Audi Cup. „ბაიერნი“ „ლივერპულთან“ საკუთარ მოედანზე შერცხვა [VIDEO]

ამხანაგური ტურნირის, აუდის თასის რიგით მე-5 გათამაშება სენსაციურად დაიწყო. პირველად მოხდა, რომ ტურნირის ორგანიზატორი და მასპინძელი მიუნხენის „ბაიერნი“ ფინალში ვერ გავიდა. თან, კარლო ანჩელოტის გუნდი საკუთარი გულშემატკივრის წინაშე შერცხვა.

ნახევარფინალური შეხვედრა, რომელშიც „ბაიერნი“ „ლივერპულს“ დაუპირისპირდა, სტუმარი გუნდის გამარჯვებით, ანგარიშით 3:0 დასრულდა. პირველ ტაიმში სადიო მანესა და მოჰამედ სალაჰის მიერ გატანილ გოლებს შეხვედრის მიწურულს დანიელ სტარიჯმა ერთიც დაამატა და შეხვედრის საბოლოო ანგარიში დააფიქსირა.

„ლივერპულის“ მთავარი მწვრთნელისთვის, იურგენ კლოპისთვის „ალიანც არეანზე“ 3:0 მოგება სიახლე არაა. 2014 წლის აპრილში, როდესაც ის დორტმუნდის „ბორუსიას“ წვრთნიდა, მისმა გუნდმა „ბაიერნი“ ამ ანგარიშით ბუნდესლიგის მატჩში დაამარცხა.

მე-2 ნახევარფინალი, რომელშიც ერთმანეთს მადრიდის „ატლეტიკო“ და „ნაპოლი“ დაუპირისპირდნენ, უფრო დაძაბული გამოდგა. პირველ ტაიმში, ნეაპოლელებს გოლის გატანის ძალიან კარგი შანსი ჰქონდათ, მაგრამ არკადიუშ მილიკის მიერ შესრულებული თერთმეტმეტრიანი იან ობლაკმა მოიგერია.

მე-2 ტაიმის დასაწყისში, ხოსე კალიეხონის ეფექტური გოლით, „ნაპოლი“ წინ მაინც გავიდა, მაგრამ 72-ე წუთზე, ფერნანდო ტორესმა ასევე ეფექტური დარტყმით უპასუხა, ხოლო 81-ე წუთზე, თავი ლუსიანო ვიეტომაც გამოიჩინა და ფინალში „როხიბლანკო“ გაიყვანა.

დღეს, თბილისის დროით 19 საათსა და 45 წუთზე, მე-3 ადგილისთვის „ნაპოლი“ და „ბაიერნი“ იბრძოლებენ, ხოლო 22 საათსა და 30 წუთზე, ფინალში ერთმანეთს „ატლეტიკო“ და „ლივერპული“ დაუპირისპირდებიან.