![](https://sportall.ge/pictures/image5/a9cd5a78c44b52898b91211cc7da694d.jpg)
ცხადია, არა უნაკლო, რადგან მოჭიდავეები მხოლოდ ახლა იწყებენ ახალი სეზონისთვის მზადებას და ჯერ არ არიან ფორმაში. ევროპისა და მსოფლიოს პირველობებზე წარმატების მოსაპოვებლად მათ კვლავაც ბევრი მუშაობა მართებთ, მაგრამ საერთო დონე დამაკმაყოფილებელია.
უეჭველია, ამაში თავისი დიდი წვლილი ლიდერთა მონაწილეობამაც შეიტანა, რომლებიც უკლებლივ გამოდიან ტურნირში.
9 დეკემბერს ოთხი წონის ათლეტები ეცილებოდნენ ერთმანეთს მედლებში - 55-ის, 66-ის, 84-ისა და 120-ის. ამათგან ყველაზე მეტ ყურადღებას მძიმე წონა იქცევდა
მძიმე დუელები
მძიმე წონის ფინალი მართლაც განსაკუთრებული გამოდგა, ხოლო მისი გამარჯვებული - წყალტუბოელი იაკობ ქაჯაია, უდავოდ, ტურნირის საუკეთესო მონაწილეა. მან კიდევ ერთხელ დაამტკიცა, რაოდენ დიდი ტალანტია და აქედანვე შეგვიძლია, მომავალი ოლიმპიადის ფავორიტად მივიჩნიოთ.
ქაჯაიამ ფინალამდე უძნელესი გზა გაიარა, იქ კი 43 წამში ბეჭებზე დააწვინა ევროპის პრიზიორი, ოლიმპიადისა და მსოფლიოს მეხუთეადგილოსანი გურამ ფერსელიძე!
ამ წონაში, ფინალისტების გარდა, ყურადღებას ქუთაისელი ძმები - სერგო და შოთა გოგისვანიძეები და თბილისელი ლევან არაბულიც იქცევდნენ. წილისყრამ ისე ინება, რომ ყველა ძირითადი კონკურენტი ქაჯაიას მხარეს მოხვდა და ერთხელაც კი არ მიეცა ამოსუნთქვის საშუალება.
ფერსელიძეს ბევრად იოლი ხვედრი ერგო - პირველ წრეშიც ისვენებდა და არც მეტოქეები ჰყავდა ამდენად ძლიერები.
საბედნიეროდ, ქაჯაია ძლიერ წილისყრას არ შეუშინდა და პირველ წრეში ახალგაზრდებში მსოფლიოს ჩემპიონი შოთა გოგისვანიძე იოლად დაჯაბნა - 1:0; 2:0. მომდევნო წრეში საქართველოს თასის მფლობელსა და მსოფლიოს ბოლო პირველობის მონაწილეს, ახალგაზრდებში ევროპის ვიცე-ჩემპიონ არაბულს აჯობა, როცა შეხვედრის მიწურულს კარგად შეეკრა და წრის გარეთ ორქულიანზე გადააგდო.
თუმცა ამ შეხვედრაში გამოჩნდა, რომ ჩვეულ ფორმაში მაინც ვერ იყო. მაგალითად, ჩოქბჯენიდან ორჯერ ვერ დაატრიალა (თუმცა ერთხელ თვითონაც დაიცვა თავი), ისე ენერგიულადაც ვერ თუ არ უტევდა.
შესაძლოა, ასე შეგნებულადაც იქცეოდა და მეტოქის დგომში დაღლას ეშურებოდა, მაგრამ ჩოქბჯენიდან ძლივს გადაურჩა დატრიალებას - არაბული ძალზე ახლოს იყო მიზანთან. ჩოქბჯენში ჭიდაობის მინუსები ქაჯაიამ სერგო გოგისვანიძესთანაც გამოავლინა ნახევარფინალში - ვერც მისი დატრიალება შეძლო, მაგრამ, სამაგიეროდ, დგომში ბევრად აქტიური იყო და ორჯერ დიდოსტატურად შეეკრა, რასაც შედეგიანი გდებები მიაყოლა და 4:0 იმარჯვა.
ამასობაში ფერსელიძემ ბექა კანდელაკსა და ნიკა კორსანტიას მოუგო... ფინალი კი ხანმოკლე გამოდგა. ამ დღეებში "თავისუფალთა" შორის ვიხილეთ 48 წამში მოგებული ერთი შეხვედრა, მაგრამ ამათ რეკორდი მოხსნეს. ფერსელიძემ თვითონ წამოიწყო გდება, მაგრამ ქაჯაიამ დაუხურა და ბეჭებით დააგდო ლეიბზე, რაც "დატუშვით" დასრულდა - მეტოქემ გაქცევა ვერ მოახერხა.
ასეთ სტილში მოგება მით უფრო საყურადღებოა, რომ ფერსელიძეც კარგი ფიზიკური ძალით გამოირჩევა და უფრო ძალისმიერ მოჭიდავეებს მიეკუთვნება.
ლაშხმა თავისი დაამტკიცა
მძიმე წონის შემდეგ ყველაზე მეტ ინტერესს 66 კილოგრამი იწვევდა, სადაც ქვეყნის თასის მფლობელსა და ახალგაზრდებში ევროპის ორგზის ვიცე-ჩემპიონ საჩინო დავითაიას ძლიერი კონკურენტი გამოუჩნდა - ქვედა წონიდან ანაცვლებული ევროპის ჩემპიონი და ოლიმპიური ვერცხლისმედალოსანი რევაზ ლაშხი.
