ყაზახეთიდან საფრანგეთში - "გრენობლმა" ჯაბა ჯიღაური წარადგინა

"გრენობლმა" საქართველოს ნაკრების ნახევარმცველი ჯაბა ჯიღაური წარადგინა. 26 წლის ფეხბურთელის ტრანსფერი SmartBall Sports Management-მა განახორციელა.

Sportall.ge დეტალების გასარკვევად სწორედ აღნიშნული სააგენტოს ერთ-ერთ დამფუძნებელ მიხეილ ხუციშვილს დაუკავშირდა.

მისი თქმით, ჯიღაურმა თავის ყოფილ კლუბ "ორდაბასთან" კონტრატი გაწყვიტა და ახალ გუნდსაც თავისუფალი აგენტის სტატუსით მიაშურა.

ხუციშვილმა ასევე გვაცნობა, რომ ჯაბამ "გრენობლთან" 2-წლიანი შრომითი ხელშეკრულება გააფორმა.

ქართველი ნახევარმცველი ბოლოს ყაზახეთის "ორდაბასში" ასპარეზობდა, იქამდე კი მაკედონიური "ვარდარის" ღირსებას იცავდა.

რაც შეეხება "გრენობლს", გასულ სეზონში ის საფრანგეთის მე-3 ლიგაში თამაშობდა, თუმცა მე-2 ლიგის საგზური მოიპოვა და მომდევნო წელს ერთით მაღალ დივიზიონში გაატარებს.