ფუტსალის ლიგა: უხვგოლიანი ტური, საფეხბურთო თრილერით

8 დეკემბერს, თბილისის ოლიმპიურმა სასახლემ საქართველოს ფუტსალის ლიგის 2017/18 წწ. გათამაშების მორიგი კალენდარული ტურის შეხვედრებს უმასპინძლა. მესამე ტური გატანილი გოლების სიმრავლით ჯერჯერობით სარეკორდოა მიმდინარე სეზონში.

სათამაშო დღე "თელასისა" და "აფხაზეთის" დაპირისპირებით დაიწყო და თუ არ ჩავთვლით პირველ ტაიმს, განსაკუთრებული მოულოდნელობების გარეშე წარიმართა და საბოლოოდ მოქმედი ჩემპიონის დამაჯერებელი გამარჯვებით, 7:2 დასრულდა.

მატჩისშემდგომი კომენტარები:
იოსებ მამაგულაშვილი, "აფხაზეთი": "ახალი შეკრებილი გუნდი ვართ და გამოცდილების პრობლემა გვაქვს, შეუთამაშებელები ვართ და ამან გამოიწვია მარცხიც. კიდევ პრობლემა იყო მომენტების გამოუყენებლობა. ჩვენ რომ ეს მომენტები გამოგვეყენებინა, თამაშის სცენარი,  შესაძლოა, შეცვლილიყო და სხვა ანგარიშით დამთავრებულიყო მატჩი".

ავთო ასათიანი, "სტუ-თელასის"  მოთამაშე-მწვრთნელი: "საკმაოდ დაძაბული ლიგაა, გუნდებმა საკმაოდ მოუმატეს. გამოკვეთილი ფავორიტი, ჩემი აზრით, არ ჰყავს ეროვნულ ჩემპიონატს. ეს, რა თქმა უნდა, მაყურებლისთვისაა კარგი, რადგან რაც უფრო დაძაბულია თამაში, მეტ სიამოვნებას იღებს მაყურებელი".

ზედმეტი გართულებების გარეშე მოიპოვა პირველი 3 ქულა ბსუ-მ. წყალტუბოელებმა "ბათუმელ სტუდენტებს" მხოლოდ პირველ ტაიმში გაუწიეს წინააღმდეგობა, როდესაც ორჯერ მოახერხეს წინ გასვლა, თუმცა მეორე ნახევარში სრული კაპიტულაცია გამოაცხადეს და 2:9 დათმეს.

მატჩისშემდგომი კომენტარი:
გოჩა მახარაძე, ბსუ: "შეხვედრის პირველი წუთები დაძაბულად მიდიოდა, ბევრი შეცდომა დავუშვით, რითაც ისარგებლა მეტოქემ და წინ გასვლა შეძლო. პირველი ნახევრის შემდეგ გავაანალიზეთ შეცდომები, დავალაგეთ თამაში და მოგებაც მოვახერხეთ".

ნამდვილი საფეხბურთო თრილერი გათამაშდა "კოლხისა" და "თბილისის" დაპირისპირებაში. შეხვედრა საკმაოდ დაძაბული გამოდგა, რაზეც მსაჯების მიერ ნაჩვენები 5 ყვითელი და 2 წითელი ბარათიც მოწმობს. საბოლოოდ, გარდამავალი უპირატესობით მიმდინარე დაპირისპირება ირანელი ლეგიონერებით გაძლიერებული "კოლხი-გულრიფშის" გამარჯვებით, 7:6 დასრულდა, რომელთა რიგებში ჰეთ-თრიკით გამოირჩა გუნდის დებიუტანტი ჰამედ ჰოსეინზადე.

მატჩისშემდგომი კომენტარი:
დავით დარჩია, "კოლხი": "დაძაბული მატჩის მოლოდინი გვქონდა და ასეც იყო. ჩვენმა შრომამ გაამართლა და სასურველ შედეგს მივაღწიეთ. ეს მოგება მნიშვნელოვანი იყო, არასასურველი შედეგით დავიწყეთ ლიგა. დიდი მადლობა მინდა გადავუხადო ჩემს გუნდს და მოწინააღმდეგეს ღირსეული თამაშისთვის".

