![](https://sportall.ge/pictures/image31/bac24bc2f6c741c9c764a88e1317cfa4.jpg)
მოჭიდავეთა საქართველოს ჩემპიონატის მეორე დღემ შედარებით შფოთიანად ჩაიარა - რამდენიმე შეხვედრაში იყო შეხლა-შემოხლა, გაჭიანურებული გარჩევებიც და ხანგრძლივად შეჩერებული ორთაბრძოლებიც, თუმცა საქმე სიტყვიერ დაპირისპირებას არ გასცდენია და არც სერიოზულ ინციდენტამდე მისულა. ორგანიზაციული დონე კვლავაც მაღალია და ჭიდაობის ფედერაცია აღებულ სიმაღლეს არ თმობს.
გუშინდელი საშეჯიბრებო დღის მთავარი ინტრიგა ორივე სტილით ჭიდაობაში მძიმე წონებს უკავშირდებოდა. "თავისუფლებში" ამ ინტრიგამ გაამართლა, "ბერძენ-რომაელებში" კი მოვლენები ნაცნობი სცენარით წარიმართა. გუშინვე სამი ძველი ლიდერის დაბრუნებაც შედგა - ბერძნულ-რომაულში რევაზ ლაშხმა (59),
ახლა ყველაფერი მათ ხელშია - ვნახოთ, როგორ გამოიყენებენ ამ შანსს საოლიმპიადოდ.
პეტრიაშვილი-მოძმანაშვილი
11 იანვარს ყველას ყურადღება უფრო მეტად "თავისუფლების" მძიმე წონისკენ იყო მიპყრობილი. ბედმაც ისე ინება, რომ სამივე მთავარი ფავორიტი ერთ მხარეს მოხვდა - ჯერ გენო პეტრიაშვილისა და გიორგი საკანდელიძის გზები იკვეთებოდა, ამათში მოგებულს კი ნახევარფინალში დავით მოძმანაშვილი ელოდა. პირველ წყვილში ბრძოლა არც ყოფილა - პეტრიაშვილმა ჩოქბჯენში ჩაყვანილი მეტოქე ფეხებით ჯვარედინ მოვლებაზე დაიჭირა და ერთი ამოსუნთქვით, რამდენიმე დატრიალებით სულ რაღაც 3:45 წუთში ანგარიში 11:0 გახადა.
ამასობაში მოძმანაშვილმა 4 წამით ნაკლებ დროში ასევე წმინდად, ოღონდ 12:1 იოლად დაამარცხა გიორგი ასლანიშვილი და ფავორიტები ერთმანეთის პირისპირ დადგნენ. შეხვედრა მოძმანაშვილის ყოველმხრივი უპირატესობით წარიმართა და თითქმის ყველა კომპონენტში აჯობა პეტრიაშვილს, რომელიც რატომღაც მოშვებული ჩანდა.
ეს შეხვედრა მცირე ინციდენტით დაიწყო, როცა მოძმანაშვილს თავის ჩამოქაჩვა ცოტა ზედმეტი მოუვიდა და გვარიანი ჩარტყმა გამოუვიდა და ასევე "ცხელი ფინიშით" დასრულდა. არ გამოვრიცხავთ, პეტრიაშვილზე ფსიქოლოგიურად იმ ჩარტყმის ეპიზოდმა იმოქმედა და კალაპოტიდან ამოაგდო. იქნებ ამიტომ ვერ იპოვა მან თავისი ჭიდაობა, მაგრამ მოძმანაშვილმაც უჩვეულო აღმავლობით ჩაატარა შეხვედრა. ამ პაექრობაში მას ყველაფერი გამოსდიოდა - თავიდანვე შემტევი სტილი აირჩია და უკვე 22-ე წამზე გადააგდო 2-ქულიანზე ფეხში შესვლიდან, რასაც მალე კიდევ ერთი ანალოგიური გდება დაუმატა: 4:0.
პეტრიაშვილს მონდომება არ აკლდა, მაგრამ კარგა ხანს რეალურ ილეთს ვერ ქმნიდა. ის ვერც ფეხში შედიოდა - მხოლოდ ერთხელ მიაღწია მიზანს, სხვა ყველა დანარჩენი მცდელობა კი მოძმანაშვილმა წარმატებით დაუხურა და იქით გადადიოდა კონტრშეტევაზე. პეტრიაშვილს შეხვედრის გადარჩენის შანსი პირველივე პერიოდში მიეცა, როცა მეტოქეს შეტევა დაუხურა და 2-ქულიანზე გადააგდო, თუმცა მანამდე ფეხი გადგა გარეთ.
