ნაცნობი სცენარით - იაპონიამ სარკეში ჩაგვახედა

ახალგაზრდა ძიუდოისტთა მსოფლიოს გუნდური ჩემპიონატი ბიჭებს შორის შარშანდლის ანალოგიური სცენარით დასრულდა - ისევ იაპონია-საქართველოს ფინალით, სადაც ისევ ჩვენ წავაგეთ და ამჯერადაც ვერცხლის მედალს დავჯერდით.

თუმცა განსხვავებაც არის და მეტად უსიამოვნოც - შარშან თუ 2:3 წავაგეთ და ბოლო შეხვედრაში გურამ თუშიშვილი მსაჯმა დაგვიჩაგრა, ამჯერად პირწმინდად წავაგეთ, 0:5 და ვერავის ვერაფერს დავაბრალებთ.

არ ვამბობთ, რომ ვერცხლი ცუდი შედეგია, მაგრამ იაპონიამ სარკეში ჩაგვახედა და მთელი ჩვენი ნაკლოვანებები გამოააშკარავა - ხუთივე შეხვედრა ისე წავაგეთ, ერთი ქულაც ვერ მოვიპოვეთ. თანაც, უმეტესობა იპონით წავაგეთ. თუმცა მანამდე იყო ორი მოგება - ბელორუსთან 3:2 ვიმარჯვეთ, ეგვიპტესთან - 4:1.

ჩვენები ჯგუფში კანადასა და ბელორუსთან ერთად მოხვდნენ, პირველ წრეში კი განთესილის სტატუსით ისვენებდნენ. პირველ ტურში ბელორუსებმა "ნეკერჩხლის ფოთლებს" 4:1 მოუგეს და ჩვენთანაც ყველაფერი ბოლო შეხვედრამ გადაწყვიტა, სადაც ევროპის ჩემპიონმა გურამ თუშიშვილმა (+90) გვიხსნა.

თუმცა თავიდანვე ჩამოვრჩით, რადგან გიორგი გუგულაშვილი (66) დმიტრი მინკოუსთან დამარცხდა. ევროპის ბრინჯაოსმედალოსანმა გიორგი კაციაშვილმა (73) შეხვედრის ბოლოს შიგნიდან ჩახვეული ფეხით ვაზარზე გადააგდო ჰრიჰორი კლებჩა (მანამდე იუკოც აუღო) და ანგარიში გაათანაბრა: 1:1, მსოფლიოს შარშანდელმა მესამეპრიზიორმა კობა მჭედლიშვილმა (81) კი გვერდზე გადაქნევით იუკო დასტყუა იაჰორ ვარაპაეუს და 2:1 დაგვაწინაურა.

ამით საქმე მოთავებული ჩანდა, რადგან ბრძოლაში ჩვენი ყველაზე წონადი კავალერია, ახალგაზრდებში ევროპისა და მსოფლიოს წლევანდელი გამარჯვებული ბექა ღვინიაშვილი (90) ერთვებოდა, მისი მოგება კი დანიელ მუკეტესთან ვადამდელ გამარჯვებას ნიშნავდა. სამწუხაროდ, კიდევ ერთხელ დადასტურდა, რომ უდიდესი ნიჭისა და პირადში ფრიად დამაჯერებელი გამოსვლის მიუხედავად, ღვინიაშვილს ჯერ კიდევ აკლია დაღვინება - ბრუნზე ეფექტური დახეთქება მოინდომა, თუმცა რაღაც უხალისოდ შევიდა ილეთზე და არათუ ვერ გადააგდო, თავად მოჰყვა და მეტოქემ შებოჭვაზე დაიჭირა. ღვინიაშვილი თითქოს ზედმეტად თავდაჯერებული იყო და ილეთზეც მოუმზადებელი შევიდა, ეს ყველაფერი კი ტუზივით დაეცა მუკეტეს - ფერადკანიანი ბელორუსი ასეთ რამეს სიზმარშიც ვერ წარმოიდგენდა და სრულიად გასაგებია მისი დაუფარავი ემოცია, რომლითაც მოგება გამოხატა.

ამდენად, ანგარიში გათანაბრდა - 2:2 და თეორიულად წაგების საფრთხეც გაჩნდა, თუმცა პრაქტიკულად ეს ნულის ტოლი იყო, რაც თუშიშვილისა და მიკიტა სვირიდის პაექრობამ დაადასტურა - ჩვენმა ფალავანმა ჯერ ვაზარი აუღო მეტოქეს, მერე კი იპონზეც დაახეთქა.

ნახევარფინალში ჩვენი მეტოქე ეგვიპტე აღმოჩნდა. არადა, იმ ჯგუფში სამხრეთ კორეაც გამოდიოდა, თუმცა მათ პირველივე შეხვედრა სწორედ "ფარაონებთან" დათმეს, თანაც, დიდი ანგარიშით - 1:4. სამაგიეროდ, ჩვენ ეგვიპტელებს ვაჯობეთ იმავე სხვაობით.