დაძაბული და ემოციური წინასწარი შეხვედრებიც ლოგიკურად წარიმართა და ფინალშიც ესენი გავიდნენ, იქ კი ლაშხმა უკეთესი ფიზიკური მომზადებისა და გამოცდილების, ოდნავ მეტი კლასის ხარჯზე იმარჯვა.
ამ შეხვედრაში დავითაიას დადებით მხარედ ჩოქბჯენში კარგი ჭიდაობა უნდა მივიჩნიოთ - მეორე პერიოდში, ანუ სამწუთიან მონაკვეთში ორჯერ ჰქონდა მომენტი, როცა ესოდენ ძლიერი მეტოქე 3-3-ჯერ დაატრიალა.
მეორედ ეს ზედ ბოლო წამებზე მოხდა და მესამე დატრიალება სასტვენის შემდეგ იყო და არც ჩაეთვალა, თორემ ცაიტნოტი რომ არა, ვინ იცის, რა მოხდებოდა - ლაშხმა 11:8 მოიგო.
პირველი ქულაც დავითაიამ მოიპოვა, ლაშხმა კი მისთვის ჩვეულ ჯიკაობას კარგი შესვლებიც დაუმატა. ჩოქბჯენიდანაც ისე კომბინაციურად ვერა, მაგრამ მაინც დაატრიალა. ერთხელ აიტაცა და წრის გარეთაც გადააგდო, ერთხელ კი მოძრაობაზეც მოხდენილად მოატყუა და ისე შევიდა ქულაზე...
ერთი სიტყვით, ისიც მოწოდების სიმაღლეზე იდგა, გარკვეული ხარვეზების მიუხედავად. მეორე პერიოდის მეორე ნაწილში მისი ფიზიკური უპირატესობაც გამოიკვეთა, დავითაია კი დისკვალიფიკაციას გადაურჩა, როცა გაცხარებულმა მისი მწვრთნელის მიერ შემოგდებულ საპროტესტო ფირნიშს ფეხი ამოჰკრა და მეორე ლეიბზე გადააგდო - უცხოეთში ამას არავინ აპატიებს.
ამ გამარჯვებით ლაშხმა დაამტკიცა, რომ ახალ წონას ადაპტაციის გარეშე შეეგუა, რაც არცაა გასაკვირი - წინა წლებში ის ხშირად ჭიდაობდა 66-ში. თუმცა მაინც ახალი წონაა და თვითდამკვიდრებისთვის ეს წარმატება ძალიან სჭირდებოდა.
კიდევ უფრო ცხარე გამოდგა 84-ის ფინალი ევროპის ვიცე-ჩემპიონ ვლადიმერ გეგეშიძესა და ახალგაზრდებში ევროპის ორგზის ბრინჯაოსმედალოსან რობერტ კობლიაშვილს შორის. ისინი კარგად იცნობენ ერთმანეთს და აქცენტიც უფრო ჩამშლელ ჭიდაობაზე აიღეს, ვიდრე - შემტევზე.
ალბათ, ამიტომ ილეთი არ გაკეთებულა, კობლიაშვილმა კი მომგებიანი ქულა მეტოქის გაფრთხილებით მიიღო. მოგვიანებით გეგეშიძემაც იმავე გზით გაათანაბრა ანგარიში, მაგრამ მსაჯებმა მალევე შეცვალეს გადაწყვეტილება და ქულა გააუქმეს.
შეხვედრის მიწურულს გეგეშიძემ ჩოქბჯენიდანაც გადააგდო მეტოქე, მაგრამ ეს დაუსრულებელ გდებად ჩაუთვალეს და ქულა არ მისცეს...
საბედნიეროდ, საქმე სერიოზულ ინციდენტამდე არ მისულა. აი, უკეთ ჭიდაობა კი ორივე მეტოქეს შეეძლო, განსაკუთრებით - ჩოქბჯენში...
გარკვეული ხმაური ბათუმელების ფინალსაც ახლდა 55-ში, მაგრამ გოდერძი დავითაძემ ბოლოს მაინც გატეხა ახალგაზრდებში ევროპის ვიცე-ჩემპიონ ნიკა ცეცხლაძის წინააღმდეგობა. ჩემპიონმა განსაკუთრებით შთამბეჭდავად ბოლო გდება შეასრულა და 9:2 მოიგო.
10 დეკემბერს "არენაში" დარჩენილი სამი წონის - 60-ის, 74-ისა და 96-ის ფალავნები იჭიდავებენ, რითაც საქართველოს ჩემპიონატიც დასრულდება. ოღონდ დღეს დილის შეხვედრები, 11-ის ნაცვლად, 10 საათზე დაიწყო.
კვარცხლბეკი
55 კგ. 1. გოდერძი დავითაძე; 2. ნიკა ცეცხლაძე; 3. გიზო მელაძე (ორივე - აჭარა), აბესალომ ქათამაძე (ზესტაფონი).
66 კგ. 1. რევაზ ლაშხი (ბორჯომი); 2. საჩინო დავითაია (სენაკი); 3. მარადი აბულაძე (აჭარა), ანტონ მამაგეიშვილი (ქუთაისი).
84 კგ. 1. რობერტ კობლიაშვილი (გარდაბანი); 2. ვლადიმერ გეგეშიძე; 3. ვახტანგ ხალვაში (ორივე - აჭარა), გიორგი ცირეკიძე (ქუთაისი).
120 კგ. 1. იაკობ ქაჯაია (წყალტუბო); 2. გურამ ფერსელიძე (აჭარა); 3. ბექა კანდელაკი, ლევან არაბული (თბილისი).
ყოველდღიური სპორტული გაზეთი "ლელო"