საბა კვირკველიამ რუსეთის პრემიერლიგის მიმდინარე სეზონი დიდებულად დაიწყო და 4 ტურის შემდეგ სიმბოლურ ნაკრებში ორჯერ მოხვდა. 18 ივლისს, სეზონის პირველ ტურში, მან "ლოკომოტივს" ტულის "არსენალის" კარში გატანილი მატჩის ერთადერთი გოლით მოაგებინა. - ლეგიონი: "ლოკომოტივმა" საბა კვირკველიას გოლით მოიგო! [VIDEO]
მერეც კარგად გამოიყურებოდა და ლოგიკური იყო, კლუბის გულშემატკივრებმა ივლისის საუკეთესო ფეხბურთელად რომ დაასახელეს...
...მაგრამ საქართველოს ნაკრების მცველმა ყველაზე დასამახსოვრებელი შეხვედრა 9 აგვისტოს ჩაატარა: პრემიერლიგის მეხუთე ტურში, ყაზანში, თავის ყოფილ კლუბ "რუბინთან" პრინციპულ დაპირისპირებაში, მეტოქის რამდენიმე სახიფათო მომენტი განმუხტა, 92-ე წუთზე კი,
- ლეგიონი გუშინ: საბა კვირკველიას გოლი და შურისძიება "რუბინთან" [VIDEO]
რუსმა კომენტატორმა ეს გოლი კვირკველიას შურისძიებად მონათლა, რადგან 2016 წელს "რუბინის" ესპანელი მთავარი მწვრთნელი ხავი გრასია აუხსნელი მოტივებით არ ათამაშებდა. თამაშამდე მიცემულ ინტერვიუში კვირკველიამ ყაზანელთა ყოფილ დამრიგებელს "კლოუნი" უწოდა...
ცხადია, თამაშის შემდეგ კვირკველიას გოლი და "რუბინთან" მისი დამოკიდებულება დღის თემა გახდა და ყველა რუსულმა გამოცემამ ქართველის გოლსა და მოტივებზე დაწერა.
ლოკომოტივის ტოპ-შენაძენი
championat.com-ი მიმდინარე სეზონში მოსკოველ "რკინიგზელთა" წარმატებული სტარტის ანალიზს შეეცადა და ამის ერთ-ერთ მთავარ მიზეზად ქართველი მცველის აყვანა დაასახელა.ლოკომოტივმა რუსული მასშტაბის ტოპ-მცველი შეიძინა
"კვირკველიასთვის ყაზანში თამაში განსაკუთრებული მოვლენა იყო. ერთი წლის წინ ის ხავი გრასიამ "რუბინის" სკამზე ისე დასვა, ამის მიზეზი არც აუხსნია, მის ნაცვლად კი ახალწვეულებს აყენებდა. წლეულს, დროებით, საბა ყაზანში ვარჯიშობდა, სანამ "ლოკომოტივი" მის ტრანსფერს გამოისყიდიდა. გუნდის ამჟამინდელი მთავარი მწვრთნელი ყურბან ბერდიევი ქართველში ახალ სესარ ნავასს (გუნდის ყოფილი ესპანელი მცველი) ხედავდა, მაგრამ კვირკველია "ლოკომოტივმა" გამოისყიდა - ახლა ეს ტრანსფერი ზაფხულის ერთ-ერთ საუკეთესო გარიგებად ითვლება. მაგრამ მისი წასვლის შემდეგ რუსეთის საუკეთესო მცველი, სავარაუდოდ, სწორედ კვირკველიაა.
Wyscout-ის სტატისტიკით, 2016 წლის მარტიდან, საშუალოდ, ქართველი მეტოქეთა გადაცემის ჩაჭრას თამაშის დროს 9.96-ჯერ ახერხებს. რუსეთის პრემიერლიგაში მეტოქის სვლებს ასე ვერც ერთი სხვა მცველი ვერ კითხულობს. კვირკველიას სხვა მონაცემებიც წესრიგში აქვს: მატჩის დროს მეტოქის დარტყმაზე გადაფარებას, საშუალოდ, 1.8-ჯერ ახერხებს, ხოლო შეტევების წამოწყებისას ოთხ შორეულ გადაცემას აკეთებს, რაც ასევე საუკეთესო მონაცემია. ის "ლოკომოტივის" გულშემატკივრებმა ივლისის საუკეთესო მოთამაშედ დაასახელეს. ბერდიევმა შეცდომა უკვე აღიარა და მიხვდა, რომ ზაფხულში "ლოკომოტივის" წარმატების მთავარი მიზეზი სწორედ ქართველის აყვანაა".
დრამა იგრძნობოდა
მოსკოვის "ლოკომოტივის" პრეზიდენტმა ილია გერკუსმა კლუბის ოფიციალურ ვებგვერდთან ინტერვიუში "რუბინთან" გადარჩენილი ქულა შეაფასა."თამაში სამმა მოთამაშემ გადაარჩინა და ცხადია, მათ შორის მთავარი კვირკველია იყო. ის ჩვენთან "რუბინიდან" გადმოვიდა და ყოფილ კლუბს გაუტანა. რა თქმა უნდა, დრამა იგრძნობოდა. კვირკველია რუსეთის პრემიერლიგაში ერთ-ერთი საუკეთესო ცენტრალური მცველია, მთლად საუკეთესო თუ არა", - ამბობს გერკუსი.