ჩვენი ნაკრების მწვრთნელებმა ეს შეხვედრა ორი ცვლილებით დაიწყეს - 66-ში გუგულაშვილის ნაცვლად ევროპის წლევანდელი მესამეპრიზიორი თორნიკე ნაგლიაშვილი დააყენეს, 81-ში კი მჭედლიშვილს ევროპისა და მსოფლიოს შარშანდელი მესამეპრიზიორი ლევან გუგავა ამჯობინეს.

ბარემ აქვე გეტყვით, რომ ეს დუეტი ფინალშიც გაიყვანეს, ხოლო ეგვიპტესთან ორივემ მოიგო, თუმცა გუგავამ - უბრძოლველად, რადგან მეტოქე არ გამოუცხადდა, ნაგლიაშვილმა კი ახმედ აბდელრახმანი გაფრთხილებებით მოახსნევინა.

ნაგლიაშვილს მხარი კაციაშვილმაც აუბა და მასაც მოუხსნეს მეტოქე, ოღონდ - ფეხში ხელით შესვლისთვის, რისთვისაც მსაჯებმა აბდელრაჰმან მოჰამედი დასაჯეს. გუგავას ტექნიკური მოგება უკვე ნაადრევ გამარჯვებას ნიშნავდა - 3:0, თუმცა ღვინიაშვილმა პრესტიჟის აღსადგენად გონივრულად იჭიდავა და ჩვენი უპირატესობა კიდევ უფრო განამტკიცა - ადამ რამადფანი გაფრთხილებებით დაჯაბნა.

მძიმეწონოსანთა შერკინება უფრო პრესტიჟულ ხასიათს ატარებდა, რადგან თუშიშვილმა პირადში მოუგო აჰმედ ვაჰიდს, ოღონდ მეტოქემ ვაზარი ამოუქაჩა. ამჯერად ეგვიპტელმა იმარჯვა, როცა თუშიშვილი იუკოზე მოჰყვა, საერთო ანგარიში კი 4:1 გახდა ჩვენ სასარგებლოდ.

ფინალში ჩვენმა მწვრთნელებმა მთავარი დუეტი - ღვინიაშვილი-თუშიშვილი დაასვენეს. სამაგიეროდ, 73-ში კაციაშვილის ნაცვლად ევროპის ჩემპიონი და მსოფლიოს ფინალისტი თამაზ კირაკოზაშვილი დააყენეს, ზედა წონებში კი ადგილი გიორგი გველესიანს (90) და გიორგი ლაზუაშვილს (+90) დაუთმეს.

აღსანიშნავია, რომ ვალერი ლიპარტელიანის მამიდაშვილის შვილი გველესიანი ჯერ მხოლოდ 18 წლისაა, თუმცა იაპონელებს კირაკოზაშვილთან ერთად ყველაზე კარგად ის ეჭიდავა - მხოლოდ ამათ არ გაუშვიათ ქულა. გველესიანმა შოიჩირო მუკაისთან ერთადერთი გაფრთხილება მიიღო და ასე წააგო. ოღონდ ეს კია, მუკაი ერთადერთი უტიტულო და ყველაზე გამოუცდელი იყო იაპონურ ხუთეულში (ის მხოლოდ ქვეყნის ჩემპიონია, პირველხარისხოვან შეჯიბრებაში კი პირველად იჭიდავა), გველესიანი კი მეორე ნახევარში გვარიანად დაიღალა. თუმცა მან მაინც დაამტკიცა, რომ მართლაც ტალანტია და დიდი შესაძლებლობები გააჩნია. მთავარია, სწორად მოამზადონ.

კირაკოზაშვილმაც ერთი გაფრთხილება მიიღო ახალგაზრდებში მსოფლიოს შარშანდელ ფინალისტ იუჯი იამამოტოსთან, ერთ მომენტში კი თავსუკან გდებაზე მსაჯმა იუკოც მისცა, მაგრამ გააუქმეს.

ჩვენებმა სხვა შეხვედრები პირწმინდად წააგეს - ნაგლიაშვილი ახლანდელმა მსოფლიოს ჩემპიონმა მასაია ასარიმ ვაზართან ერთად მტკივნეულზე დაიჭირა, გუგავა ასევე მსოფლიოს ვერცხლისმედალოსანმა (ოღონდ ეს ჯილდო ახლა მოიპოვა, აბუ დაბიში) სოტარო ფუჯივარასთან კონტრილეთზე ვაზარიზე დააგდო, ლაზუაშვილი კი აბუდაბური ვერცხლის კიდევ ერთმა მფლობელმა გენტა ტანაკამ შიგნიდან ჩახვეული ფეხით იპონზე გადააგდო.

სტატისტიკურად ჩვენებიდან უდანაკარგოდ კაციაშვილი და მჭედლიშვილი გამოვიდნენ. პირველმა ორი ბრძოლა გამართა და ორივე მოიგო, მეორემ კი ერთხელ იჭიდავა და შედეგიანად. გუგავა, ნაგლიაშვილი, ღვინიაშვილი და თუშიშვილი 2-2-ჯერ გავიდნენ ტატამზე და თითოჯერ მოიგეს; გუგულაშვილმა, კირაკოზაშვილმა, გველესიანმა და ლაზუაშვილმა კი თითო ორთაბრძოლა ჩაატარეს და წააგეს.

ყოველდღიური სპორტული გაზეთი "ლელო"