სულ მალე - 8-11 აგვისტოს მაიამი ჭაბუკ ძიუდოისტთა მსოფლიოს პირველობას უმასპინძლებს. ჩვენი გუნდის მთავარმა მწვრთნელმა ირაკლი ცირეკიძემ დაასახელა იქ წასაყვანი შემადგენლობა.
წინასწარვე ვიტყვით, რომ მწვრთნელი ძირითადად ევროპის ჩემპიონატისა და ევროპის ახალგაზრდული ოლიმპიური ფესტივალის შედეგებს დაეყრდნო - თითო-ოროლა გამონაკლისის გარდა, ყველა მედალოსანი მიჰყავს. ცირეკიძემ გუნდში 10 კაცი შეიყვანა, თუმცა მსოფლიოზე მაინც არასრული გუნდით გამოვალთ - მონაწილე არ გვეყოლება მძიმე წონაში.
მწვრთნელის გადაწყვეტილებით, აშშ-ში რობიზონ ბეგლარიშვილი, თორნიკე ნაგლიაშვილი (ორივე - 50), ერეკლე არხოზაშვილი, ბექა ნათათრალაშვილი (55), გიორგი კაციაშვილი (60), კობა მჭედლიშვილი, სიმონ
ამათგან ივნისში ტალინში, ევროპის პირველობაზე ნაგლიაშვილს, არხოზაშვილსა და კვირიკაშვილს არ უჭიდავიათ, ხოლო ბეგლარიშვილი, მჭედლიშვილი, კირაკოზაშვილი და რამაზაშვილი მესამე პრიზიორები გახდნენ.
ეს გუნდი ივლისში ბევრად უფრო წარმატებით გამოვიდა უტრეხტში ახალგაზრდულ ოლიმპიურ ფესტივალზე, სადაც ამ ბიჭებიდან არხოზაშვილი და კაციაშვილი ჩემპიონები გახდნენ, კირაკოზაშვილი და კვირიკაშვილი მეორეზე გავიდნენ, მამარდაშვილი - მესამეზე.
უტრეხტში გუნდის ანგარიშზე კიდევ ერთი ვერცხლი იყო, რომელიც მძიმეწონოსანმა გიორგი ძებისაშვილმა მოიპოვა, თუმცა ის ამჯერად ამერიკულ გუნდში ვერ მოხვდა.
აღსანიშნავია ნაგლიაშვილის დაბრუნებაც - მან ადრევე გაინაღდა ევროპის პირველობაზე გამოსვლა, მაგრამ პოლონეთში, ბოლო საკონტროლო-შესარჩევ ტურნირში ხელი მოიტეხა და კონტინენტის პირველობაზე ვერ იჭიდავა.
ძირითადად ეს გახდა ახალგაზრდული ფესტივალის გამოტოვების მიზეზიც, თუმცა მწვრთნელებმა მაშინ სარეაბილიტაციო პროცესიც არ დააჩქარეს.
ნაგლიაშვილმა გუნდთან ერთად ბოლო შეკრება გაიარა და მისი დაბრუნება ნაკრებისთვის დიდი შეღავათია, რასაც, სამწუხაროდ, ვერ ვიტყვით 81 კილოგრამზე. ამ წონის ლიდერმა გიორგი ქურდიანმა ტალინში წასვლამდე სამი დღით ადრე ხელი მოიტეხა და ამ წონაში იქ მონაწილე საერთოდ არ გვყავდა. ეტყობა, მან ჯერაც ვერ მოასწრო ფორმის აღდგენა.
მართალია, უტრეხტში კვირიკაშვილმა გამოიჩინა თავი და ცირეკიძეს საკადრო პრობლემა მოუხსნა, მაგრამ რაც მეტი იქნება კონკურენცია, მით უკეთესი გუნდისთვის.