მოძმანაშვილის მწვრთნელებმა სწორედ ეს ეპიზოდი გააპროტესტეს და ქულას იქით ითხოვდნენ წრიდან გასვლისთვის, მაგრამ ოლიმპიადაზე ლიცენზირებულმა სუპერვაზიერმა მსაჯმა ედიშერ მაჩაიძემ განმარტა წესებში ახლახან შეტანილი ცვლილება - თუ შემტევი გდებით ასრულებს ილეთს, მაშინ წრიდან გასვლისთვის არ ისჯება. ამიტომ მოძმანაშვილის პროტესტი არ დააკმაყოფილეს და ერთი ქულითაც დასაჯეს - 4:3 მის სასარგებლოდ.
მეორე პერიოდში უკვე მოძმანაშვილმა დაუხურა პეტრიაშვილს შესვლის მცდელობა და წრიდან გაიყვანა: 5:3, თუმცა მალევე პასიურობისთვის 30-წამიანი საჯარიმო დრო ჩაურთეს და ქულა ისევ დაკარგა: 5:4. გადამწყვეტი მომენტი ბოლო წუთზე დადგა, როცა პეტრიაშვილი ისევ შევიდა ფეხში და თითქოს გდებასაც არაფერი ედგა წინ, მაგრამ, პირიქით, მოძმანაშვილმა კონტრშეტევით იქით გადააგდო უზადო 4-ქულიანზე და სრულიად დამსახურებულად მოიგო - 9:5.
ფინალში ბადის მეორე ნახევრიდან გიორგი მეშვილდიშვილი ამოვიდა, რომელმაც ჯერ საკმაოდ პერსპექტიულ, თუმცა კი ძალზე ახალგაზრდა ზურაბ ურთაშვილს, ლევან გოგრიჭიანსა და ლაშა ჯელაძეს მოუგო. ფინალი დაძაბული კი გამოდგა, მაგრამ სანახაობრივი ნამდვილად არ ეთქმოდა. თუმცა ინტრიგა თავიდანვე დაებედა - მოძმანაშვილი პასიურობისთვის ქულით დასაჯეს.
საერთოდ, მომავალი ჩემპიონი ამ შეხვედრის დასაწყისში სულ სხვანაირად წარდგა მაყურებელთა წინაშე, აკლდა ის აღმაფრენა, ჟინი და სისწრაფე, რამაც პეტრიაშვილთან მოაგებინა, თუმცა ერთ მომენტში მაინც გამოავლინა ეს თვისებები, რამაც ფეხში შესვლა და 2-ქულიანი მომგებიანი გდება მოუტანა: 2:1. მოძმანაშვილმა გამოცდილების ხარჯზე შეინარჩუნა ეს ანგარიში, მეშვილდიშვილს კი ურიგო შთაბეჭდილება არ დაუტოვებია.
დავით მოძმანაშვილი: "მთლიანობაში, კმაყოფილი ვარ ჩემი გამოსვლით, ჩემპიონობა მაინც ჩემპიონობაა. თუმცა, ცხადია, ჭიდაობის ხარისხის მომატება შეიძლება. ამას დრო გვაჩვენებს, მეტი შრომაა საჭირო. მომავლის გეგმებზე ჯერ არ მინდა ლაპარაკი. სანამ საბოლოო შედეგი არ დადგება, მანამ ლაპარაკს რა აზრი აქვს!"
"ბერძენ-რომაელთა" მძიმე წონაში ისევ იაკობ ქაჯაიამ გაიმარჯვა, ვისაც ვერც ბექა კანდელაკი დაუდგა სათანადოდ, ვერც - არაბული ნახევარფინალში და ვერც - სანდრო დიხამინჯია ფინალში. სანახაობრივი ვერც ეს ფინალი გამოდგა - ქაჯაიამ 3:0 მოიგო, ქულები კი მეტოქის გაფრთხილებების და წრიდან გაყვანისთვის მიიღო.
ლიდერთა დაცემა
გუშინ ჩემპიონატში შარშანდელი სეზონის რამდენიმე ტრიუმფატორი დაეცა - "თავისუფლებში" ევროპული თამაშებისა და მსოფლიოს მესამეპრიზიორი სანდრო ამინაშვილი (86) პირველივე წრიდან გამოვარდა და მერე ვერც სანუგეშოში ივარგა, ოთარ გოგავამაც (57) დათმო ჩემპიონის ტიტული, ბერძნულ-რომაულში კი დამარცხდნენ მსოფლიოს პრიზიორი ლაშა გობაძე (80) და გოდერძი დავითაძე (59). ამინაშვილს ძირითად ბადეში ირაკლი მწითურმა მოუგო (სხვათა შორის, ორივე ემზარ ბედინეიშვილის მოსწავლეა), სანუგეშოში კი, ასევე პირველ წრეში, დრამატული პაექრობა დათმო ლევან მურადხანაშვილთან - დასრულებამდე 4 წამით ადრე 1:0 იგებდა, როცა მეტოქემ საბედისწერო 2-ქულიანი გდება გაუკეთა და 1:2 წააგო.
