სფფ-ის საპრეზიდენტო არჩევნები: რაჭაშიც პროტესტია!

რაჭა-ლეჩხუმ-ქვემო სვანეთის რეგიონული ფედერაციის აღმასკომის ოთხი წევრი დელეგატად გია გილიგაშვილის წარდგენას აპროტესტებს
გუშინ, საქართველოს ფეხბურთის ფედერაციის აღმასკომში შევიდა რაჭა-ლეჩხუმ-ქვემო სვანეთის რეგიონული ფეხბურთის ფედერაციის აღმასკომის 4 წევრის - პორფირე კოპალიანის, დავით ქემოკლიძის, რომან კირვალიძისა და ზურაბ ლიპარტელიანის წერილი.

ამ რეგიონული ფედერაციის აღმასკომში 7 წევრია და თუ მის სხდომას ნახევარზე მეტი არ ესწრება, წესდების თანახმად, აღმასკომს საკითხის განხილვისა და გადაწყვეტილებების მიღების უფლება არ აქვს.

ზემო ხსენებული ოთხეულის მტკიცებით, სწორედ ასე მოხდა და ამიტომ, სფფ-ის ყრილობაზე რეგიონული ფედერაციას დელეგატად გია გილიგაშვილის წარდგენა გააპროტესტეს.

შეგახსენებთ, რომ ანალოგიური წერილი მანამდე სფფ-ის აღმასკომში გურიის რეგიონული ფედერაციის აღმასკომის 4-მა წევრმა გაგზავნა. საფეხბურთო დავების განმხილველმა სპორტულმა ტრიბუნალმა სფფ-ის აღმასკომის 2015 წლის 7 სექტემბრის გადაწყვეტილების ის ნაწილი გააუქმა, ყრილობაზე გურიის დელეგატად გოჩა ტყებუჩავა რომ დაამტკიცეს.

ვნახოთ, რა მოხდება რაჭველების პროტესტის შემთხვევაში...

ყოველდღიური სპორტული გაზეთი "ლელო"