მსოფლიოს ახალგაზრდული ჩემპიონატი: დღეს ქართველი ძიუდოისტები გამოვლენ

დღეს ბაჰამის კუნძულების დედაქალაქ ნასაუში ახალგაზრდა ძიუდოისტთა ინდივიდუალური და გუნდური მსოფლიოს ჩემპიონატი იწყება, რომელშიც საქართველოდან 10 ბიჭი და 4 გოგონა მიიღებს მონაწილეობას. ბიჭებში ამჯერადაც გამოვტოვებთ 73 კილოგრამს.

დღეს გოგონებში 44-48, ბიჭებში კი 55-60 კილოგრამების ფალავნები იჭიდავებენ.

ხვალ, შესაბამისად, 52-57 და 66-73; 19 - 63-70 და 81-90, ხოლო 20 ოქტომბერს 78-+78 და 100-+100 კილოგრამების ფალავნები ეცდებიან მედლების მოპოვებას.

ჩემპიონატის დასკვნითი დღე, 21 ოქტომბერი გუნდურ პირველობას დაეთმობა, რომელიც ისევ შერეული პრინციპით ტარდება, ანუ გოგონების და ბიჭების გაერთიანებული გუნდები იასპარეზებენ.

ძალიან არ გაუმართლა 55 კილოგრამში ჩვენს ერთადერთ მონაწილეს, ჭაბუკებში მსოფლიოს პრიზიორ ვანო ხუბაშვილს, რადგან პირველივე წრეში მეტოქედ იაპონელი ჰაიატე ჰანდა ერგო. ამათში მოგებულს მეორე წრეში თურქი ოგუჟან ოზისიკი ელოდება.

ამჯერად 60 კილოგრამში იასპარეზებს ახალგაზრდებში მსოფლიოს შარშანდელი ჩემპიონი ჯაბა პაპინაშვილი, რომელმაც შარშან 55-ში მოიპოვა ეს ტიტული, ამ წონაში კი წლეულს ევროპის პრიზიორი გახდა. ის პირველ წრეში ამერიკელ ენტონი ბრედს შეხვდება, მოგების შემთხვევაში კი არგენტინელ კარლოს მალდონადოს გაეჯიბრება.

ამ წონაში თემურ ნოზაძეც გვყავს, ვინც მეორე წრიდან ჩაებმება შეჯიბრებაში, სადაც კოლუმბიელ კრისტიან იბარბოს დაეჭიდება.

დიდად არც ევროპის კიდევ ერთ წლევანდელ ბრინჯაოსმედალოსან ბაგრატ ნინიაშვილს (66) გაუმართლა (ის ახალგაზრდებში მსოფლიოს შარშანდელი მესამეპრიზიორია) - პირველ წრეში ბრაზილიელი ვილიან ლიმა. მას თუ მოუგებს, მერე, დიდი ალბათობით, იაპონელი იუჯი აიდა.

81 კილოგრამში ორი მონაწილე გვყავს, რომლებმაც წლეულს ევროპირველობაზე ფინალში იჭიდავეს: ჩემპიონი ლუკა მაისურაძე და ვიცე-ჩემპიონი ტატო გრიგალაშვილი. ისინიც მეზობელ ჯგუფებში განლაგდნენ, ანუ, საუკეთესო შემთხვევაში, მათი გზები ნახევარფინალში იკვეთება. თუმცა იქამდე მისასვლელად ორივეს დიდი ომი ელოდება.

გრიგალაშვილი ჯგუფში იაპონელ ჰირომასა კასაჰარასთან მოხვდა, თუმცა მას მეოთხედფინალამდე არ შეხვდება. ახალგაზრდებში მსოფლიოს შარშანდელი მესამეპრიზიორი გრიგალაშვილი მეორე წრიდან იწყებს გამოსვლას, სადაც ჰოლანდიელი კოენ ვან ვინდენის ძლევას შეეცდება.