გობაძეს მომავალმა ჩემპიონმა ნიკა კელასოვმა აჯობა, დავითაძეს ბექა ბალანჩივაძემ მოუგო პირველივე წრეში, გოგავა კი ფინალში დამარცხდა ბექა ბუჯიაშვილთან.
მარსაგიშვილისა და ლაშხის დაბრუნება
ამ ორი ძველი ლიდერიდან დაბრუნება უფრო ეფექტური მარსაგიშვილს გამოუვიდა, ვინც გუშინაც ღრმად დაბინტული მხრით ჭიდაობდა. ამის მიუხედავად, ოთხივე პაექრობა წმინდად მოიგო, დგომშიც კარგად ირჯებოდა და ჩოქბჯენშიც იოლად ატრიალებდა მეტოქეებს. ![საქართველოს ჩემპიონატი ჭიდაობაში. II დღე: ლიდერების დაბრუნება Sportall.Ge](/pictures/artimages/image17/2a2fdf6a7d2bab78e352f79122ea0053.jpg)
ფოტოზე: დავით მარსაგიშვილი
მან მარადი ზოიძეს 10:0, გიორგი ჩხარტიშვილსა და ფინალში ირაკლი მწითურს ერთნაირი ანგარიშით, 11:0 აჯობა, გოჩა ლომთაძე კი ბეჭებზე დააწვინა.
ის ჯერ კიდევ არაა ფორმაში, აქვს ჯანმრთელობის პრობლემებიც, თუმცა მაინც თავისუფლად მოიგო ჩემპიონატი, სადაც "ოქროს წერტილი" დასვა, ფინალის მიწურულს მწითური ისეთ 4-ქულიანზე გადააგდო.
დავით მარსაგიშვილი: "დაბრუნება ძალიან გამიგრძელდა და ამ მომენტს მეც დიდხანს ველოდი. ხან ტრავმის, ხან ჩემი უყურადღებობის თუ რიგი სხვა მიზეზების გამო დაბრუნება ძალიან გადამედო. რაღაც ამოვვარდი კალაპოტიდან, ახლა კი მივედი იმ დასკვნამდე, რომ უნდა გაჩერდე და მიხედო იმ საქმეს, რასაც აქამდე აკეთებდი და - წარმატებითაც.
მონდომებული ვარ და ეს გამარჯვებაც ძალიან გამიხარდა. მგონი, ასე ევროპის ჩემპიონობა არ გამხარებია. თან ზაფხულში მხარი ვიტკინე და მას შემდეგ ლეიბზე არ მივარჯიშია. ამ ტრავმის გამო ვერც შეჯიბრებებზე წავედი სადმე, ეს პირველი ტურნირი იყო. მხარში რაღაც ხრტილია გაბზარული, თან ვვარჯიშობ და თან - ვმკურნალობ. რაღაც პერიოდი არც ვაპირებდი ჭიდაობას, მაგრამ მაინც გამოვედი და მოვიგე.
ოლიმპიური წელიწადია და ეს დიდი სტიმული იყო. ძალიან საპასუხისმგებლო სეზონია და ვნახოთ, წინ ევროპის ჩემპიონატია".
ოლიმპიადის ვიცე და ევროპის ჩემპიონი ლაშხი 66-დან მართლაც 59 კილოგრამში მოგვევლინა. როგორც თავად გვითხრა, წონა არ ჰყოფნიდა და ამიტომ ამჯობინა ქვევით ჩამონაცვლება. მას ბევრი ქულა არ მოუპოვებია და ისევ ძალისმიერად, ძირითადად, ხელების დაკავებით და ტაქტიკურად ჭიდაობდა, თუმცა ფინალში ტექნიკურად წარმართა პაექრობა და წმინდად მოიგო.
წინასწარ ბრძოლებში მან გიორგი ჯანელიძეს, ხვიჩა ჭითავას და მურად მიქელაძეს აჯობა, ფინალში კი წმინდად მოუგო ირაკლი შავაძეს.
რევაზ ლაშხი: "სამწლიანი პაუზის მიუხედავად, ნორმალურად გამოვედი. კონკურენციაც იყო - ოლიმპიური სეზონია და ყველა მონდომებულია. საბოლოოდ გადავწყვიტე, რომ ამ წონაში დავრჩე და, ვფიქრობ, ოლიმპიური ლიცენზიაც აქ მოვიპოვო. ვნახოთ - ჯერ საგზური და მერე - დანარჩენი".
