ხვიჩა კვარაცხელია საქართველოს 21-წლამდელთა ნაკრების განაცხადში არ იქნება და შესაბამისად, ევროპის ჩემპიონატზე ვერ ითამაშებს. ამაზე განცხადება თავად ფეხბურთელმა გაავრცელა:
ხვიჩა კვარაცხელია ევროპის ჩემპიონატზე ვერ ითამაშებს
მოგვიანებით, იმავე შინაარსის მიმართვა გიორგი მიქაუტაძესაც ჰქონდა. ჩვენ ამ თემაზე წერილი რამდენიმე დღის წინ შემოგთავაზეთ და ახლის თქმა გაგვიჭირდება. ვხედავთ, ბევრი გულშემატკივარი გულდაწყვეტილია, თუმცა უნდა გავითვალისწინოთ "კვარას" განვლილი სეზონი, უახლოესი გეგმები, ის, რომ კლუბებს ყოველთვის უჭირთ, მოთამაშეები ახალგაზრდულ ფორუმებზე გაუშვან, რადგან ივლისიდან ისინი ახალი სეზონისთვის მზადებას იწყებენ...
კიდევ ერთხელ გთავაზობთ სტატიას, რომელიც ამ პერიოდს მიეძღვნა...
ყველას სურს, ხვიჩა კვარაცხელიამ ნაკრების რიგებშიც გაიტანოს ისეთი გოლი, როგორითაც "ატალანტას" კარი აიღო; გააკეთოს ისეთი პასი, როგორითაც ოსიმენს "რომასთან" გაატანინა, მაგრამ ჯერ უნდა შევთანხმდეთ, რომ ყველაფერი ასე მარტივად არ ხდება, ფეხბურთი გუნდური თამაშია და ამავდროულად, სხვა უამრავი კომპონენტი არსებობს, ვიდრე შედეგიანი მოქმედებაა.
წარმოვიდგინოთ, რა სეზონი განვლო ხვიჩამ, რომელიც უფრო ადრე დაიწყო, ვიდრე ზოგადად იწყება. "ნაპოლიმ" მაქსიმალურად გამოიყენა ის დრო, როცა გუნდს თამაში მისდიოდა, ბოლომდე დაიხარჯა, ქულების მაქსიმუმი მოიპოვა, საჩემპიონო დუელში კომფორტულად დაწინაურდა და ბოლო თვეებში გუნდს გადაღლილობა აშკარად დაეტყო. ნუ ვიტყვით, რომ "22 წლის ბიჭი რამ უნდა დაღალოს" (რაც გვსმენია ხოლმე). რა თქმა უნდა, არსებობს აღდგენითი პროცედურები, თუმცა დილით და სამუშაო დღის ბოლოს ერთნაირად ვერ იქნები, არათუ დატვირთული სეზონის დასაწყისში და მიწურულს. ზოგჯერ იქნებ ხვიჩასგან იმაზე მეტს ვითხოვთ, ვიდრე ადამიანურ შესაძლებლობებსაც კი აღემატება.
არ გვინდა, ის იფიქროთ, რომ "კვარას" თამაშს წინასწარ ვუწევთ ადვოკატირებას, ის მას არ სჭირდება. უგოლო სერიის "ჯვაროსნების" ფორმით დასრულებასაც ველით, თუმცა გვინდა, მოვლენებს ობიექტური შეფასება მივცეთ. ალბათ კიდევ უფრო გაიზრდება ხვიჩას მიმართ მოლოდინი, როცა ის 21-წლამდელთა ნაკრებს ევროპის ჩემპიონატზე შეუერთდება, რადგან ჩავთვლით, რომ ეს უფრო "დაბალი ლიგაა", ვიდრე კვარაცხელიას შეეფერება. აბა, წარმოვიდგინოთ - ეროვნულ გუნდში ატარებ ორ უმნიშვნელოვანეს მატჩს, შემდეგ დასვენების გარეშე გადაერთვები ტურნირზე, სადაც შენ წინააღმდეგ განსაკუთრებული მოტივირებით ითამაშებენ, თანაც საკმაოდ მაღალი დონის მეტოქეები და ამ დროს "დუბლების ვალდებულება" გქონდეს - რთული მიზანია, თუმცა "კვარადონა" რომ ბოლომდე დაიხარჯება და მიზნისთვის ყველაფერს გადადებს, ვიცით.
ბევრს იქნებ გაუკვირდა, ნორვეგიასთან (1:1) დაპირისპირების შემდეგ ხვიჩა კვარაცხელიას ერთ-ერთი ყველაზე მაღალი შეფასება რომ დავუწერეთ, რადგან მას შედეგიანი მოქმედება არ ჰქონია და იქნებ ჩათვალეს კიდეც, რომ მისი ავტორიტეტი მოქმედებდა. არადა, ხვიჩა გამორჩეული იყო. კიდევ ერთხელ შეგახსენებთ, რა დავწერეთ მაშინ:
"კვარა", წინა სანაკრებო მატჩებთან შედარებით, ძალიან გაზრდილია. ხვიჩა გუნდური მოთამაშეა, რომელიც ცდილობს, ნაკრებს დაცვით ფაზაში დაეხმაროს, თანაგუნდელები გაამხნევოს, ართმევაზე ითამაშოს. კვარაცხელია რამდენიმე მეურვის წინააღმდეგ თამაშს შეჩვეულია. ამის მიუხედავად, თავის გათავისუფლებასა და დარტყმასაც ახერხებდა და რამდენჯერმე კარგი პასიც გააკეთა. ნორვეგიელებს კონტრშეტევის სიკვდილივით ეშინოდათ, რადგან მათ კართან ახლოს ყოველთვის ხვიჩა ეგულებოდათ. ამის გამო მასიურ იერიშებზე უარს ამბობდნენ. "ნაპოლის" გარემარბს ცენტრშიც ხშირად ვხედავდით."
