადმოსვლის შემდეგ იმ შენობის ოლიმპიურ არენად გადაკეთების შესახებ.
ყრილობამ ასევე განიხილა სეოკ-ის ანგარიში წლეულს გაწეული მუშაობის შესახებ და აუდიტის ანგარიში, რამაც მშვიდ ვითარებაში ჩაიარა.
ალექსანდრე კოტორაშვილის ფოტო
ყოველდღიური სპორტული გაზეთი "ლელო"