ნაკრებმა ბოლო შეკრება ყვარელში გაიარა ახალგაზრდულ გუნდთან ერთად, რამდენიმე დღის წინ კი თბილისში დაბრუნდა და მისმა წევრებმა ინდივიდუალურად გააგრძელეს ვარჯიში პირად მწვრთნელებთან.
მაიამიში მსოფლიოს პირველობაზე ჩვენი გოგოებიც იჭიდავებენ. ბიჭებისა არ იყოს, ესენიც არასრული გუნდით გამოვლენ - 5 სპორტსმენით. ნაკრების მთავარ მწვრთნელ გია თენაძეს იქ მზია ბებოშვილი, სალომე მარგიანი (ორივე - 48), მარიამ ჯანაშვილი, გურანდა შოთაძე (52) და ხატია ჯანაშვილი (63) მიჰყავს. შეგახსენებთ, რომ ამ ხუთეულმა ტალინშიც იასპარეზა და ისტორიული წარმატებებიც მოიპოვა - ბებოშვილი პირველი ქართველი ქალი გახდა, ვინც პირველხარისხოვან ტურნირზე (ევროპისა და მსოფლიოს პირველობა, ოლიმპიადა) მედალი მოიპოვა - მესამეზე გავიდა, მარიამ ჯანაშვილი კი ევროპის ჩემპიონი პირველი ქართველი ქალია.
ასაკის სიმცირის გამო ბებოშვილს უტრეხტში არ უასპარეზია (დიდი მოლაპარაკებებისა და მუდარის მიუხედავად, მაინც არ დართეს ამის ნება), ჯანაშვილმა კი იჭიდავა და ბრინჯაოც მოიპოვა.
ჩვენი გუნდები მაიამიში 1 აგვისტოს გაფრინდებიან და ადაპტაციის მიზნით, შეჯიბრების ადგილზე რამდენიმე დღით ადრე ჩავლენ.
შეჯიბრების განრიგი ასეთია: 8 აგვისტოს გოგოებიდან 40-4 კილოგრამის წარმომადგენლები იასპარეზებენ, ბიჭებიდან - 50 და 55-ის ფალავნები. 9-ში, შესაბამისად, 48-52-ი და 60-66-ი წონების დღეა, 10-ში - 57-63 და 73-81-სა, ჩემპიონატს კი 11 აგვისტოს 70-სა და მძიმე წონებში მოჭიდავე გოგოები და 90-სა და +90-ში მოასპარეზე ბიჭები დაასრულებენ.
მსოფლიოს წინა პირველობაზე - 2011 წელს კიევში (შარშან ოლიმპიადის გამო ამ რანგის ტურნირი არ გამართულა) ჩვენმა გუნდმა 5 მედალი მოიპოვა - 2-2 ოქრო-ვერცხლი და 1 ბრინჯაო.
კიევში ჩემპიონები ბექა ღვინიაშვილი (81) და გურამ თუშიშვილი (90) გახდნენ, ბექა დონღვანი (73) და შალვა ჩოჩელი (90) მეორეზე გავიდნენ, ბრინჯაოს მედალი კი ლევან გუგავამ (73) მოიპოვა.
სხვათა შორის, ის ტურნირი ერთ-ერთი პირველი იყო, სადაც წონაში ქვეყნიდან ორი მონაწილის გამოყვანის ნება დართეს. ამით ჩვენებმაც ისარგებლეს და ორ წონაში გვყავდა ორ-ორი მედალოსანი, 73-სა და 90-ში, ხოლო 90-ში სულაც ქართული ფინალი გაიმართა.
ცხადია, ასაკობრივი ცენზის გამო დღეს მაშინდელ მედალოსანთაგან არავინ არაა დარჩენილი ამ ნაკრებში, ყველა ახალგაზრდულში გადავიდა, მთლიანი გუნდიდან კი მხოლოდ კირაკოზაშვილია შემორჩენილი.
ყოველდღიური სპორტული გაზეთი "ლელო"
