ბორჯომის რაიონში ზამთრის და ზაფხულის 14 სპორტის სახეობაში მიმდინარეობს მუშაობა. ამჟამად აქ ვითარდება კალათბურთი, ფეხბურთი, ბერძნულ-რომაული ჭიდაობა, რაგბი, მძლეოსნობა, კრივი, კარატე, კიკბოქსინგი, ჭადრაკი; ბაკურიანში - სათხილამურო სპორტი, ტრამპლინიდან ხტომა, ბიატლონი, საციგაო სპორტი და ჰოკეი.
შარშანდელ მიღწევებზე და ახალ პერსპექტივებზე ადგილობრივი სპორტული სკოლის ხელმძღვანელი გიორგი რაზმაძე გვესაუბრება.
- ცხადია, 2012 წლის შედეგებით უკმაყოფილო ვერ ვიქნებით თუნდაც იმიტომ, რომ ჩვენი აღზრდილი რევაზ ლაშხი ლონდონის ოლიმპიადის ვერცხლის მედალს დაეუფლა.
ასეთი შედეგი არასოდეს გვქონია ბორჯომში. ბავშვების ნაკადმა ჭიდაობის ჯგუფებში აქ ჯერ კიდევ შარშანწინ რევაზ
აქაურებმა დაინახეს, რომ ჩვეულებრივმა ბორჯომელმა ახალგაზრდა კაცმა დიდი მონდომებით სახელოვანი გზა გაიარა და თურმე წარმატებაზე ოცნება რეალურად შეიძლება.
ახლა სულ უფრო მეტი მშობელი უშუალოდაც ესწრება შვილების ვარჯიშებს, გვეკითხება მათი პოტენციალის შესახებ. ამიტომ ბერძნულ-რომაული ჭიდაობა ნამდვილად პროგრესირებს. წარმატებები ხშირია მძლეოსნობაში, კარატეში, კიკბოქსინგში. შედეგები ცვალებადია, მაგრამ ჩავარდნა არც ერთ სახეობაში არ გვაქვს.
- შარშან ჭადრაკის სექციის ამოქმედებას გეგმავდით...
- ბორჯომში ჭადრაკს კარგი ტრადიცია ჰქონდა, აქ მსოფლიოს ჩემპიონატის ფინალური მატჩიც კი გაიმართა.
სამწუხაროდ, ბოლო წლებში ჭადრაკი დავიწყებას მიეცა. შარშან წყვეტილი პერიოდი დასრულდა.
აღდგენისთანავე სექციას გადავეცით ინვენტარი, ჩავატარეთ ადგილობრივი ტურნირები, პატარებმა დედაქალაქშიც მიიღეს მონაწილეობა შეჯიბრებებზე. შედეგებზე სამდურავი არ გვეთქმის. პროგრესი გრძელდება.
- ადრე ფეხბურთის გუნდის აღდგენაზეც საუბრობდით...
- ამ საკითხის მოგვარება წლეულს იგეგმება. რაც მთავარია, რაიონის ახალი გამგებელი დავით კამკამიძე, სპორტის სამსახურის ახალი უფროსი ირაკლი კვირკველია დაინტერესებულნი არიან ბორჯომის საფეხბურთო კლუბის აღდგენით.
მაისში, საფეხბურთო სეზონის დასრულებისთანავე შევუდგებით ადგილობრივი მოთამაშეებით დაკომპლექტებული ახალი გუნდის ჩამოყალიბებას.
ამჟამად სასპორტო სკოლაში ფეხბურთის სექცია წარმატებით მუშაობს. აფხაზეთის პირველობაზე ორი ასაკობრივი გუნდით ვმონაწილეობთ.
ერთი მათგანი ერთპიროვნული ლიდერიცაა. გაისად ისინი სასკოლო ასაკს სცილდებიან და თუ გუნდი მშობლიურ ქალაქშივე არ იარსებებს, ბუნებრივია, სხვაგან წავლენ, რაც ბოლო წლებში ტენდენციად იქცა. მაისიდან ეს პრობლემა მოიხსნება.
- სოფლებში როგორაა საქმე?
- ამჟამად სამ სოფელში მოქმედებს ბერძნულ-რომაული ჭიდაობის და ფეხბურთის ჯგუფები. უახლოეს მომავალში ფეხბურთის ჯგუფებს გავხსნით ბაკურიანში, წაღვერსა და ყვიბისში. ხოლო დვირში ან საკირეში აუცილებლად ჩამოვაყალიბებთ რაგბის სექციას.
