საქართველოს 17 წლამდე ძიუდოისტ ვაჟთა და გოგონათა ნაკრები გორში ევროპის ჩემპიონატის წინ ბოლო სასწავლო-საწვრთნელ შეკრებას გადის. ორივე ნაკრების მთავარი მწვრთნელი გია თენაძეა. ვაჟებთან მისი თანაშემწეა გია რევაზიშვილი, გოგონებთან - კახა მოცრაძე.
კონტინენტის ჩემპიონატი 22-24 ივნისს მონტენეგროში უნდა გაიმართოს. ამ შეჯიბრებისთვის სათანადოდ მოსამზადებლად გუნდებმა ერთად გაიარეს მოსამზადებელი შეკრებები, იასპარეზეს შიდა სარეიტინგო ტურნირებზე, ქვეყნის პირველობაზე და საერთაშორისო ტურნირებში ანთალიასა და კიევში, საიდანაც შინ 14 - 14 მედლით დაბრუნდნენ. გთავაზობთ ინტერვიუს გია თენაძესთან.
- ბოლო ორკვირიანი საწვრთნელი შეკრება 5-ში დავიწყეთ და 19 ივნისს
- ევროპის ჩემპიონატზე წამსვლელთა ვინაობა უკვე ცნობილია?
- ვაჟთა ნაკრებში შედიან: ირაკლი კუპატაძე, ერეკლე არხოზაშვილი (50 კგ), გიორგი კაციაშვილი, ბექა ნათათრალიშვილი (55), კობა მჭედლიშვილი, ბექა უდესიანი (60), ბაჩანა ბოლქვაძე (66), თამაზ კირაკოზაშვილი, ზურაბ ლომიძე (73), ბექა შერაზადიშვილი, ნიკა მოველიძე (81), დავით რამაზაშვილი, გიორგი გველესიანი (90), გიორგი ძებისაშვილი, ზაზა გოჯიაშვილი (+90). გოგონა ორია - მარიამ ჯანაშვილი და გურანდა შოთაძე. ორივე 57 კგ-ში გამოვა.
- ნაკრები რა პრინციპით შეირჩა?
- გავითვალისწინეთ ყველა განვლილი შეჯიბრების, განსაკუთრებით, საქართველოს ჩემპიონატის შედეგები. გუნდში ყველა ღირსეული მოხვდა, გარდა ორისა - ვანო ჩურჩხელაშვილი (73) და ზაზა მეგრელიშვილი (66) ტრავმის გამო გამოგვაკლდნენ. ამ ეტაპზე მეგრელიშვილის სრულფასოვანი შემცვლელი არ გვყავდა და მონტენეგროშიც ეს წონა ერთადერთი იქნება, სადაც ორი მონაწილე არ გვეყოლება.
- ყველაზე ძნელი რომელ წონებში იყო არჩევანის გაკეთება?
- 55 კგ-ში სამი დაახლოებით თანაბარი შესაძლებლობების მოჭიდავე გვყავდა - გიორგი კაციაშვილი, ბექა ნათათრალიშვილი და ერეკლე არხოზაშვილი. შეჯიბრებებზე ისინი მცირე გადანაცვლებებით, მაგრამ გამუდმებით კვარცხლბეკზე ხვდებოდნენ. ხან ერთს ჰქონდა უკეთესი შედეგი, ხან მეორეს, ხან მესამეს.
საბოლოოდ ამ წონაში კაციაშვილის და ნათათრალიშვილის გამოსვლა ვამჯობინეთ, არხოზაშვილი კი 50 კგ-ში შევუწყვილეთ ქვეყნის ჩემპიონ კუპატაძეს. ერთგვარი დილემის წინაშე ვიყავით 81 კგ-ში ფავორიტის გამოვლენისას.
აქ ბექა შერაზადიშვილს, ნიკა მოველიძესა და გიორგი ქურდიანს შორის გვიწევდა საუკეთესოს გამოვლენა. ისინიც დაახლოებით თანაბარ შედეგებს აღწევდნენ ტურნირებზე. ამიტომ პოლონეთში, ბოლო საერთაშორისო შეჯიბრებაზე სამივე წავიყვანეთ. შერაზადიშვილი ფინალში გავიდა და დანარჩენებს აჯობა.
ქურდიანსა და მოველიძეს შორის კი საკონტროლო შეხვედრა ჩავატარეთ, რომელიც ამ უკანასკნელის გამარჯვებით დასრულდა და გუნდში შერაზადიშვილთან ერთად დაიკავა ადგილი.
- ზოგადად, როგორ შეაფასებდით წლევანდელი ნაკრების შესაძლებლობებს?
- ჭაბუკთა ნაკრები თანაბარი ძალის ძიუდოისტებითაა დაკომპლექტებული, სტაბილური გუნდია. თუმცა, შარშანდელის დარად, გამოკვეთილი ლიდერები აქ არ არიან. გასულ წელს ასეთები იყვნენ ღვინიაშვილი, თუშიშვილი და ჩოჩელი. ზოგადად, ამჟამინდელი გუნდიდან კი გამიჭირდება გამორჩევა, რომლებისგანაც სხვებზე უკეთეს შედეგს მოველი.
- გოგონებზე თუ ამყარებთ იმედს?
- ორი მონაწილით მხოლოდ იმიტომ მივდივართ, რომ ისინი უკეთესად არიან მზად მაღალ დონეზე საასპარეზოდ. მარი ჯანაშვილი ისეთ კარგ ფორმაშია, თუ რამე გაუთვალისწინებელი არ მოხდა, საპრიზო ადგილზე გასვლა არ უნდა გაუჭირდეს. არ გაგიკვირდეთ, თუ გოგონებში ევროპის ჩემპიონითაც დავბრუნდეთ საქართველოში.
ყოველდღიური სპორტული გაზეთი "ლელო"