კვიპროსსა და შოტლანდიაში კვარაცხელიას მისია კიდევ უფრო დიდი იქნება. საქართველოს ნაკრების მთავარი მწვრთნელი ვილი სანიოლი მაქსიმალურად ცდილობს, ხვიჩას სისწრაფეები გამოიყენოს და სტუმრად ჩატარებულ მატჩებს უფრო კონტრშეტევებზე აგებს. ნეაპოლელთა ვარსკვლავის მიმართ ამხელა ყურადღების პირობებში, მისთვის სივრცეების გამოძებნა რთული იქნება. ამისთვის გუნდურად უფრო სწრაფად მოქმედება, მეტი ართმევა და ჩაჭრაა საჭირო.
"კვარას" საქართველოს ნაკრებში შთამბეჭდავი სტატისტიკა აქვს და შორს არაა ის დრო, როცა მის შედეგებთან მიღწევა ყველასთვის ძალიან რთული იქნება. ამავდროულად, ხვიჩას მოქმედებები უფრო მეტია, ვიდრე გოლი, საგოლე პასი ან მოპოვებული პენალტი. პირველ რიგში, ის გუნდზე დადებით ფსიქოლოგიურ გავლენას ახდენს, ჭეშმარიტი რწმენა და ჭეშმარიტი შეგრძნება ერთად მუშაობენ!..
"კვარაცხელიას დატვირთული სეზონი ჰქონდა... ივნისში ფორმის განსაზღვრა რთულია" - ვილი სანიოლი
სანიოლის არჩევანი - იქნება რადიკალური ცვლილებები დაცვაში? მეტი დრო გაგნიძეს და მსჯელობა ორ ფორვარდზე...
სანამ ხვიჩა და სხვები მოვლენ... - საქართველოს 21-წლამდელთა ნაკრების შემადგენლობის განხილვა - პორტუგალიით ვიწყებთ!..
ქართული ფეხბურთისთვის უმნიშვნელოვანესი თვე, რომელიც ისტორიულად უნდა ვაქციოთ - ფსიქოლოგიური ბარიერები მოხსნილია!..
!["მოდის ეს იტალიელი ფანი და მეკითხება, კვარაცხელიას მომავალი არ იციო?! ვუპასუხე, რომ..." - კვეკვესკირისა და ხვიჩას საუბარი, რა ხდება ნაკრების შიდა სამზარეულოში [VIDEO]](/pictures/image7/5ce5e319a51b676bef3f596e7391925a.jpg "\"მოდის ეს იტალიელი ფანი და მეკითხება, კვარაცხელიას მომავალი არ იციო?! ვუპასუხე, რომ...\" - კვეკვესკირისა და ხვიჩას საუბარი, რა ხდება ნაკრების შიდა სამზარეულოში [VIDEO]")
ჩემი აზრით,ხვიჩამ უკვე დადო,განსაკუთრებული შედეგი!-მან ნაკრებში და ხალხში,იმედი გააჩინა!აქ ჩაკვეტაძეზეც დაწერა ერთმა,ადგილი უნდა მოეძებნოსო ნაკრებში...ცუდი აზრით არ უთქვამს,მაგრამ არასწორად გამოუვიდა.ჩაკვეს ადგილის მოძებნა არ სჭირდება!მთავარია ფორმა,რწმენა დაიბრუნოს და სულ ცოტა,თითქმის ხვიჩას კალიბრის მეორე ფეხბურთელი გვეყოლება ნაკრებში,რომელიც თვითონ დაიბრუნებს კუთვნილ ადგილს,ნაკრებში!მამარდასთან ერთად,ეს ბიჭები,ლოკომოტივად გადაექცევიან ნაკრებს, უკვე ძალუმად ნაკრების კარზე მოკაკუნე ახალგაზრდობას,კიდევ უფრო მაღალ ზღუდეებს შეუტევენ და გადალახავენ.დღეს,ნაკრებში ერთადერთი,გურამ კაშიაა,ვისი ღირსეული შემცვლელიც,ჯერჯერობით არ ჩანს.ის ჯერ კიდევ ითამაშებს,მაგრამ უკვე გვიანდება მისი შემცვლელის ნაკრებში დაწინაურება.ის ხომ უნიკალურია თავისი ინტელექტით,ლიდერის თვისებებით და კლასთან შეხამებული გამოცდილებით.თვითონ ისიც,წლები მიდიოდა,ასეთად გახდომამდე და მისი შემცვლელი,ერთ და ორ წელიწადში,ასეთად ვერ იქცევა.არ მინახია როგრ თამაშობს გველესიანი,თუმცა მისი გამოსვლები ირანში,იმედს მაძლევს,რომ შესაძლოა მას ჰქონდეს საჭირო თვისებები,გურამ კაშიას შესახიდებლად.მას ასაკიც აქვს,გამოცდილებაც და ვფიქრობ კლასიც,ხოლო თუ ნაკრებში კარგად წარმოაჩინა თავი,ევროპაშიც შესძლებს ფეხის მოკიდებას.მის მიერ ირანში გატანილ გოლებს რომ ვუყურებ,როგორღაც ძალიან მეიმედება ამ ბიჭის და ისე ძალიან სურდა,ნაკრებში თამაში,რომ მინდორზე თავს მოიკლავს,ნაკრების გულისათვის.
შუახაზი განსაკუთრებულად უნდა გაძლიერდეს.
მაინც ვფიქრობ რომ ჩაკვეტაძეს უნდა მოეძებნოს ადგილი ნაკრებში. ყველაზე კრეატიულია