როგორც იქნა, რაღაც პროგრესული ჭიდაობის გაერთიანებულ მსოფლიოს ფედერაციაშიც მოიფიქრეს - ამიერიდან მსოფლიოს ჩემპიონატი განთესვის პრინციპით ჩატარდება, ახალ წესს კი პირველად აგვისტოში, პარიზში გასამართავ პლანეტის პირველობაზე გამოსცდიან. განითესება რეიტინგის 4 საუკეთესო ფალავანი, თავად რეიტინგი კი ოლიმპიადაზე, ევროპის (აგრეთვე - სხვა კონტინენტების) შარშანდელ პირველობასა და 2016 წლის მსოფლიოს არაოლიმპიურ პირველობებზე ნაჩვენები შედეგებით შედგება (შარშან ოლიმპიურ წონებში მსოფლიოს პირველობა არ გამართულა). ძიუდოს მსგავსად, აქაც დასახელებულ ტურნირზე ყოველ ადგილზე გარკვეული ქულა დაირიცხება და საერთო ჯამით შედგება რეიტინგი.
მაგალითად, ოლიმპიადასა და მსოფლიოზე პირველი ადგილი 25
კონტინენტური პირველობების გამარჯვებული 12 ქულას მიიღებს, ვიცე-ჩემპიონი - 10-ს, მესამეპრიზიორები - 8-8-ს. აქ 8 საუკეთესოს გამოსვლა შეფასდება, ყველაზე ცოტა ქულა კი აქაც 2-ია.
თუმცა, ძიუდოსგან განსხვავებით, აქ ერთი დიდი უცნაურობაცაა - ქულათა დათვლისას მონაწილეთა რაოდენობასაც გაითვალისწინებენ და ცალკეული ადგილისთვის დაწესებულ ქულას ეს ციფრიც დაემატება. მაგალითად, არაოლიმპიური წონების მსოფლიოს პირველობაზე 70 კილოგრამში 40 მონაწილე გამოდიოდა და გამარჯვებული საჩემპიონო 25 ქულასთან ერთად კიდევ 40-ს მიიღებს, ანუ ჯამში 65 დაერიცხება.
ეს ქულები უშუალოდ სპორტსმენს ეწერება და არა - ეროვნულ ფედერაციას. თუ ისე მოხდება, რომ ნაკრების მთავარი მწვრთნელი მსოფლიოს ჩემპიონატზე განთესილი სპორტსმენის ნაცვლად სხვას წაიყვანს, შემცვლელი განთესვაში ვერ მოხვდება. მსოფლიოს ჩემპიონატზე განთესილებიდან ვინმე თუ არ იჭიდავებს, მის ადგილს რეიტინგში მომდევნო ადგილზე მყოფი დაიკავებს.
რეიტინგის პირველ-მეორე ნომრები ბადის აბსოლუტურად საპირისპირო მხარეს, ზედა და ქვედა ბოლოში განითესებიან, მესამე ფალავანი ბადის მეორე ნახევრის სათავეში მოხვდება, მეოთხე - პირველი ნახევრის ბოლოში. განთესილები ნახევარფინალამდე ვერ შეხვდებიან ერთმანეთს, ბადის ერთ მხარეს კი, ანუ ნახევარფინალში, პირველი-მეოთხე და მეორე-მესამე მოხვდებიან. განთესილი ოთხეული საკვალიფიკაციო ეტაპიდან გათავისუფლდება, ანუ ერთი შეხვედრით ნაკლებს ჩაატარებენ.
ჭიდაობაში რეიტინგი აქამდეც კეთდებოდა, თუმცა, იმდენად აბსურდული წესით, უმეტესად, ლოგიკას არ ექვემდებარებოდა.
ძალიან კარგია, რეიტინგს ასეთი მნიშვნელობა რომ მიეცა, თუმცა, იმედია, ექსპერიმენტი ერთწლიანი არ გამოდგება და სამომავლოდაც გაგრძელდება. თანაც, მსოფლიოს პირველობასთან ერთად ევროპის ჩემპიონატებსა და ოლიმპიადასაც მოიცავს, სხვა ტურნირებს თავი რომ დავანებოთ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