- რაგბის სექციები სოფლებში არაერთ რაიონში გაიხსნა, მაგრამ ხშირად გუნდების დაკომპლექტებაც ვერ ხერხდება მოთამაშეთა სიმცირის გამო.
- სოფლები, სადაც რაგბის სექცია უნდა ავამოქმედოთ, მრავალრიცხოვანია და ვფიქრობთ, გაამართლებს ჩანაფიქრს, ანუ მოგროვდება გუნდისთვის საჭირო კონტინგენტი. ამასთან, ჩვენთვის მთავარია მასობრიობა.
გვინდა, რაც შეიძლება ბევრი ბავშვი ჩაებას სპორტში. ბორჯომის სასპორტო სკოლაში მწვრთნელები ამჟამად საშუალოდ 400 შეგირდს ავარჯიშებენ.
- მძლეოსნობა რაიონში ყოველთვის იყო ერთ-ერთი წარმატებული სახეობა. ახლა რა ვითარებაა...
- წარმატებით მუშაობს ადგილობრივი სპეციალისტი ვალერი ჟადანი, რომელიც ხმამაღლა შემიძლია განვაცხადო, რომ საუკეთესოთა შორისაა. ახლა გადავწყვიტეთ მისი შესაძლებლობები უფრო ფართოდ გამოვიყენოთ - კვირის გარკვეულ დღეებში სპორტის სხვა სახეობის ჯგუფებთანაც იმუშავებს, მოგეხსენებათ, რომ მძლეოსნობა სხვებისთვისაც მეტად საჭიროა.
- ბორჯომელ სპორტსმენთა პირველი მწვრთნელებისგან ხშირად მსმენია იმ უყურადღებობის შესახებ, რასაც მათ მიმართ იჩენენ...
- დაახლოებით ექვსი წელიწადია ბავშვის სპორტულ სექციაში მოსვლისთანავე ვაფიქსირებთ მის პირველ დამრიგებელს და ოფიციალურ საბუთებში ვინახავთ ამ მონაცემებს. თუმცა, სამწუხაროდ, ხშირია, როცა რაიონებში აღზრდილ და შემდეგ დედაქალაქში გადასულ სპორტსმენებს, როგორც კი ხელშესახებ წარმატებებს მიაღწევენ, პირველი მწვრთნელის გვარები "ავიწყდებათ".
ეს საერთო პრობლემაა. გარდა ამისა, ვფიქრობ, რომ რეგიონების გარკვეული ნაწილი ჩრდილში ვართ.
მეტი ყურადღებაა საჭირო ცენტრიდან, რათა სპორტის სახეობების განვითარებაში რეგიონებში მოღვაწე სპეციალისტებიც უფრო აქტიურად ჩაერთონ. მერწმუნეთ, მათ არანაკლები შესაძლებლობები გააჩნიათ საამისოდ. ამასთან, აუცილებელია რეგიონებში მიმდინარე სპორტული ცხოვრებისა და ხარვეზების შესახებ გულშემატკივარი გაცილებით ინფორმირებული იყოს.
- სტადიონის მშენებლობის დასრულებას თუ დაადგება საშველი?
- სტადიონი სასპორტო სკოლის ბალანსზე არაა, მაგრამ გეტყვით, რომ რაიონის ხელმძღვანელობასთან სპორტის სფეროს მუშაკთა შეხვედრაზე იყო მსჯელობა ამ საკითხზე. სტადიონი, რომლის აშენებაშიც მილიონებია ჩადებული, წყალში გადაყრილად არ უნდა დარჩეს. აუცილებელია მისი ერთხელ და სამუდამოდ დასრულება, რასაც, ცხადია, შესაბამისი თანხის მოძიება სჭირდება. საიდან მოხერხდება, მე ვერაფერს გეტყვით.
- ბორჯომში წლეულს რაიმე შეჯიბრებების ჩატარება თუ ივარაუდება?
- ტრადიციად დამკვიდრდა რევაზ ლაშხის რესპუბლიკური ტურნირი ბერძნულ – რომაულ ჭიდობაში. შედარებით მცირე მასშტაბის, მაგრამ ასევე ტრადიციულ შეჯიბრებებს ჩავატარებთ კარატესა და კიკბოქსინგში, მათ დაემატება ჭადრაკი. ფეხბურთში კი ისევ მივიღებთ მონაწილეობას ასაკობრივ შეჯიბრებებში.
ყოველდღიური სპორტული გაზეთი "ლელო"
