ჩვენ უკვე ვწერდით მედიაში გაჟღერებულ მოსალოდნელ რეფორმებზე, რაც ვაჟებში წონითი კატეგორიების ერთით შემცირებას ეხებოდა, რომელიც პროექტი იყო და არა უკვე მიღებული გადაწყვეტილება. ამ საკითხთან დაკავშირებით მსოფლიოს პირველობის შემდეგ რუსულ მედიასთან იქაური ჭიდაობის ფედერაციის ვიცე-პრეზიდენტმა გიორგი ბრიუსოვმა ისაუბრა და საკითხში გარკვეული სიცხადე შეიტანა, თუმცა საბოლოოდ ჯერ კიდევ არაა გადაწყვეტილი.
"დღეს უკვე დიდი ალბათობით შეიძლება ითქვას, რომ წონითი კატეგორიები ბერძნულ-რომაულსა და თავისუფალ ჭიდაობებში განსხვავებული იქნება.
ორიენტაცია აღებულია იმაზე, რომ "თავისუფალში" წონები იყოს 57-სა და 130 კილოგრამს შორის, ბერძნულ-რომაულში - 60-სა და 135-ს
ტექნიკურ კომისიას მზად აქვს ახალი წონების პროექტი, რომელსაც ფილას მორიგ კონგრესზე განიხილავენ, მომავალი წლის სექტემბერში ტაშკენტში რომ გაიმართება" - განაცხადა ბრიუსოვმა.
ამდენად, მის სიტყვებზე დაყრდნობით შეიძლება ითქვას, რომ მინიმუმ, ერთი წელიწადი წონითი კატეგორიები აღარ შეიცვლება. თუ გავითვალისწინებთ, რომ გაისად, სექტემბერში ტაშკენტში, 8-14 სექტემბერს მსოფლიოს ჩემპიონატი იმართება, ისიც ძველი წონებით ჩატარდება.
ამდენად, ცვლილებები ძალაში 2015 წლიდან შევა, რადგან მეტი დრო არც ფილას რჩება - როგორც უკვე გაცნობეთ, სოკ-მა მას მკაცრი მითითება მისცა, რომ 2016 წელს, რიო დე ჟანეიროს ოლიმპიადაზე ქალებისა და ვაჟების წონითი კატეგორიები რაოდენობრივად უნდა გათანაბრდეს და 6-6 გახდეს.
არადა, სასურველი იყო, ასეთი მნიშვნელოვანი ცვლილება ძალაში ოლიმპიადამდე უფრო ადრე შესულიყო.
იმ თავდაპირველი პროექტით, რომელზეც ვწერდით, ორივე სახეობაში 60 კილოგრამი იკვეცებოდა, ბრიუსოვისეული ვერსიით კი, ის ბერძნულ-რომაულში რჩება. თუმცა ტაშკენტურ ტურნირამდე და სექტემბრამდე მთელი წელიწადი რჩება, იქამდე კი მოჭიდავეები რას შეცვლიან, მიდი და გაიგე.
ყოველდღიური სპორტული გაზეთი "ლელო"
