ახალგაზრდა მოჭიდავეები აგრძელებენ მზადებას მსოფლიოს ჩემპიონატისთვის, რომელიც ნაოლიმპიადევს, 30 აგვისტოდან 4 სექტემბრის ჩათვლით ფრანგულ მეიკენში ჩატარდება.თავისუფალი სტილით მოჭიდავეთა ნაკრები ხვალ ასრულებს საერთო ფიზიკური მომზადებისთვის განკუთვნილ შეკრებას ბაკურიანში და თბილისში დაბრუნდება, თუმცა სახლში დიდხანს არ დარჩება და 1-ლი აგვისტოდან ბორჯომს მიაშურებს, სადაც მორიგ სავარჯიშო ეტაპს დაიწყებს. დასკვნით შეკრებას ისინი 19 აგვისტოდან დუშეთში გაივლიან, მისი დასრულების შემდეგ კი საფრანგეთში გაფრინდებიან.
გიორგი გოგშელიძის სამწვრთნელო შტაბი არ აპირებს, რადიკალურად გადაახალისოს ევროპის პირველობაზე ნაჭიდავები გუნდი, თუმცა რამდენიმე წონაში საკადრო ცვლილება იქნება, მაგრამ ძირითადი ბირთვი
"ბერძენ-რომაელებმა" და მათმა მთავარმა მწვრთნელმა ზაზა სილაგაძემ მსოფლიოსთვის მოსამზადებელ ციკლშიც დაუთმეს ადგილი უცხოურ ეტაპს, თუმცა ამჯერად უმეტეს ნაწილს სამშობლოში გაატარებენ (სეზონის დასაწყისში, როცა გუნდი ჯერ კიდევ არ იყო ევროპის ჩემპიონატისთვის მზადების გადამწყვეტ ციკლზე გადასული, მათ რამდენიმე თვე გაატარეს ევროპაში, სადაც სხვადასხვა ქვეყანაში ერთობლივ წვრთნებში მიიღეს მონაწილეობა). გუნდმა ეროვნულ ნაკრებთან ერთად უკვე გაიარა ერთობლივი შეკრება მინსკში, "სტაიკების" ოლიმპიურ ბაზაზე, სადაც მათთან ერთად ვარჯიშობდნენ და სპარინგებში მონაწილეობდნენ საქართველოს, ბელორუსის, უნგრეთის, სომხეთის, ლატვიის და სხვათა ოლიმპიური გუნდები, აგრეთვე - მასპინძელთა ახალგაზრდული ნაკრები.
ცხადია, ასეთი დონის ფალავნებთან ვარჯიში, რომელთა შორისაც ბლომად იყვნენ ოლიმპიური მედალოსნები, ევროპისა და მსოფლიოს პირველობების ჩემპიონ-პრიზიორები და, სავარაუდოდ, იქნებიან მომავალი ოლიმპიადის ტრიუმფატორებიც, ძალიან წაადგებათ ჩვენს მოზარდებს.
ეს გუნდი მორიგ საწვრთნელ ეტაპს წყალტუბოში ხვალ დაიწყებს, სადაც მათთან ერთად უზბეკეთის ახალგაზრდული ნაკრებიც იქნება. ჩამოსვლა სურს ესტონეთსაც და საქმიან მიმოწერასაც აწარმოებენ ჩვენებთან, თუმცა მათი საკითხი ჯერ საბოლოოდ გადაწყვეტილი არაა, უზბეკებისა კი ბეჭედდასმულია. წყალტუბო მათთვის ფეხბედნიერი ადგილია - ევროპის ჩემპიონატის წინაც იქ გაიარეს დასკვნითი შეკრება და, სავარაუდოდ, ბოლო ეტაპს ახლაც იქვე ჩაატარებენ.
ევროპის ჩემპიონატზე ეს გუნდიც დიდი წარმატებით გამოვიდა და 8-დან 6 მედალი მოიპოვა - 3 ოქრო, 2 ვერცხლი და 1 ბრინჯაო. ამიტომ შემადგენლობის ძირითად ბირთვს სილაგაძეც შეინარჩუნებს, მაგრამ ზოგიერთ წონაში ახალი მონაწილეც ეყოლება. შემადგენლობას ისიც უახლოეს დღეებში, მეორე შეკრების მიმდინარეობისას გამოაცხადებს.
შეგახსენებთ, რომ ამ გუნდიდან ევროპის ჩემპიონი ნუგზარ წურწუმია (50), რამაზ ზოიძე (66) და ზვიად პატარიძე (120) გახდნენ. ფინალში ლევან ქავჟარაძე (60) და გიორგი მელია (96) დამარცხდნენ, კვარცხლბეკის მესამე საფეხურზე კი დავით ჩხარტიშვილი (55) დადგა. უმედლოდ თემურ ჭკუასელიძე (74) და გურამ ხეცურიანი (84) დარჩნენ, თუმცა ხეცურიანმა ბრინჯაოსთვის ორთაბრძოლა წააგო და მეხუთეზე დარჩა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
