დასჯა და რეაბილიტაცია - მამარდაშვილსა და ჩაკვეტაძეს სასტარტოში ელოდნენ...

კვირას, 6 თებერვალს, თითქმის ერთდროულად, ქართველი გულშემატკივრებისთვის საინტერესო 2 შეხვედრა გაიმართება - გიორგი მამარდაშვილის "ვალენსია" "რეალ სოსიედადს" (17:00 სთ) უმასპინძლებს, გიორგი ჩაკვეტაძის "ჰამბურგი" კი (16:30 სთ) "დარმშტადს" ესტუმრება. სასიხარულოა, რომ ორივე ჩვენებურს სასტარტო შემადგენლობაში მოიაზრებენ.

"არიან ფეხბურთელები, რომლებიც ბოლო დროს ნაკლებად თამაშობენ, თუმცა კარგად ვარჯიშობენ. შესაძლოა, როტაციის მეშვეობით ზოგიერთს თამაშის შანსი მიეცეს, მათ შორის გიორგი მამარდაშვილსაც" - ეს "ღამურების" თავკაც ხოსე ბორდალასის სიტყვებია.

ესპანური მედია "ვალენსიას" მეკარეების საკითხს განიხილავს. Eldesmarque-ს ანალიზის მიხედვით, მამარდაშვილს ხაუმეზე კარგი სტატისტიკა აქვს - ქართველი კიპერი დარტყმების 72%-ის იგერიებს, მისი კონკურენტი კი 62,5-ს. ისინი გიორგის სასტარტოში ელოდნენ და ასეც მოხდა...

შეგახსენებთ, ესპანეთის ჩემპიონატის გასულ ტურში მამარდაშვილი განაცხადშიც ვერ ვიხილეთ. მაშინ მედიაში დაიწერა, რომ ეს ნაბიჯი გიორგის ჭარბმა წონამ განაპირობა.

"ვალენსია" 29 ქულით მე-11 ადგილზეა და თუკი ევროსაგზურის მოპოვება სურს, გამარჯვება აუცილებლად სჭირდება...

თითქმის ორწლიანი ცუდი პერიოდის შემდეგ, გიორგი ჩაკვეტაძეს მშვენიერი შანსი ეძლევა, საკუთარი შესაძლებლობები გერმანიაში დაამტკიცოს. hs24-ი წერს,
რომ მაინც რთული სათქმელია, რამდენი დრო მიეცემა ქართველ ნახევარმცველს, მაგრამ სონი კიტელის დისკვალიფიკაციის გამო, ჩაკვეტაძეს სასტარტო შემადგენლობაში მთელი კვირის განმავლობაში მოიაზრებდნენ. საბოლოოდ, "ჩაკვე" სათადარიგოთა შორისაა.

რაც მთავარია, გიორგი მონდომებულია, ამას მთავარი მწვრთნელიც ამბობს და დაველოდოთ, ლიდერთან მატჩში როგორი დებიუტი ექნება...

მოულოდნელად შეცვლილი სიტუაცია - როცა ინგლისისა და გერმანიის ამბები ქართველების გამო გაინტერესებს...

Marca თასზე მამარდაშვილის თამაშის შანსებს რეალურად აფასებს