![საქართველოს ჩემპიონატი ჭიდაობაში. II დღე: ლიდერების დაბრუნება Sportall.Ge](/pictures/artimages/image17/0987efeba451d5ec69208904233ade2d.jpg)
ფოტოზე: რევაზ ლაშხი
ახალბედები
საბედნიეროდ, ახალი სახეების წარმოჩენის გარეშე არც ამ დღეს ჩაუვლია. უპირველესად, ბათუმელ რამინ მუთიძეს (57) დავასახელებთ, ვინც საერთოდ უცნობია ჭიდაობის ქომაგებისთვის - ის აქამდე ასაკობრივ გუნდებშიც არ ჩანდა, თუმცა ახლა ამას ხელი არ შეუშლია, საკმაოდ დამაჯერებლად ეჭიდავა. არც ვალერი კვარაცხელიას (80) იცნობდა ფართო საზოგადოება; პირველად გახდა ქვეყნის ჩემპიონი კელასოვიც; ბუჯიაშვილმაც მიიღო კუთვნილი დივიდენდი, ხოლო მეშვილდიშვილზე უკვე ვთქვით; ურთაშვილმაც კარგად იასპარეზა, კარგად გამოვიდა ახალგაზრდებში ევროპის ჩემპიონი ირაკლი შავაძეც (59).
თუმცა განსაკუთრებულად მაინც მწითურს გამოვარჩევთ 86 კილოგრამში - სწორედ მან დაამარცხა ამინაშვილი, მერე კი მურადხანაშვილსაც აჯობა, ახალგაზრდებში მსოფლიოს ვიცე-ჩემპიონ თედორე ებანოიძესაც და ნახევარფინალში - ნოდარ ეგაძესაც. თუმცა ეს ბოლო ძალიან დაძაბული ორთაბრძოლა იყო, რომლის ცალკეული ეპიზოდებიც დიდხანს ირჩეოდა, შეხვედრა კი 5:5 დასრულდა, თუმცა მწითურს უფრო მაღალი სინჯის გდებები ჰქონდა და მოიგო.
ფინალში მას მარსაგიშვილმა კლასითაც აჯობა, მაგრამ უფრო გამოცდილებით დაჩაგრა.
ამავე წონაში უაღრესად დაძაბული გამოდგა ბრინჯაოსთვის პაექრობა მარადი ზოიძესა და ჩხარტიშვილს შორის - ზოიძემ ძალიან ეფექტურად გაუგრძელა შეტევა და 4-ქულიანზე გადააგდო. ერთი ხანობა 6:3 იგებდა, მაგრამ ჩხარტიშვილი არ გატყდა და ანგარიში გააყაიმა. ამ დროს ზოიძე დაღლილი იყო, მაგრამ უკანასკნელი ძალები მოიკრიბა და მომგებიანი 2-ქულიანი გდება მაინც მიითვალა - 8:6.
ჩემპიონატი სპორტის ახალ სასახლეში დღეს, 12 იანვარს დასრულდება.
თავისუფალი ჭიდაობა
57 კგ
1. ბექა ბუჯიაშვილი (გორი)
2. ოთარ გოგავა (ხონი, ომეც)
3. რამინ მუთიძე (აჭარა) ლაშა ტალახაძე (ხაშური).
86 კგ
1. დავით მარსაგიშვილი (ყაზბეგი)
2. ირაკლი მწითური (თბილისი)
3. ნოდარ ეგაძე (გორი) მარადი ზოიძე (აჭარა).
125 კგ
1. დავით მოძმანაშვილი (თბილისი)
2. გიორგი მეშვილდიშვილი (ონი, ომეც)
3. გენო პეტრიაშვილი (გორი), ზურაბ ურთაშვილი (მცხეთა, ომეც)
ბერძნულ-რომაული ჭიდაობა
59 კგ
1. რევაზ ლაშხი (თბილისი)
2. ირაკლი შავაძე (აჭარა)
3. მურად მიქელაძე, რამაზ სურმანიძე (ორივე - აჭარა).
80 კგ
1. ნიკოლოზ კელასოვი (აჭარა, ომეც)
2. თორნიკე ძამაშვილი (გარდაბანი)
3. ლაშა გობაძე (აჭარა), ვარლამ კვარაცხელია (ხობი).
130 კგ
1. იაკობ ქაჯაია (წყალტუბო)
2. სანდრო დიხამინჯია (თბილისი)
3. ლევან არაბული (მცხეთა, ომეც), შოთა გოგისვანიძე (ქუთაისი).
(იბეჭდება მცირე ცვლილებით)
ყოველდღიური სპორტული გაზეთი "ლელო"