18 წ. | საფრანგეთისა და ექვსი ერისთვის მზადება გრძელდება

საქართველოს 18-წლამდელთა ნაკრების 45-კაციანი გაფართოებული შემადგენლობა, ორშაბათს საღამოს "შევარდენის" სანაკრებო ბაზაზე შეიკრიბა და სამშაბათიდან 2025 წლის ექვსი ერის ფესტივალისთვის მზადებას შეუდგა.

გასული ერთი კვირა ზურაბ ამონაშვილის შეგირდებმა მარტყოფის ბაზაზე გაატარეს, სადაც შაბათს ორმხრივი თამაში გაიმართა. ამ კვირაში 18-წლამდელები ამხანაგურ თამაშს 20-წლამდელების წინააღმდეგ გამართავენ, უშუალოდ ექვსი ერის ფესტივალზე გამგზავრებამდე კი, თბილისში, "ავჭალაზე" ფრანგ თანატოლებს შეერკინებიან. შეხვედრა 29 მარტს 16 საათზე დაიწყება და გულშემატკივარს "უმცროსი ბორჯღალოსნების" გაცილების შესაძლებლობა ექნებათ.

ზურაბ ამონაშვილის რჩეულთა შორის 6 ლეგიონერია. 4 მათგანი ფრანგულ, ორი კი ინგლისურ კლუბს წარმოადგენს. 45 მოთამაშიდან 18 2008 წელსაა დაბადებული და მათ 18-წლამდელთა ნაკრებში თამაში გაისადაც უწევთ. საფრანგეთთან თამაშამდე გუნდს კიდევ ორი ლეგიონერი დაემატება - "ტულონის" მეორეხაზელი, 18-წლამდელთა კაპიტანი დავით ბარამია და "მონპელიეს" მეორეხაზელი ნიკოლოზ ჩხორთოლია. ისინი თბილისში 25 მარტს ჩამოვლენ.

გუნდის მთავარი მწვრთნელი ზურაბ ამონაშვილი მზადების პროცესისა და შემადგენლობის შესახებ გვიყვება:

"მოთამაშეების ძირითადი ნაწილი ჭაბუკთა ა ლიგის ქვედა ასაკიდან გვყავს და ჩვენი მზადების პროცესიც მათ განრიგზეა მორგებული. თებერვლის ბოლოს, როდესაც 20-წლამდელები სამხრეთ აფრიკასთან საერთაშორისო სერიის თამაშებს მართავდნენ და ა ლიგა ისვენებდა, 4-დღიანი შეკრება გვქონდა ქუთაისში, მაგრამ მეტეოროლოგიური პირობების გამო შეკრება ფაქტობრივად ჩაგვივარდა. თოვლის გამო გუნდი ვერცერთხელ გავიდა მოედანზე და მხოლოდ დარბაზში ვარჯიშით თეორიული სწავლებებით შემოვიფარგლეთ. შეკრების ბოლო დღეს ქუთაისიდან თბილისში მოგვიწია ჩამოსვლა ერთმანეთში რომ გვეთამაშა".

„ა ლიგის ფინალის შემდეგ ბიჭებს ერთი დღით დასვენების შესაძლებლობა მივეცით და 11 მარტიდან დავიწყეთ მზადება მარტყოფის ბაზაზე, სადაც შაბათს ორმხრივი თამაში გვქონდა. ამ ეტაპზე 45 კანდიდატი გვყავს, რომლებსაც 25 მარტს კიდევ ორი ლეგიონერი დავით ბარამია და ნიკოლოზ ჩხორთოლია დაემატება. ისინი საფრანგეთთან მატჩისთვის უკვე ჩვენთან ერთად იქნებიან.

გაფართოებულ შემადგენლობაში არიან, უკვე ჩვენთან ერთად ვარჯიშობენ და ვაკვირდებით ლეგიონერებს საფრანგეთიდან, რომლებიც იქ არიან დაბადებული, ან ძალიან პატარები იყვნენ, როდესაც საფრანგეთში წავიდნენ. მაქსიმალურად ვცდილობთ, რომ გავამარტივოთ ჩვენი სათამაშო სისტემა და ბიჭებს ინფორმაციას ეტაპობრივად ვაწვდით, რათა გაუადვილდეთ მათი ათვისება. შაბათს გვქონდა ორმხრივი თამაში, რომელმაც მოთამაშეების ფორმაზე წარმოდგენა შეგვიქმნა.

ორშაბათს საღამოს უკვე "შევარდენზე" შევიკრიბებით და იქ გავაგრძელებთ მზადებას. საფრანგეთთან შეხვედრამდე გვექნება ამხანაგური თამაში საქართველოს 20-წლამდელთა ნაკრებთან, რომელიც ძალიან დაგვეხმარება. გარდა იმისა, რომ ვნახავთ რა დონეზე ვართ, გვექნება სელექცია საფრანგეთის ნაკრებისთვის. საფრანგეთი 26 კაცით ჩამოდის და ჩვენც 26 მოთამაშე გვეყოლება განაცხადში, ზუსტად ისე, როგორც ექვსი ერის ფესტივალის ფორმატია.

