ევრო 2016. C ჯგუფი. უკრაინა-პოლონეთი: კუბას გოლი და რანდევუ შვეიცარიასთან [VIDEO]

* უკრაინამ ტურნირი ისე დაასრულა, რომ გოლი ვერ გაიტანა, პოლონეთს კი ჯერ არ გაუშვია.
* პოლონელებს ბოლო 6 მატჩიდან 5-ში გოლი არ გაუშვიათ.
* ევროპის ჩემპიონატის ფინალურ ეტაპამდე უკრაინელებს 13 მატჩიდან მხოლოდ ერთი ჰქონდათ წაგებული (ესპანეთთან 0:1), ჯგუფურ ეტაპზე კი სამივე შეხვედრა დათმეს.
* პოლონეთს უკრაინა წინა ხუთი მატჩის განმავლობაში არ დაემარცხებინა.
* ევროპის ჩემპიონატის ჯუფური ეტაპის გოლგაუშვებლად გავლა პირველად 1980 წელს იტალიამ მოახერხა, 1996 წელს ეს გერმანიამ გაიმეორა და ახლა ერთ ჯგუფში ერთბაშად ორმა გუნდმა შეძლო იგივე, პოლონეთმა და

იმავე გერმანიამ.

პოლონეთმა ძალების დაზოგვით მოიგო, მაგრამ იმ ანგარიშით ვერა, რომელიც პირველ ადგილზე გაიყვანდა. ადამ ნავალკას ნაკრებს ბურთების სხვაობით გერმანიამ აჯობა. ეს კი იმას ნიშნავს, რომ მერვედფინალში პოლონელები შვეიცარიას დაუპირისპირდებიან და ეს ერთ-ერთი ყველაზე დაძაბული, საინტერესო და თანაბარი წყვილი იქნება. მატჩი შაბათს, 17:00 საათზე, სენტ ეტიენში, "ჟოფრუა გიშარზე" გაიმართება.

უკრაინამ კი, მოულოდნელად, ძალიან უსახური თამაშით დაგვამახსოვრა თავი და ისე დაგვემშვიდობა, რომ ერთი გოლიც ვერ დაგვიტოვა. თუმცა პრობლემებთან ერთად, ეს უიღბლობის ბრალიც გახლდათ, რადგან თუნდაც გერმანიასთან მატჩში უკრაინელებს მომენტები ჰქონდათ, მაგრამ ვერ გამოიყენეს.

პრინციპში, ორივე გუნდი საბრძოლო შემადგენლობით გამოვიდა. სხვაობა ის გახლდათ, რომ უკრაინისთვის უბრალოდ პრესტიჟისა და ღირსების საკითხი გახლდათ, რადგან სხვა დატვირთვა მიხაილო ფომენკოს ნაკრებისთვის ამ მატჩს არ ჰქონდა, უკრაინა ორი ტურის მერე უშანსოდ დარჩა. ფომენკომ ბოლო დროს ყველაზე პოპულარული სქემა, 4-2-3-1 აირჩია. ფლანგებზე, ცხადია, იარმოლენკო და კონოპლიანკა აქტიურობდნენ, წინ კი ზოზულია ელოდა თავის შანსს.

ადამ ნავალკამ იაკუბ ბლაშჩიკოვსკი, კამილ გროსიცკი და ლუკას პიშჩეკი დასვა სათადარიგოთა სკამზე. პირველი ორი მოგვიანებით გამოიყვანა, პიშჩეკი კი დაასვენა. მან ისევ ძირითადში დააყენა ახალგაზრდა ტალანტი ბარტოშ კაპუსტკა. მისი და მის უკრაინელი თანატოლის, ასევე 19 წლის და ასევე აქტიური ზინჩენკოს დაპირისპირება საინტერესო გახლდათ. რასაკვირველია, იქვე იყვნენ არკადიუშ მილიკი და რობერტ ლევანდოვსკი. პოლონელებმა შემდეგი სტრატეგია აირჩიეს - თუ გამოგვივა და მოვიგებთ, ხომ კარგი, მაგრამ თავს ძალიანაც ნუ მოვიკლავთო.

ასეა თუ ისე, როდესაც ნავალკამ დაინახა, რომ მის გუნდს თამაში ცოტათი აერია და ფლანგებიც ჩვეულად ვერ აქტიურობდნენ, უმალვე ქირურგიულ ჩარევას მიმართა და შესვენების მერე მინდორზე იაკუბ ბლაშჩიკოვსკი გამოიყვანა. კუბას გამოცდილებამ და კლასმაც თავისი გაიტანა.

