"ის გუნდს რაღაც სხვას, განსაკუთრებულს სძენს" - ცნობილი საფეხბურთო ექსპერტები ხვიჩას თამაშს ეხმაურებიან

ჩემპიონთა ლიგის ჯგუფური ეტაპის პირველ შეხვედრაში "ნაპოლიმ" "ლივერპულს" უმასპინძლა და 4:1 გაანადგურა.

გამორჩეული შეხვედრა ჩაატარა ხვიჩა კვარაცხელიამ, ქართველმა "სქაუზერების" წინააღმდეგ შედეგიანი გადაცემა მიითვალა და რამდენიმე ეფექტური მომენტი შემოგვთავაზა.

საფეხბურთო ლეგენდები "კვარასადმი" აღფრთოვანებას ვერ მალავენ, გთავაზობთ მათ კომენტარებს:

"გარდა იმისა, რომ "ნაპოლიმ" დიდი ანგარიშით მოიგო, არ უნდა დაგვავიწყდეს გაცუდებული თერთმეტმეტრიანი, კვარაცხელიამ "ლივერპულის" მარცხენა ფლანგი უბრალოდ ჩამოშალა და მე-3 გოლი მისი დამსახურებით გავიდა" - მაიკლ ოუენი.

"აუცილებლად უნდა აღინიშნოს, რომ "პარტენოპეიმ" ამ ზაფხულს ბათუმის "დინამოდან" ხვიჩას შესაძენად მხოლოდ 10 მილიონი ევრო გადაიხადა" - ფაბრიციო რომანო.

"რა ჰქვია ამ ბიჭს? "კვარადონა". მან დღეს "ლივერპულს" საკუთარი ადგილი მიუჩინა. რა თქმა უნდა, ძალიან ტექნიკურია, მაგრამ გულშემატკივრებს მხოლოდ ამის გამო არ უყვართ, ის გუნდს რაღაც სხვას, განსაკუთრებულს სძენს" - ტიერი ანრი.

"საინტერესო ახალგაზრდა ფეხბურთელია. მისი თამაში უქმეებზე "ლაციოს" წინააღმდეგ ვნახე. შესანიშნავი იყო. მის წინააღმდეგ თამაში ისეთივე რთულია, როგორც მისი გვარის წარმოთქმა" - გარი ლინეკერი.

შეგახსენებთ, "ნაპოლი" მომდევნო შეხვედრას 10 სექტემბერს, "სპეციას" წინააღმდეგ გამართავს, მატჩი თბილისის დროით 17:00 საათზე დაიწყება.

ხვიჩას ჩინებული დებიუტი ჩემპიონთა ლიგაზე და საგოლე პასი - "ნაპოლიმ" "ლივერპული" დაჯაბნა [VIDEO]

ხვიჩას დიდებული საგოლე პასი - "ნაპოლი" "ლივერპულს" 3:0-ით ამარცხებს [VIDEO]

წინ ხვიჩა, დიდებისკენ მიმავალი გზა ახლა იწყება...