საქართველოს სამბოს ჩემპიონატზე წლის შედეგებიც შეჯამდა

შარშანდელი და წლევანდელი მსოფლიოს სამი ჩემპიონი, ევროპის წლევანდელი ერთი ჩემპიონი და მსოფლიოს 2014 წლის ჩემპიონატის სამი პრიზიორი, ანუ ყველა უძლიერესი მონაწილეობდა ქარელში სამბოში გამართულ საქართველოს ჩემპიონატში.

ეს იყო სეზონის დასკვნითი ასპარეზობა, რომელმაც გარკვეულწილად წარმოაჩინა კიდეც ის სამბისტები, რომლებიც 2015 წლის პირველივე თვიდან ჩაებმებიან საერთაშორისო ტურნირებში, გაზაფხულზე კი ევროპის ჩემპიონატზე იასპარეზებენ.

მსოფლიოს მოქმედმა ჩემპიონებმა - გენადი ჩირგაძემ (52 კგ) და ვახტანგ ჩიდრაშვილმა (57), ნაკრების მწვრთნელებთან შეთანხმებით, ქარელში, ზედა წონით კატეგორიებში იჭიდავეს. ჩირგაძემ აქაც იჩემპიონა, ჩიდრაშვილი კი ბრინჯაოს დასჯერდა. შარშანდელი მსოფლიოს ჩემპიონი ლევან ნახუცრიშვილიც (68) ზედა წონაში გამოვიდა და მესამე პრიზიორი გახდა.

გააზრებული ორთაბრძოლებით მოწონება დაიმსახურა ახალგაზრდა საგარეჯოელმა ირაკლი კუპატაძემ (57), რომელიც მხოლოდ ფინალში დამარცხდა მსოფლიოს ჩემპიონ გენადი ჩირგაძესთან.
გამორჩეულად დაძაბული ორთაბრძოლები იყო 62, 74 და 90 კილოგრამ წონითი კატეგორიების ფინალში.

წარმატებით დაუბრუნდა ხალიჩას ევროპის 2008 წლის ჩემპიონი, დედოფლისწყაროელი ლევან წიკლაური (82), რომელიც საპატიო კვარცხლბეკის უმაღლეს საფეხურზე დადგა.

მძიმე წონაში კი მეორე წელიწადია ზედიზედ იზეიმა ჩემპიონობა ახალციხელმა ბექა ბერძენიშვილმა.
ჩემპიონატი საუცხოოდ იყო ორგანიზებული (მთავარი მსაჯი გიორგი ბერუაშვილი).

სამბოს ფედერაციამ ქარელშივე დაასახელა და დააჯილდოვა კიდეც 2014 წლის საქართველოს საუკეთესო სამბისტი, მსოფლიოს ორგზის ჩემპიონი ვახტანგ ჩიდრაშვილი (57). ახალგაზრდებს შორის საუკეთესოდ ცნო ამ ასაკში მსოფლიოს ჩემპიონი თორნიკე ჭოველიძე (68), ხოლო ჭაბუკთა შორის მსოფლიოსა და ევროპის ჩემპიონი ირაკლი კუპატაძე (52).

წლის საუკეთესო მწვრთნელად აღიარეს ეროვნული ნაკრების უფროსი მწვრთნელი ჯონდო მუზაშვილი.

მადლობის სიგელებითა და ოქროს მედლებით დაჯილდოვდნენ სამბოს ერთგული და ღვაწლმოსილი მწვრთნელები - გივი სარდანაძე (ქუთაისი) და ზურაბ ტუღუში (ფოთი).

კვარცხლბეკი
52 კგ. 1. გივი ნადარეიშვილი (ფოთი), 2. ლევან ბერბერაშვილი (თიანეთი), 3. იმედა არაბული (ახმეტა), 3. რომან თურქაძე (ყვარელი).
57 კგ. 1. გენადი ჩირგაძე (ქუთაისი), 2. ირაკლი კუპატაძე (საგარეჯო), 3. დავით გეჯაძე (კასპი), 3. სოლომონ თედიაშვილი (საგარეჯო).
62 კგ. 1. შმაგი ლაგაზაური (ახმეტა), 2. ზვიად ოდოშაშვილი, 3. ვახტანგ ჩიდრაშვილი (ორივე - კასპი), 3. ილია ტყეშელაშვილი (ქუთაისი).
68 კგ. 1. ბექა ტუღუში (ფოთი), 2. მინდია ლილუაშვილი (ზესტაფონი), 3. კახა ცაგარელი (ყვარელი), 3. ლევან ჩუბინიძე (ზესტაფონი).
74 კგ. 1. კახა მამულაშვილი (კასპი), 2. ბესარიონ ბერულავა (ზუგდიდი), 3. ომარ ნიაზაშვილი (თბილისი), 3. ლევან ნახუცრიშვილი (მცხეთა).
82 კგ. 1. ლევან წიკლაური (დედოფლისწყარო), 2. ზაურ გაგნიძე (რუსთავი), 3. გიორგი გასიტაშვილი (გორი), 3. გიორგი გულიაშვილი (ყვარელი).
90 კგ. 1. დავით კარბელაშვილი (გორი), 2. პაატა ღვინიაშვილი (ქარელი), 3. გიორგი კობაიძე (თეთრიწყარო), 3. ნიკო კუცია (ფოთი).
100 კგ. 1. დავით ლორიაშვილი, 2. გიორგი ქავთარაძე (ორივე - გარდაბანი), 3. რეზო წულუკიძე (ბათუმი), 3. უშანგი გასიტაშვილი (გორი).
+100 კგ. 1. ბექა ბერძენიშვილი (ახალციხე), 2. გიორგი ზაქარიაძე (სამტრედია), 3. სლავა რეზესიძე (დმანისი), 3. ონისე ბუღაძე (საჩხერე).

გაბრიელ ბარჯაძე
ყოველდღიური სპორტული გაზეთი "ლელო"