
ყაზახეთის პრემიერლიგის მე-13 ტურში "ტობოლმა" სტუმრად ყარაგანდის "შახტიორს" 3:0 სძლია. შეხვედრას საბოლოო წერტილი საქართველოს ნაკრების თავდამსხმელმა ელგუჯა ლობჯანიძემ დაუსვა.
ლობჯანიძე შეხვედრაში 63-ე წუთზე ჩაერთო, გოლი კი 81-ზე გაიტანა. ქართველმა შემტევმა ჯერ ართმევაზე ითამაშა კარგად, შემდეგ ფლანგიდან საჯარიმოში შეიჭრა და დარტყმაც მშვენიერი, შორეულ კუთხეში გამოუვიდა. ეს მიმდინარე სეზონში მისი მეორე გოლია.
ქართველი ფეხბურთელის კლუბს ჩემპიონატში წარმატებული სერია აქვს. მათ სულ ერთი მარცხი განიცადეს და მხოლოდ "ასტანას" ჩამორჩებიან. "ტობოლი" უახლოეს შეხვედრაში 29 მაისს, "აქტობეს" უმასპინძლებს. ყაზახეთის ჩემპიონატში შესვენება ხუთი ივლისიდან ცხადდება.