0:1 - 54-ე წუთზე პოლონელებმა კუთხური ჭკვიანურად და ეფექტურად გაითამაშეს. როგორც ჩანს, ამ კომბინაციაზე წინასწარ ნამუშევარი ჰქონდათ. საბოლოოდ, ბლაშჩიკოვსკიმ, რომელმაც ბურთი მილიკისგან მიიღო, ოსტატურად გააცურა მეტოქე და ბურთი შორეულ მაღალ კუთხეში გაუშვა თავისი ცაციათი. ძალიან ლამაზი გოლი გამოვიდა.


ადამ ნავალკა (პოლონეთი): "ბლაშჩიკოვსკი ჩვენთვის ძალიან მნიშვნელოვანი ფეხბურთელია, რაც დაამტკიცა კიდეც. მისი გამოცდილება და კლასი ნაკრებს სჭირდება და მომავალ მატჩებში მისი იმედი მაქვს. შვეიცარიასთან იგი ძირითადში იქნება. ის, რომ ლევანდოვსკის ჯერ არ გაუტანია, პრობლემა არ არის, რადგან იგი ბევრს მუშაობს და ნაკრებს ეხმარება. მთავარია, სასურველ შედეგს მივაღწიოთ ხოლმე. რობერტის გოლი დროის ამბავია და ვფიქრობ, მომავალ შეხვედრაში გაიტანს".

მიხაილო ფომენკო (უკრაინა): "როდესაც ნაკრების მწვრთნელი ხარ და მისაღებ შედეგებს ვერ აღწევ, უფრო პრობლემებსა და მათ გამოსწორებაზე გეფიქრება. ჩემი მომავლის შესახებ კითხვებს ამის მერე ვუპასუხებ, ახლა კი ამის დრო არ არის. ბიჭებს ვერაფერს ვუსაყვედურებ, რადგან მათ ფეხბურთი ითამაშეს და არ გაგვიმართლა. ჩემი აზრით, ეს გამოცდილებაც ძალიან გამოგვადგება".

ეს არ გახლდათ კუბას კარიერის მატჩი, მაგრამ ფაქტია, მან ამ თამაშის ბედი გადაწყვიტა და თანაც ულამაზესი გოლით და შეცვლაზე გამოსვლის მერე პოლონეთს ის დაუმატა, რაც იქამდე აკლდა. ამიტომაც ის ამ პატარა აღიარებას იმსახურებს, ოფიციალური ვერსიით კი, მატჩის საუკეთესოდ უკრაინელთა რუსლან როტანი დასახელდა, რომელიც კონოპლიანკასი არ იყოს, ძალიან აქტიური იყო, მაგრამ...

37 წლის ნორვეგიელმა არბიტრმა სვენ ოდვარ მოენმა უელსისა და სლოვაკეთის მატჩის მერე ამ შეხვედრაში იმსაჯა. ბოლომდე უნაკლო მოენი არც მაშინ და არც ამჯერად არ ყოფილა. განსაკუთრებით კი, ეს თამაში უნდა გამოვარჩიოთ, რადგან ორჯერ უკრაინელთა სასარგებლოდ პენალტის დანიშვნა შეიძლებოდა, მაგრამ არბიტრმა ეს მომენტები გაატარა. თუმცა ასპროცენტიანი პენალტები იყოო, ამასაც ვერ ვიტყვით.

პოლონეთს მეორე ადგილი და შვეიცარიასთან ჭიდილი არსად გაექცეოდა, ეს ნავალკას გუნდს განაღდებული ჰქონდა. თუმცა იყო პირველ ადგილზე გასვლის შანსი და თეორიულად უფრო სუსტ მეტოქესთან დაპირისპირების შესაძლებლობა. პოლონელები, პარალელურად, ჩრდილოე ირლანდია-გერმანიის მატჩის ანგარიშზეც იყვნენ დამოკიდებულნი და ამის გარეშეც, მოზომილად თამაშობდნენ, ზედმეტი ენერგიის დახარჯვა არ სურდათ. ყველა ველოდით ლევანდოვსკის გოლს და მას თავიდავე შეეძლო გატანა, როდესაც მილიკის მშვენიერი პასის მერე ხელსაყრელი პოზიციიდან ააცილა. საერთოდ, ჯერჯერობით, მილიკი უფრო მწვავე და პროდუქტიულია, ვიდრე ლევანდოვსკი.

