იშვიათია თავის საქმეზე ისეთი შეყვარებული და ბოლომდე ერთგული ადამიანი, როგორიც სამბოში საქართველოს დამსახურებული მწვრთნელი გივი სარდანაძეა. 46 წელიწადია იგი სპორტის ამ სახეობაში მოღვაწეობს და არაერთი სახელოვანი ფალავანი ჰყავს აღზრდილი. ქუთაისის თვითმართველობამ ღვაწლმოსილ სპეციალისტს მრავალწლიანი მუხლჩაუხრელი შრომა დაუფასა და წლეულს მისი სახელობის ტურნირი დააფუძნა, რომელიც ამ უიქენდზე ქუთაისის სპორტის სასახლეში გაიმართა დასავლეთ საქართველოს სამბისტთა მონაწილეობით.
"აღმოსავლეთ საქართველოს გუნდები შეგნებულად არ მოვიწვიეთ, რადგანაც ტურნირი პირველად ტარდება და ამ ეტაპზე არ გვინდოდა ბევრი მონაწილე ყოფილიყო. სამომავლოდ, ქალაქის მერია გვპირდება საერთაშორისო ტურნირის ჩატარებას, რომელშიც
"მთელი ცხოვრება სამბოს მივუძღვენი, ჩემს შეგირდებს მსოფლიოსა და ევროპის ოფიციალურ პირველობებზე (ასაკობრივებში და დიდებში) 68 სხვადასხვა სინჯის მედალი აქვთ მოპოვებული. მათ შორის ხუთი მსოფლიოს და ხუთიც ევროპის ჩემპიონის წილად მოდის. ქართული სამბო მსოფლიოში ერთ-ერთი უძლიერესია. ქუთაისელთა გუნდი კი საქარველოში მე-20 საუკუნის ერთ-ერთ საუკეთესო გუნდადაა დასახელებული. დღეს წარმატებით ასპარეზობენ გელა სანიკიძე, გენადი ჩირგაძე, ვარლამ შალიკაშვილი, რომელიც თავის ასაკში წლეულს ევროპის პრიზიორი გახდა. ლერი ჯიხვაშვილი კი მსოფლიოსა და ევროპის პრზიორია".
მანვე ისიც გვითხრა, რომ ქალაქის ხელმძღვანელობა სამბოს დიდ ყურადღებას აქცევს და ამ ტურნირის ჩატარებაც მათი იდეა იყო.- "დიდი მადლობა მერიას და საკრებულოს ტურნირის ორგანიზებისთვის. არ ყოფილა შემთხვევა, ქალაქის ხელმძღვანელობისთვის რაიმე გვეთხოვოს და შესაძლებლობების ფარგლებში გვერდში არ დაგვდგომოდნენ.
ძალიან კარგი სავარჯიშო პირობები გვაქვს, თანამედროვე დარბაზი და კარგი ხალიჩა, დანარჩენი ჩვენს შრომაზეა დამოკიდებული. მწვრთნელი და სპორტსმენი მაშინ გქვია, როცა მიღწეულით არ კმაყოფილდები. ქუთაისში სამბოს საამაყო ტრადიციები აქვს და ვეცდებით, რომ ყოველთვის მოწინავე პოზიციებზე ვიყოთ."
"გივი სარდანაძეს ქართულ სპორტში უდიდესი ღვაწლი მიუძღვის. რამდენჯერმე თავის სახეობაში საქართველოს საუკეთესო მწვრთნელად იყო დასახელებული. გაისად ტურნირში საქართველოს რეგიონებთან ერთად სხვა ქვეყნის სამბისტებიც იასპარეზებენ. თანაც, მომავალ წელს გივი სარდანაძე 70 წლისა ხდება და ეს მისი საიუბილეო ტურნირიც იქნება. ბატონი გივი კი გვპირდება, რომ 70 წლის იუბილეს 70 მედლით შეხვდება" - აღნიშნა ქუთაისის მერიის სპორტის სამსხურის მთავარმა სპეციალისტმა გია ჩიხლაძემ.
ახლა კი თავად ტურნირის შესახებ. შეჯიბრება ჭაბუკთა შორის გაიმართა და მასში 90-ზე მეტი სპორტსმენი მონაწილეობდა. გამარჯვებულები 12 წონით კატეგორიაში გამოვლინდნენ. აი, ისინიც: გიორგი ნაროიშვილი (38კგ), გიორგი ბარჯაძე (41. ორივე - ვანი), ლევან შონია (45), ჯაბა ქურდიანი (48), იაგო დიხამინჯია (52), ვარლამ შალიკაშვილი (56, ოთხივე-ქუთაისი), შმაგი დადუნაშვილი (60,ვანი), დავით წურწუმია (65,ფოთი), ზურაბ ლომიძე (70, ზესტაფონი), ალეკო თოლორაია (74, ზუგდიდი), გაგა კამლაძე (81, ქუთაისი), გიორგი ლაზუაშვილი (+81, ზესტაფონი).
ყოველდღიური სპორტული გაზეთი "ლელო"