რაც შეეხება საფრანგეთს, მათ ყოველთვის გამორჩეული გუნდი ჰყავთ. ვიცით, რომ ისინი უკვე შეკრებილები არიან "მარკუსის" ბაზაზე და ემზადებიან ჩვენთან თამაშისთვის. ეს არის ჩვენთვის შესაძლებლობა, კარგად მოვემზადოთ ექვსი ერის ფესტივალისთვის. გარდა ამისა, არაერთხელ მითქვამს, რომ 18-წლამდელთა ნაკრები განვითარების ეტაპია და მნიშვნელოვანია ასეთი დონის გუნდებთან შეხვედრა. ბევრი მოთამაშისთვის საფრანგეთთან თამაში იქნება პირველი შეხება საერთაშორისო დონესთან და ექვსი ერის ფესტივალზე ჩასვლამდე მათ ექნებათ წარმოდგენა რა დონის მეტოქეებთან მოგვიწევს თამაში. ვფიქრობ, მთავარი გამოწვევა მაღალ ტემპთან ადაპტაცია იქნება, რადგან, სამწუხაროდ, ჩვენს ჩემპიონატში თამაშის ტემპი ძალიან დაბალია და 2 კვირაში მოგვიწევს მასთან ადპტაცია.

ასაკობრივი ნაკრები ყოველთვის სპეციფიურია და წელს არ გვყავს ისეთი მასიური ბიჭები, როგორიც შარშან გვყავდა. გაფართოებულ შემადგენლობაში 5 ისეთი მოთამაშეა, რომელმაც ექვსი ერის ფესტივალზე შარშანაც ითამაშა, კიდევ 9-მ კი 18-წლამდელთა რაგბი ევროპის ჩემპიონატზე მიიღო გამოცდილება".

ექვსი ერის ფესტივალს საფრანგეთი უმასპინძლებს

"უმცროსი ბორჯღალოსნები" 7 აპრილს საფრანგეთში გაემგზავრებიან და საკურორტო ქალაქ ვიშში ექვსი ერის ფესტივალზე ითამაშებენ.

ფესტივალში საქართველოსა და ექვსი ერის ქვეყნებთან (ინგლისი, საფრანგეთი, ირლანდია, უელსი, შოტლანდია, იტალია) ერთად, წელს პორტუგალიის ნაცვლად ესპანეთი ითამაშებს.

საქართველომ 18-წლამდელთა ექვსი ერის ფესტივალზე პირველად შარშან ითამაშა და ერთი თამაში მოიგო - საფრანგეთთან 20:19, შოტლანდიას (14:22) და ინგლისს (19:26) კი მცირედით ჩამორჩა.

წლევანდელი ფესტივალი 10 აპრილს საქართველოსა და იტალიის მატჩით გაიხსნება; 14 აპრილს უელსს ვეთამაშებით; 18 აპრილს კი ირლანდიას ვერკინებით.

2025 წლის ექვსი ერის ფესტივალისთვის ემზადებიან

ნიკოლოზ ტორაძე (რუენი, საფრანგეთი), საბა გოგრიჭიანი (ლოკომოტივი), ნიკოლოზ ბალანჩივაძე (ოიონა, საფრანგეთი), მინდია ხორავა (ორიაკი, საფრანგეთი), შოთა გვრიტიშვილი (ლელო), საბა ჯიბღაშვილი (ლელო), ირაკლი ყოლბაია (ლელო), გიორგი გაბუნია (ლელო), ნიკა ხოშტარია (ფოთი), დავით ხურციძე (ლელო), ლუკა ჭაკუა (ფოთი), ნიკა მიქაძე (ლელო), გოგა ბერიძე (ბათუმი), მათე მახარაძე (ბათუმი), ლუკა შულაია (ლელო), მათე ბერუაშვილი (ლოკომოტივი), ლუკა ტაბატაძე (არმია), ბექა წამალაიძე (არმია), საბა გიორგიძე (ლელო), ნიკა ხაფავა (ყოჩები), გიორგი არძენაძე (ბათუმი), გიორგი ზაზაძე (ხარები), თაზო მეიფარიანი (აია), გაბრიელ ჩიქოვანი (რაშები), ნიკა ფანცულაია (არმია), ტატო ტალახაძე (აია), საბა მერებაშვილი (ლელო), გაბრიელ რაზმაძე (ორიაკი, საფრანგეთი), ლევან ბუცხრიკიძე (ლელო), რეზო მათიაშვილი (ყოჩები), ნიკა თექთურმანიძე (ხვამლი), სანდრო გამყრელიძე (აკადემია), გიორგი ხონელიძე (ლელო), დემეტრე დევდარიანი (სენტ მერი, ინგლისი), გივი ჩიხლაძე (აია), ოთარ ელიაშვილი (გორი), იოსებ ღვინჯილია (ლელო), გოგა უშვერიძე (აია), დატა ახვლედიანი (ლელო), ანდრია ბილანიშვილი (ინგლისი), დავით არობელიძე (არმია), საბა მშვილდაძე (აია), ავთანდილ ზვიადაძე (აია), გიორგი კეკელია (ლოკომოტივი), ლუკა ბერძენიშვილი (ლელო).

მთავარი მწვრთნელი: ზურა ამონაშვილი