მაისურაძეც მეორე წრიდან ჩაებმება შეჯიბრებაში, სადაც მეტოქედ მექსიკელი ფროკერ ტინტოსის ძლევას შეეცდება, ხოლო მომდევნო წრეში გასვლისას სავარაუდო მეტოქედ აზერბაიჯანელთა ევროპის წლევანდელი მესამეპრიზიორი მურად ფატიევიც ჰყავს, ვისაც ევროპაზე ნახევარფინალში გრიგალაშვილმა მოუგო.

90-ში ლაშა ბექაურიც იაპონელთან - კოსუკე მაშიამასთან გამწესდა ჯგუფში, თუმცა მას მეოთხედფინალამდე არ ხვდება. ჩვენებური ჯერ კანადელ ბენჯამინ კენდრიცკის დაეჭიდება, მოგების შემთხვევაში კი - ლატვიელ ემილს გერკენსს ან სლოვაკ დენის ტურაცკს.

ჩვენს ნაკრებში მესამე გაორებული წონა 100 კილოგრამია. ევროპის მოქმედი ჩემპიონი ონისე სანებლიძე თავიდან ისვენებს, მისი მეტოქე კი აზერბაიჯანელი ევროპის წლევანდელი ბრინჯაოსმედალოსანი ადილ კარიმლისა და გერმანელ ივო ვიტასეკს შორის მოგებული იქნება.

შეგახსენებთ, რომ სანებლიძემ კარიმლის ევროპირველობაზე მეოთხედფინალში მოუგო.
ამ წონაში ზაურ კენჭაძეც მეორე წრეში იჭიდავებს, სადაც გერმანელთა ევროპის წლევანდელ მესამეპრიზიორ დანიელ ზორნს შეხვდება - სანებლიძემ ევროპაზე მასაც მოუგო ნახევარფინალში.

მძიმე წონაში ევროპის კიდევ ერთი მოქმედი ჩემპიონი - გელა ზაალიშვილიც რთულ ბადეშია - პირველ წრეში კი ისვენებს, მაგრამ მისი მეტოქე იაპონელ ტაცურო საიტოსა და მონღოლ ცეცეცენგელ ოდხუუს პაექრობაში გამოვლინდება. ზაალიშვილმა ეს ბარიერი თუ გაიარა, მერე ნახევარფინალში გასვლა არ უნდა გაუჭირდეს.

გოგონებში ნატალია ყიფშიძე (48) პირველ წრეში ყაზახ აკმარალ ნაუატბეკს ხვდება. მეორე წრეში თუ გავიდა, არც მეტი, არც ნაკლები, დიდი ალბათობით, იქ თვით უფროსებში მსოფლიოს ახალთახალ და ყველაზე ახალგაზრდა ჩემპიონს, უკრაინელ დარია ბილოდიდს შეხვდება!

ევროპის ვიცე-ჩემპიონი ეთერ ლიპარტელიანი (57) პირველ წრეში საკმაოდ ძლიერ ხორვატს, 20 და 23-წლიანებში ევროპის მესამეპრიზიორ ტიეა ტოპოლოვეჩს დაეჭიდება, მეორე წრეში გასვლისას კი - ბრიტანელთა ევროპის შარშანდელ ვიცე-ჩემპიონ ალესია ტოპრაკსა და გერმანელ იანა ზიგლერს შორის უძლიერესს.

ევროპის პრიზიორი მარიამ ჭანტურია (70) თავდაპირველად ამერიკელ ჯულია სიმონიანს დაეჭიდება, ამათში მოგებულს კი ბრაზილიელი ელენ სანტანა ელოდება. ჩვენებურს ნახევარფინალში გასვლის კარგი შანსი აქვს.

დაბოლოს, ევროპის კიდევ ერთი წლევანდელი მესამეპრიზიორი სოფიო სომხიშვილი (+78), ვინც მაინცდამაინც იაპონელ ჰიკარუ კოდამასთან მოხვდა, მსოფლიოს შარშანდელ ფინალისტთან. თუმცა მანამდე ავსტრიელი მარია ჰოლვარტი უნდა დაამარცხოს.

შეჯიბრი ჩვენი დროით 19:00 საათზე დაიწყება.

(იბეჭდება მცირე ცვლილებით)
ყოველდღიური სპორტული გაზეთი "ლელო"