იაძემ ამ შედეგს არადამაკმაყოფილებელი უწოდა იმის მიუხედავად, რომ მსოფლიოს ჩემპიონატიდან ყველაზე მეტი მედალი სამბისტებმა ჩამოიტანეს. როცა ჩემპიონი არ გვყავს, იქ წარმატებაზე ლაპარაკი არ შეიძლებაო,
თავისი შეგირდებიდან იაძე ყველაზე მეტად კმაყოფილი ნახუცრიშვილის გამოსვლითაა. ის წლეულს გადმოვიდა ახალგაზრდებიდან და ევროპის ჩემპიონატზეც ვერცხლი მოიპოვა. ამ ბიჭმა მაქსიმუმი გააკეთა, მისგან ამდენს არც ველოდებოდითო, აღნიშნა მწვრთნელმა. ლევანს შესაშური ბრძოლისუნარიანობა და შეუპოვრობა გამოუვლენია. ის ფინალში მსოფლიოს აწ უკვე ოთხგზის ჩემპიონთან, ბელარუს დმიტრი ბასილევთან მტკივნეულით დამარცხდა. თურმე ნახუცრიშვილი ბოლომდე არ ნებდებოდა და ხელის გაჭიმვის მერეც კი არ სურდა ბედთან შეგუება. ამ მომენტში ბასილევიც რაინდულად მოქცეულა და ყველანაირად ეცადა, ხელი არ მოეტეხა, რაც იმ მომენტში თავისუფლად შეეძლო. ამის მიუხედავად, ნახუცრიშვილს ხელი მაინც მაგრად ჰქონია ნატკენი - იოგები გაჭიმვია და ახლა სერიოზული მკურნალობა სჭირდება.
იაძე ყველაზე უკმაყოფილო წიკლაურის გამოსვლითაა, ფინალში არც უცდია ბრძოლაო. არადა, თურმე დამთავრებამდე 30 წამით ადრე რუს რაის რახმატულინს უგებდა და ჩემპიონობის ჩინებული შანსი გაუნიავებია. იმაზე ამის მიზეზად ძიუდოში საქართველოს მოახლოებულ ჩემპიონატს ასახელებს, ტრავმის შიშით თავი დაზოგა და არ იბრძოლაო. რახმატულინი მეშვიდედ გახდა მსოფლიოს ჩემპიონი და ამ წარმატების შემდეგ სპორტიდანაც წასულა, იქვე გაიხადა ფორმა და დაგვემშვიდობაო. თურმე ტურნირის წინ რახმატულინი ამბობდა, ფინალში ვინც შემხვდება, იმას უნდა გადავცე ჩემი ფორმაო, მაგრამ ჭიდაობისას ჩვენებურთან წაკამათებულა და მერე გაბრაზებულს აღარც პირობა შეუსრულებია.
რაც შეეხება სვიმონიშვილს, მას ნახევარფინალში ხელი უტკენია უზბეკ ჯონიბეკ მუკუმოვთან შეხვედრაში, საღამომდე, ფინალურ შეხვედრამდე კი ისე გასიებია, საჩემპიონო შერკინება უბრძოლველად დაუთმია ყაზახ აზამატ მუკანოვისთვის.
ამ მსოფლიოს ჩემპიონატმა რამდენიმე საკადრო გადაადგილებაც განაპირობა. კერძოდ, მსოფლიოს ექსჩემპიონი უშანგი კუზანაშვილი (52) წონას შეიცვლის და გაისიდან 57-ში იჭიდავებს, რადგან ახლა 10-კილომდე დაუკლია და იაძემ მისი წაგებაც ამით ახსნა. სპორტიდან წავიდნენ მსოფლიოს ჩემპიონი მირიან პავლიაშვილი (100) და დავითაშვილი, რომლებმაც ამოწურეს თავი და თვითონაც განუცხადებიათ სპორტიდან წასვლის შესახებ.
ამით სამბისტებმა სეზონის ძირითადი ნაწილი დაამთავრეს. ახლა მათი მთავარი საზრუნავი საგაისო სეზონისთვის მზადება და საკუთარი დარბაზის რემონტია. მოგეხსენებათ, სამბისტებს ვაკეში მდებარე ძიუდოს ყოფილი დარბაზი გადაეცათ, სადაც სარემონტო სამუშაოები უკვე დაჩქარებული ტემპით მიმდინარეობს და სულ მალე საკუთარი ბაზა ამათაც ექნებათ.
ყოველდღიური სპორტული გაზეთი
"ლელო"
