2-3 ნოემბერს სპორტკომპლექსი "არენა" ძიუდოში საქართველოს ჩემპიონატს უმასპინძლებს უფროსთა შორის. ის ამჯერადაც მხოლოდ ვაჟებში ტარდება, ქალებისთვის კი მოგვიანებით იგეგმება.ამ ტურნირით ჩვენი ნაკრები მომავალი სეზონისთვის იწყებს მზადებას. აქედან გამომდინარეც ცხადია მისი მნიშვნელობა და გასაგებია, რომ ფედერაცია, ნაკრების ხელმძღვანელობა ყველა ლიდერის მონაწილეობას აუცილებლობად მიიჩნევენ.
თუმცა ასეთი სიმკაცრის მიუხედავად, ტურნირს მაინც დააკლდება რამდენიმე ტიტულოვანი ფალავანი უპირველესი ლიდერის თავკაცობით, მაგრამ ფრიად საპატიო მიზეზით - ტრავმების გამო.
საზარდულის ტრავმა ჭიდაობის საშუალებას არ აძლევს ევროპისა და მსოფლიოს ჩემპიონ ლაშა შავდათუაშვილს (66), კისრის პრობლემა არათუ ტურნირში
ახლა გამოსვლაც შეეძლო, მაგრამ მწვრთნელებმა არ გარისკეს და ჯერ კიდევ ასვენებენ, ვინაიდან კვლავაც რჩება საშიშროება, რომ ცხვირზე თუნდაც უნებლიე მუჯლუგუნმა სერიოზული დაზიანება გამოიწვიოს. მუხლის პრობლემა თითქოს მოიშუშა და უნდა ეჭიდავა ევროპის კიდევ ერთ ბრინჯაოსმედალოსან ლევან წიკლაურს (81), მაგრამ სამშაბათს ვარჯიშზე კვლავ იტკინა ისევ ის პრობლემური მუხლი და მისი გამოსვლაც გამოირიცხა...
ასევე ბოლო დღეებში ძიუდოისტთა ლაზარეთს ნოდარ მეტრეველიც (100) შეუერთდა - ესეც მუხლის ტრავმის გამო...
საბედნიეროდ, ჯერჯერობით სხვები მწყობრში არიან და ჩემპიონატისთვის ემზადებიან. მათ შორის - ახალგაზრდული ნაკრების წევრებიც...
უეჭველია, ისინი ტურნირს სოლიდურობას ნამდვილად შემატებენ, თუმცა დროის მცირე მონაკვეთში ბევრის ჭიდაობა კი უწევთ - ერთი თვის წინათ თანატოლთა შორის ევროპის პირველობაზე იასპარეზეს, წინა კვირას - მსოფლიოს ჩემპიონატში გამოვიდნენ, სადაც, პრაქტიკულად, ორი შეჯიბრება ჩაატარეს - პირადი და გუნდური, ახლა კი მორიგი ძლიერი ტურნირი უწევთ...
ბუნებრივია, მსოფლიოზე ყველა ბოლომდე არ დატვირთულა. უმეტესობამ ან ერთი ტურნირი ჩააგდო, ან - მეორე, ახალგაზრდებში ევროპის წლევანდელ ჩემპიონ გურამ თუშიშვილს (100) არც დასცალდა ჭიდაობა და ვერ ვიტყვით, რომ დაღლილი იქნება. ევროპისა და მსოფლიოს ჩემპიონმა ბექა ღვინიაშვილმა (90) და ამავე ტურნირების მედალოსანმა ლევან მატიაშვილმა (+100) ბოლომდეც ჩაატარეს ორივე შეჯიბრება და გვარიანადაც იომეს.
თან რიგ შემთხვევებში ცოტა დაღლაც დაეტყოთ. განსაკუთრებით - კარგი ფიზიკური მომზადებით გამორჩეულ ღვინიაშვილს, რომელსაც წინა დღეებში სურდოც შეეყარა (ეს სენი გუნდის სხვა წევრებსაც აწუხებდათ) და იქნებ მათი დასვენება ჯობდა? სულის მოთქმა არც იმ ძირითად ბირთვს აწყენდა, რომელიც ერთ-ერთ ტურნირში დაიხარჯა ბოლომდე...
ყოველ შემთხვევაში, მსოფლიოდან საქართველომდე ცოტა მეტი შუალედი რომ აჯობებდა, ამას არც ეროვნული ნაკრების მთავარი მწვრთნელი ირაკლი უზნაძე უარყოფს, მაგრამ მათ ასპარეზობას განსაკუთრებულ დატვირთვად არ მიიჩნევს.
თან, ამ ტურნირმა უნდა გამოავლინოს ძიგორო კანოს მემორიალზე წასაყვანი შემადგენლობა, საგაისო ბირთვი და ამიტომ გადაწყვიტა, ყველა აჭიდაოს. თან, კატეგორიულად მოითხოვს, რომ თითოეული თავის წონაში გამოვიდეს, რაშიც სრულად ვეთანხმებით - მიგვაჩნია, რომ ასე ცხადად გამოიკვეთება წონებში არსებული კონკურენცია.
წინა დღეებში უკვე ვრცელდებოდა ინფორმაცია, რომ ზოგიერთი ზედა წონაში აპირებდა გამოსვლას. მაგალითად, თითქოს ვალერი ლიპარტელიანი ახლა წონას არ დაიკლებდა და 100-ში გამოვიდოდა, მაგრამ უზნაძემ მსგავსი პრეცედენტი კატეგორიულად გამორიცხა.
2 ნოემბერს "არენაში" პირველი სამი წონის - 60, 66 და 73-ის ფალავნები იჭიდავებენ, დანარჩენები კვირას გავლენ საასპარეზოდ, შეხვედრები კი 11 საათზე დაიწყება.
ყოველდღიური სპორტული გაზეთი "ლელო"
