"რატომ ამჯობინა პსჟ-მა ქართველი გენიოსი ოსიმენს?" - იტალიელი ჟურნალისტები სიტუაციას განმარტავენ

იტალიური გამოცემები დღესაც წერენ, რომ ვიქტორ ოსიმენის 130 მილიონ ევროდ შეძენის სურვილი არავის გამოუჩენია, პსჟ-ის მწვრთნელმა ლუის ენრიკემ კი კლუბის ხელმძღვანელებს კვარაცხელიას ნებისმიერ ფასად ხელში ჩაგდება მოსთხოვა.

და ისმის კითხვა, რა არის ამის მიზეზი? "ნაპოლის" ჩაგდებულ სეზონშიც კი ხვიჩამ 11 გოლი გაიტანა, 6 საგოლე გადაცემა გააკეთა და 3 პენალტი მოიპოვა. წარმატებულ ასპარეზობას უკვე იმდენად მიგვაჩვია, რომ ეს შედეგიც კი დამაკმაყოფილებლად არ მიგვაჩნია. უფრო მაღალი საგოლე მოქმედებებითაც გამოიჩენდა თავს, რომ არა გუნდის უგერგილო თამაში და ოსიმენის ფაქტორი, რომელიც ბოლომდე აღარ იხარჯებოდა. გადაუჭარბებლად და ყოველგვარი მიკერძოების გარეშე შეიძლება ითქვას, რომ ქართველი სულ სხვა საფეხბურთო ინტელექტის მქონეა და მისი ფასიც შესანიშნავად იციან. წინააღმდეგ შემთხვევაში, არ შესთავაზებდნენ ნეაპოლური კლუბის პრეზიდენტ აურელიო დე ლაურენტისს 100 მილიონს, რაზეც უარს ამბობს. ლუის ენრიკემ "კვარას" თამაში ესპანეთის ნაკრების წინააღმდეგ ნახა და მოხიბლული დარჩა.

"პარი სენ ჟერმენი" ნიგერიელითაც იყო დაინტერესებული, მაგრამ როგორც იტყობინებიან, მისი შეძენის წინააღმდეგი კლუბის საფეხბურთო მრჩეველი ლუის კამპუში წავიდა. ცნობისათვის, როდესაც ვიქტორი "ლილის" ღირსებას იცავდა, ის ამ კლუბის სპორტული დირექტორი იყო. თანაც, არავის მოსწონს ფეხბურთელი, რომელსაც შეუძლია გუნდის ინტერესები უგულებელყოს.

დღეს "კვარას" შესახებ საკუთარი მოსაზრება ჟურნალისტებმა გამოთქვეს.

გიიომ-მაიარ პაჩინი (Eurosport France): "პსჟ მბაპეს შემცვლელად შემოქმედ შემტევს ეძებს და ლუის ენრიკეს ფავორიტი კვარაცხელიაა. ამის თაობაზე მან საფეხბურთო მრჩეველს, ლუის კამპუშს და პრეზიდენტ ნასერ ელ ჰელაიფის უთხრა. ფეხბურთელი პსჟ-ს უკვე შეუთანხმდა, წლიურ გასამრჯელოდ 6-7 მილიონი შესთავაზეს და ახლა კლუბებმა უნდა მოილაპარაკონ, რაც ადვილი არ იქნება. რაც შეეხება ოსიმენს, ბევრი ჭორი მოვისმინე, თუმცა, როგორც ჩანს, ამ მომენტისთვის არაფერი კონკრეტული მის გადასაბირებლად არ გაუკეთებიათ, ვინაიდან მბაპეს შესაცვლელად მისი სტილის საუკეთესო კანდიდატად ხვიჩას თვლიან".

იტალო კუჩი (კორიერე დელო სპორტის მთავარი რედაქტორი): "კვარაცხელია? არავინ უნდა იფიქროს, რომ ვინმე შეუცვლელია. თუ მასში წარმოუდგენელ თანხას შესთავაზებენ, უარის თქმა სისულელე იქნება".

ლუკა მარკეტი (Sky Sport-ს სატრანსფერო ექსპერტი): "ერთი მხრივ თუ კვარაცხელიასა და "ნაპოლის" შორის მოლაპარაკებები ინტენსიური ხასიათისაა, მეორე მხრივ პსჟ-ის ინტერესმა, შესაძლოა, დე ლაურენტისის კლუბი შეაშინოს, რამეთუ თუ პარიზული კლუბი ძლიერად ზემოქმედებას გადაწყვეტს, "ნაპოლის" მანევრირების საშუალება შეუმცირდება და თავის დაცვა მოუწევს, რადგან ანტონიო კონტე ქართველს გუნდის კონკურენტუნარიანობისთვის ძალიან მნიშვნელოვნად მიიჩნევს და მისი შენარჩუნება მოითხოვა. თუმცა, როცა 100 მილიონს სთავაზობენ, დე ლაურენტისს დაფიქრება მართებს. კონტეს "კვარას" გაყიდვა არ სურს, ჯერ მას დაელაპარაკება, შემდეგ აგენტს, საბოლოო გადაწყვეტილებას კი მოთამაშე მიიღებს".