მწვრთნელი ახალი, გადახალისებული გუნდი და განახლებული იმედი - ასე შეხვდა საქართველოს ნაკრები მორიგი ციკლის დაწყებას და მისმა ახალმა თავკაცმა სანიოლმა მოედანზე შემადგენლობა გაიყვანა, რომელიც უფრო დაცვითი იყო, ვიდრე შემტევი. „ჯვაროსანთა“ ზოგიერთ ფეხბურთელს ასეთ მაღალ დონეზე და ასეთი მეტოქის წინაშე არასოდეს უასპარეზია და თავის წარმოჩენის შესანიშნავი შესაძლებლობა მიეცათ.
ორივე გუნდმა თამაში ფრთხილად დაიწყო, ტემპი მაღალი არ იყო, მე-14 წუთზე კონტრშეტევაზე ქვილითაია ხელსაყრელ პოზიციაზე გავიდა, მაგრამ კარგად ვერ დაარტყა და ბურთს მეკარე დაეუფლა. საპასუხო იერიშისას უკვე ლორიას მოუწია კულუსევსკის დარტყმულის მოგერიება. ჩვენმა გოლკიპერმა 25-ე წუთზეც გვიხსნა, როდესაც ისაკს არ დაანება გატანა. 35-ე წუთზე კი მასპინძლებმა ანგარიში გახსნეს - იბრაჰიმოვიჩის პასი კლასონმა მიიღო, ჩაბრაძე ჩამოიცილა და პირველი ტაიმი 0:1 წავაგეთ.
შესვენების შემდეგ სანიოლმა ცოტა არ იყოს უცნაური ცვლილება განახორციელა, კვარაცხელიას ნაცვლად მოედანზე კიტეიშვილი შეუშვა. მართალია, ხვიჩა ჩვეულად ვერ აქტიურობდა, მაგრამ მოწინააღმდეგე კონტრიერიშებზე სივრცეებს ტოვებდა და თუ რამ სხვა მიზეზი არ იყო, სწრაფი გარემარბის გაყვანა მთლად მართებული არ გახლდათ.
მეორე ტაიმი პირველზე უფრო დუნედ მიმდინარეობდა, მეტოქე თამაშის გამწვავებას არ ცდილობდა, ჩვენი გუნდი კი სახიფათოდ ვერ უტევდა და „ჯვაროსანთა“ თავკაცმა საყრდენების (კანკავა და კვეკვესკირი) ნაცვლად გვილია და შენგელია შეუშვა, რაც შეტევის ხაზის გაძლიერების სურვილით იყო ნაკარნახევი. თუმცა ამით არაფერი შეიცვალა. შვედების პრაგმატული სტრატეგია თვალსაჩინო შეიქნა - იგებდნენ, ჩვენს გუნდს უნდა შეეტია და მშვიდად შანსის მოლოდინში იყვნენ.
კარგად ჩაერთო თამაშში შეცვლაზე შესული ბერიძე, რომლის სახიფათო გარღვევას შედეგი არ მოჰყვა, შემდეგ კი შენგელიას დარტყმული ნორდფელდტმა მოიგერია. მერე მიქაუტაძემ ქვილითაია შეცვალა და ეგ იყო და ეგ.
ახალი მწვრთნელის ხელმძღვანელობით ჩატარებული პირველი მატჩით ძნელია დასკვნების გამოტანა, მაგრამ დაპირებული რისკიანი თამაში რომ ვერ ვიხილეთ, ფაქტია.
სოლნა.“ფრენდს არენა“
შვედეთი - საქართველო 1:0
გოლი: კლასონი (35)
შვედეთი: ნორდფელდტი, ლუსტიგი (კრაფტი 83) , ლინდელეფი, ჰელანდერი, აუგუსტინსონი, კულუსევსკი, ლარსონი, ოლსონი (ეკდალი 68) (სვანბერგი 74) , კლასონი (ფორსბერგი 74), ისაკი, იბრაჰიმოვიჩი (ქუაისონი 83)
საქართველო: ლორია, ჩაბრაძე, კაშია, დვალი, გიორბელიძე, კანკავა (გვილია 59), კვეკვესკირი (შენგელია 59), აბურჯანია, ლობჟანიძე (ბერიძე 78), კვარაცხელია (კიტეიშვილი 46), ქვილითაია (მიქაუტაძე 84)
სანიოლი: ფრე კარგი შედეგი არ არის - ქართველები საკუთარი გუნდით იამაყებენ
![ევრო 2024. დიდი მოლოდინი - საქართველოს ნაკრებს მხარდაჭერას პატარა გულშემატკივრები უცხადებენ [VIDEO]](/pictures/image7/89c7032b8b72c09f641b7fee66fc9e44.jpg "ევრო 2024. დიდი მოლოდინი - საქართველოს ნაკრებს მხარდაჭერას პატარა გულშემატკივრები უცხადებენ [VIDEO]")
რეალობა ასეთია, მაგრამ ეს ჩვენი ფეხბურთია, მეტი არ გავქვს და აქ ფეხბურთელების არაპროფესიონალიზმი არაფერ შუაშუა (ძირითადად) - თაობა არ გვყოლია დიდი ხანია - არველაძეების და კალაძე-კობიაშვილის მერე. თითო-ოროლა ტალანტი ჩნდება ხანდახან და რატომღაც ტრავმებით მთავრდება მათი კარიერა - ყენია, ჭანტურია, მჭედლიძე, ანანიძე.
სანიოლი მომეწონა - თამამად დააყენა შემადგენლობა და თამამი შეცვლები მოახდინა - კვარაცხელია და ჯაბა მოხსნა. ჯაბა ალბათ დაიღალა, კვარაცხელია ვერაფერს აკეთებდა. შვეციამ ბევრი ვერაფერი შექმნა და უკეთესი თამაშით ქულის წამოღება შეიძლებოდა.
მაინც იმედით ვუყურებ მომავალს, არის ახალგაზრდულში რამდენიმე პერსპექტიული ბიჭი და მწვრთნელი გვყავს მგონი კარგი - გააკეთებს კარგ გუნდს.
გოლი თუ ვერ გაიტანა ერთი ერთზე ქვილითაიამ ან შენგელიამ მთლად ზუსტად ვერ დაუხვედრა ფეხი, სანიოლის რა ბრალია.
მე პირადად სასიამოვნოდ გამაოცა გიორბელიძემ, ჩაბრაძემ და ბერიძემ. დამარჩენები ნანახი გვქონდა მეტნაკლებად