ახალგაზრდა მოჭიდავეთა მსოფლიოს ჩემპიონატი: ერთი ბრინჯაო და ამდენივე შანსი

ბრაზილიურ სალვადორში წუხელ ახალგაზრდა მოჭიდავეთა მსოფლიოს ჩემპიონატი დამთავრდა, რომელშიც ბოლო დღეებში თავისუფალი სტილით მოჭიდავეები გამოდიოდნენ.

ჩვენმა ნაკრებმა არცთუ წარმატებით იჭიდავა: შაბათს მხოლოდ ერთი ბრინჯაო მოიპოვა, წუხელ კი იმავე სინჯის მედლისთვის კიდევ ერთი იჭიდავებდა. მსოფლიოს პრიზიორი ტარზან მაისურაძე (74) გახდა, შანსს კი ავთანდილ კენჭაძე (66) ინარჩუნებდა.

მაისურაძე ახალგაზრდებში ევროპის შარშანდელი ჩემპიონია, წლეულს კი ბრინჯაო მოიპოვა. ბრაზილიაში მან პირველ შეხვედრაში ყაზახი იერკებულან ტილეუ 8:4 დაამარცხა, ბელორუს აბდულა ომაროვს კი 5:0 "აკმარა". ნახევარფინალში რუსთა მომავალ ჩემპიონ ჰაჯი ნაბიევთან 1:3 წააგო, თუმცა ეს ფრიად საკამათო შეხვედრა იყო. დასრულებამდე 4 წამით ადრე ანგრიში 1:1 იყო, თუმცა ეს ხელს ჩვენებურს აძლევდა, მაგრამ ბოლო გდება რუსს ჩაუთვალეს. სანუგეშოში მაისურაძემ ლატვიელი ალბერტ იურჩენკო 5:2 დაჯაბნა.

ევროპის წლევანდელ პირველობაზე ბრინჯაო მოიპოვა კენჭაძემაც, რომელმაც ახლაც მშვენიერი სტარტი აიღო - ირანელი ჯამალ ებადი მძიმე ბრძოლაში 7:6 დაამარცხა, ჰონდურასელ ლუის ბარიოსს კი ბევრად იოლად გაუსწორდა: ორჯერ ფეხში შესვლით ჩოქბჯენში გადაიყვანა, 4:0-ზე კი ბეჭებზეც დააწვინა. სამწუხაროდ, იაპონელთა მომავალ ფინალისტ იუჰი ფუჯიჰამისთან თვითონ აღმოჩნდა ამ მდგომარეობაში, თუმცა აზიელი მანამდეც ჯობდა. იაპონელი ბევრად უფრო მობილიზებული გავიდა ლეიბზე და კენჭაძეს შეტევის განხორციელების საშუალება არ მისცა. პირველი ორი ქულა მან ჩვენებურის წრიდან გაყვანისთვის მიიღო, მერე კი ასევე ორჯერ კარგად შევიდა ფეხში და ანგარიში 0:6 გახადა. ბოლო გდებას მოჰყვა ბეჭებზე დაწვენაც.

სანუგეშოში კენჭაძემ დიდი ანგარიშით - 11:1 დაჯაბნა კანადელი ომარ აჰმედი, ბრინჯაოსთვის შეხვედრას კი რუს ზაურბეკ სიდაკოვთან გამართავდა.

გუშინ ტურნირში ედემ ბოლქვაძეც (55) კარგად ჩაერთო და ალჟირელ აბდელაკ კერბხეს 10:2 სძლია, თუმცა მონღოლ ზანდანბუგ ზანაბაზართან 1:12 წააგო. ანგარიში ჩვენებურმა გახსნა, როცა მისი შეტევისას მეტოქე გარეთ გავიდა. ბოლქვაძე თითქმის მთელი პერიოდის განმავლობაში ინარჩუნებდა ამ ანგარიშს, თუმცა პერიოდის დასრულებამდე 30 წამით ადრე მონღოლმა ფეხში შესვლით გადაიყვანა და შესვენებაზეც დაწინაურებული გავიდა: 2:1. ამის შემდეგ ინიციატივა მთლიანად მან გადაიბარა - ხან ფეხიდან აიყვანა, ხან წელში შევიდა წარმატებით და ბოლოს ჩოქბჯენში დატრიალებებით ანგარიში ჩვენთვის კატასტროფული გახადა.

უმედლოდ დარჩა ჩვენი გუნდის კიდევ ერთი ლიდერი, ევროპის ასევე წლევანდელი ბრინჯაოსმედალოსანი გიორგი ჩხარტიშვილი (96). თუმცა მან ის მედალი 84 კილოგრამში მოიპოვა, ახლა კი 96-ში გამოვიდა. სამწუხაროდ, ექსპერიმენტმა არ გაამართლა და ის პირველივე წრეში წმინდად დამარცხდა ბრაზილიელ ჟონას სილვასთან.

ევროპის კიდევ ერთი წლევანდელი ბრინჯაოსმედალოსანი რობერტ დინგაშვილი (50) მეორე წრეში წმინდად დამარცხდა ამერიკელთა მომავალ ჩემპიონ ლეე სპენგერთან, მანამდე კი 9:3 მოუგო თურქ ბეკირ შაჰინთან. დამამშვიდებელში ის უკრაინელ რომან გუცულიაკთან 2:5 დამარცხდა.

ჩვენი სხვა მოჭიდავეებიდან სანუგეშო წრეში მხოლოდ ირაკლი მწითური (84) გადავიდა, რაც ირანელ მოჯტაბა გოლეისთან წმინდად დამარცხდა პირველივე წრეში. იქაც პირველივე პაექრობა დათმო აზერბაიჯანელ მაგომედრასულ გაზიმაგომედოვთან - 1:13.

ბრაზილიაში გიორგი სულავა (60) და ბექა კანდელაკიც (120) გამოდიოდნენ, მაგრამ პირველივე წრეში დამარცხდნენ.

(იბეჭდება მცირე ცვლილებით)
ყოველდღიური სპორტული გაზეთი "ლელო"