პოლონელებმა მატჩი კარგად დაიწყეს, მაგრამ მერე ცოტათი აირივნენ, თითქოსდა, არ ელოდნენ, რომ უმოტივაციო უკრაინა გამოიღვიძებდა. უკრაინამ კი გამოიღვიძა და რამდენიმე მომენტიც შექმნა. შესვენების მერე პოლონელებმა თამაში დაალაგეს, ყოველ შემთხვევაში, მეორე ნახევრის დასაწყისში მაინც უკეთ გამოიყურებოდნენ, მაგრამ უკრაინა ალაგ-ალაგ მაინც იკბინებოდა. ისე კი, უცნაური ნამდვილად არის, რომ არცთუ ცუდი შემადგენლობის პატრონ ნაკრებს უფრო უკეთ თამაში არ გამოუვიდა.

პოლონელებმა კი მეტი ყურადღებით უნდა ითამაშონ დაცვაში, მხოლოდ პაზდანის უშეცდომობა შესაძლოა ყოველთვის საკმარისი არ გამოდგეს. ხოლო შეტევაში ასევე უფრო ყურადღებით და ცივსისხლიანად უნდა მოეკიდონ თავიანთ შანსებს. ლევანდოვსკის, მილიკს… მომენტები ჰქონდათ და იგივე გოლიდან რამდენიმე წამში შეიძლებოდა ინტრიგის მოკვლა, რაც პოლონელებმა ვერ გააკეთეს და მომავალში შეიძლება ეს ძვირად დაუჯდეთ.

დრო იყო, პოლონეთს დიდ საფეხბურთო ფორუმზე რაღაც გაეკეთებინა და სულ მინიმუმ, პლეი ოფის ეტაპამდე მიეღწია. ნავალკას გუნდმა ჯგუფურ ეტაპზე საკმაოდ სოლიდური შთაბეჭდილება დატოვა და კინაღამ გერმანიასაც მოუგო. პოლონელებს მეტი შეუძლიათ და ეს მეტი აუცილებლად უნდა გამოაჩინონ მერვედფინალში, თორემ იქ უკვე ძალიან ძნელი იქნება.

მეტი შეუძლია უკრაინასაც, მაგრამ ის დამაჯერობლობა და ერთსულოვნება სადღაც გაქრა, რომლითაც გუნდმა ევრო 2016-ზე პლეი ოფში გაიკვლია გზა. უკრაინელებს სიმწვავე, გუნდურობა და მრავალფეროვნება აკლდათ. ფომენკოს, ალბათ, ბევრ შეკითხვაზე მოუწევს პასუხის გაცემა.

არკადიუშ მილიკი პოლ. 8,1
კამილ გლიკი პოლ. 7,7
რუსლან როტანი უკრ. 7,4
ლუკაშ ფაბიანსკი პოლ. 7,3
იაკუბ ბლაშჩიკოვსკი პოლ. 7,3

21 ივნისი. მარსელი. "ველოდრომი"
უკრაინა-პოლონეთი 0:1
გოლი: 0:1 ბლაშჩიკოვსკი (54. მილიკი)
უკრაინა (4-2-3-1): პიატოვი - ფედეცკი, ხაჩერიდი, კუჩერი, ბუტკო - სტეპანენკო, როტანი - იარმოლენკო, ზინჩენკო (73. კოვალენკო), კონოპლიანკა - ზოზულია (92. ტიმოშჩუკი)
პოლონეთი (4-4-1-1): ფაბიანსკი - ტიაგო, გლიკი, პაზდანი, იენჯეიჩეკი - ზილინსკი (46. ბლაშჩიკოვსკი), იოდლოვიცი, კრიხოვიაკი, კაპუსტკა (71. გროსიცკი) - მილიკი (93. სტარჟინსკი) - ლევანდოვსკი
გაფრთხილება: როტანი, კუჩერი - კაპუსტკა
კარში დარტყმა: 19-9 (5-3) კუთხური: 3-2 თამაშგარე: 2-2 ჯარიმა: 23-12 ბურთის ფლობა: 63%-37%
მაყურებელი: 38 989

ყოველდღიური სპორტული გაზეთი "ლელო"