სპორტ-ექსპრესი: ლოკომოტივის ახალი გმირი
"რომ არა ცეცხლი, რომელიც კვირკველიას სულში ბობოქრობდა და იური სიომინის გადაწყვეტილება, ქართველი თავდასხმაში გადაეწია, მოსკოველები ქულას ვერ გადაარჩენდნენ. მან თავად მოისურვა მოსკოვში დარჩენა - ტრავმირებული ხორვატის, ვედრან ჩორლუკას არყოფნაში ეს მოსკოველებისთვის სასურველი ტრანსფერი აღმოჩნდა. ქართველმა პირველ ტურში გუნდს გამარჯვება მოუტანა, ახლა კი ყაზანში ქულა გადაარჩინა.
სხვა სოლომონს, ისრაელის ლეგენდარულ მეფეს, ბეჭედზე სიბრძნე ეწერა - "ესეც გაივლის!" ალბათ, ასე ფიქრობდა კვირკველიაც, როდესაც ერთი წლის წინ "რუბინის" სკამზე დასვეს. ახლა კი ენდომება, რომ ყაზანის სტადიონზე ბოლო წუთს მომხდარი ამბავი სამუდამოდ გაგრძელდეს".
სად იყავით ექვსი თვე?!
იმავე გამოცემის სხვა ჟურნალისტი წერს: "როდესაც საბა ყაზანში ჩავიდა, "რუბინში" ყველა ღიმილით შეეგება. ეკითხებიან, რუსეთის თასი ხომ არ ჩაიტანა, რასაც ხავი გრასიას საგაზეთო ინტერვიუში შეჰპირდა. ხასიათზე თუ იყო, შეეძლო ყაზანურ კლუბში განწყობა შეექმნა.
ახლა მოსკოვის "ლოკომოტივშიც" დაახლოებით იმავეს აკეთებს. ქართველი ფრთაშესხმულია, მას მთავარი მწვრთნელი ენდობა და ახალმა პარტნიორებმაც კარგად მიიღეს, თავად კი თამაშიდან აშკარად სიამოვნებას იღებს. ის ყოველ მოგერიებულ შეტევაზე თანაგუნდელებს ამხნევებს და ნამდვილ ყოჩად გამოიყურება...
"რუბინმა" შექმნა არაერთი მომენტი, მაგრამ გაუშვა გოლი მოთამაშისგან, რომელმაც გრასიას მხურვალე მოკითხვა ისევ გადასცა - არა მხოლოდ პრესის საშუალებით, არამედ - მოედანზეც. კვირკველია გოლს ისე აღნიშნავდა, თითქოს, ახალ გუნდთან მორიგი ტიტული მოიპოვა და ცხოვრებაში ყველაზე მნიშვნელოვანი გოლი გაიტანა. ის მოსკოველთა მეკარესთანაც კი მივარდა და გაამხნევა.
ასეთი ემოციური არ ყოფილა რიფათ ჟამალეტდინოვი, რომელიც "ლოკომოტივმა" ზაფხულში გაუშვა და რომელმაც ამ მატჩში "რუბინი" დააწინაურა. აშკარა იყო, "რუბინისა" და ყაზანის მიმართ კვირკველიას დიდი წყენა დაუგროვდა. როცა მიქს-ზონაში შესულს ყაზანელმა ჟურნალისტებმა კომენტარი სთხოვეს, ამაყმა ქართველმა გამოსცრა: "თქვენ ჩემთან ექვსი თვე არ მოდიოდით, ახლა კი"...
საჭირო კაცი
"რუსფუტბოლინფო": "მოსკოველებს ძალიან სჭირდებოდათ ადამიანი, რომელიც შეხვედრის ბედს შეცვლიდა. ალბათ, გიგანტი კვირკველია საჯარიმოში იმის იმედად ჩავიდა, რომ შური ეძია ყველა იმ ადამიანზე, რომლებიც ნახევარი წლის განმავლობაში ცდილობდნენ, პრემიერლიგის ერთ-ერთი საუკეთესო მცველი ფსიქოლოგიურად გაეტეხათ".
მატჩის შემდეგ თავად კვირკველიამ ახალი გუნდის მიზნებზე ილაპარაკა და თქვა, რომ "ლოკომოტივს" ჩემპიონობისთვის ბრძოლა შეუძლია. თუმცა, მანამდე თანაგუნდელ დმიტრი ბარინოვზე ჰკითხეს, რომელსაც მთელი თამაშის განმავლობაში კარნახობდა თუ უყვიროდა.
"ბარინოვს უხეშად მივმართავდი? არა, რას ვუყვიროდი?! მეც ისევე ვკარნახობდი, როგორც ის - მე. უბრალოდ, სტადიონზე 15 ათასამდე მაყურებელი იყო და ასეთ დროს მშვიდად ვერ ვილაპარაკებდით - ამ ხმაურში ერთმანეთის კარგად არ გვესმოდა...
რაც შეეხება მიმდინარე სეზონში გუნდის მიზნებს, ეს რუსეთის ჩემპიონობაა. ევროპის ლიგას რაც შეეხება, იქ ჯგუფიდან უნდა გავიდეთ, მერე კი მაქსიმუმზეც ვიფიქროთ", - ამბობს კვირკველია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
