"ხვიჩა გუნდს სილამაზეს სძენს, მაგრამ თუ საუბარი კარგ ფულზეა, უნდა გაყიდონ" - ამბობს „რუბინის“ ყოფილი ფეხბურთელი

რუსეთის ჩემპიონატზე მოსკოვის „დინამოსთან“ მოგებული მატჩი (2:0) ყაზანური გუნდის ყოფილმა ფეხბურთელმა რენატ კამალეტდინოვმა БИЗНЕС Online-თან მიმოიხილა და ისევ ისაუბრა გარემარბ ხვიჩა კვარაცხელიას გაყიდვის აუცილებლობაზე, რომელიც ამჟამად ტრავმირებულია.

კვარაცხელია უნდა გაიყიდოს, ვიდრე მოთხოვნაა

"რა თქმა უნდა, „რუბინი“ ხვიჩა კვარაცხელიაზე დამოკიდებულია და ეს იგრძნობა. ის ხომ მხოლოდ ყაზანური კლუბის ლიდერი კი არა, არამედ საერთოდ მრავალი კრიტერიუმით მთელ ჩემპიონატში გამოირჩევა. ხვიჩა „რუბინის“ ფეხბურთს სილამაზეს სძენს. თუმცა, მინდა აღვნიშნო, რომ დაცვაში ისევ ვერ არის ეფექტური, როგორც სასურველია. მეორე ტაიმში უკლებს და მისი სარგებლიანობის კოეფიციენტი მცირდება. დარწმუნებული ვარ, ასაკის მატებასთან ერთად ფიზიკურად მომძლავრდება და მატჩის დასასრულს მეტი ძალა დარჩება. ისიც სათქმელია, რომ მისდამი მეტოქეთა ყურადღება გაიზარდა. ახლა ზედმიწევნით ყურადღებას აქცევენ, რის გამოც თამაში უფრო უჭირს: ერთი მცველი ბურთის ართმევას ცდილობს, ხოლო მეორე მუდმივად აზღვევს. ასეთ სიტუაციაში თავის წარმოჩენა უფრო რთულია, მაგრამ ორი მეურვის მოტყუებას მაინც ახერხებს.

კვარაცხელიასთან ერთად „რუბინს“ გასულ შეხვედრებში, რა თქმა უნდა, გაცილებით გაუადვილდებოდა, მაგრამ რას იზამ. მე ვფიქრობ, ვიდრე ასეთი შესაძლებლობაა, მისი გაყიდვაა საჭირო. რა თქმა უნდა, თუ საუბარი კარგ ფულზეა. ხვიჩას გასხვისება აუცილებელია, ვინაიდან ადრე თუ გვიან ნებისმიერ შემთხვევაში წავა და სანამ მოთხოვნაა, კლუბმა ამით უნდა ისარგებლოს. მან „რუბინში“ კარგად იმუშავა და სლუცკის მადლიერი უნდა იყოს, თვისობრივად ახალ დონეზე რომ გაიყვანა. „ლოკომოტივსა“ და „რუბინში“ რომან შარონოვთან ის ასე საჭირო არ გახლდათ, სლუცკის ხელში კი დიდი ნდობა დაიმსახურა.