რაც შეეხება ტურის ცენტრალურ დაპირისპირებას "აგორასა" და "ტატიშვილს" შორის, ბრძოლა მხოლოდ შეხვედრის პირველ ნახევარში შედგა. მეორე ტაიმში "მედიკოსები" გაცილებით მოტივირებულები და კონცენტრირებულები გამოვიდნენ პარკეტზე და მეტოქეს შანსი არ დაუტოვეს - 7:2 ალე ძაბირაძის შეგირდების სასარგებლოდ. გამარჯვებულებს გიორგი სილაგავამ ულიდერა, რომელიც ბრწყინვალე თამაშის გარდა, საკუთარ გუნდს ოთხი გატანილი გოლითაც დაეხმარა.

მატჩისშემდგომი კომენტარი:
გიორგი სილაგავა, მფკ "ტატიშვილი": "პირველ რიგში, მადლობა მინდა ვუთხრა გულშემატკივარს, რომელიც გვერდით გვედგა მთელი თამაშის განმავლობაში. "აგორა" ძალიან ძლიერი გუნდია, ვიცოდით, რომ მძიმე თამაში იქნებოდა. ვემზადებოდით ამ თამაშისთვის დიდი ხნის განმავლობაში. ვფიქრობ, რომ ჩვენი გამარჯვება უფრო მონდომებამ განაპირობა, რადგან მოედანზე უფრო მოტივირებულები გავედით".

08.11.2017. ფუტსალის ლიგა. III ტური
სტუ-თელასი - აფხაზეთი 7:2 (2:2)
გოლები: 02:43’სოზაშვილი (1:0), 03:10’ჭუმბურიძე (ს.კ 1:1), 05:03’ ჭუმბურიძე (2:1), 17:00’ ბ.მამაგულაშვილი (2:2), 25:46’ წვერავა (3:2), 28:29’ სოზაშვილი (4:2), 31:41’ მაისაია (5:2), 34:04’ ბოკერია (6:2), 35:16’ კურბანოვი (7:2)

წყალტუბო - ბსუ (ბთ) 2:9 (2:2)
გოლები: 01:08’ გოგსაძე (1:0), 08:47’ ნადარაია (1:1), 16:00’ ბერეჩიკიძე (2:1), 19:47’ ბროლაძე (2:2), 21:13’ გაბუნია (2:3), 22:12’ მამულაძე (2:4), 26:19’ ნინიძე (2:5), 26:52’ ბროლაძე (2:6), 29:03’ ხინიკაძე (2:7), 36:34’ ნინიძე (2:8), 38:37’ მამულაძე (2:9)
გაფრთხილება: 08:40’ გორგოძე (წყა), 34:07’ დოლიძე (ბსუ)

კოლხი-გულრიფში - თბილისი 7:6 (2:3)
გოლები: 01:58’ ალავერიქჰანი (1:0), 11:43’ ჰოსეინზადე (2:0), 11:58’ გოგოხია (2:1), 14:18’ კუხალეიშვილი (2:2), 16:12’ ძაგანია (2:3), 22:48’ გოგოხია (2:4), 26:08’ ანდღულაძე (3:4), 30:13’ ჰოსეინზადე (4:4), 33:41’ ალავერიქჰანი 6მ (5:4), 33:53’ ცხომარია 10მ (6:4), 35:08’ ჰოსეინზადე (7:4), 35:14’ კუხალეიშვილი (7:5), 35:57’ კვანტალიანი (7:6)
გაფრთხილება: 06:29’ კვანტალიანი (თბ), 09:50’ ანდღულაძე (კოლ), 23:05’ წოწკოლაური (თბ), 33:41’/34:32’ სანიკიძე
გაძევება: 06:00’ რეხვიაშვილი (კოლ), 34:32’ სანიკიძე (თბ)

აგორა - ტატიშვილი 2:7 (1:2)
გოლები: 13:22’ დანელია (აგო), 15:59’ სილაგავა (ტატ), 17:37’ სილაგავა 10მ (1:2), 20:55’ ექიზაშვილი (1:3), 22:03’ ექიზაშვილი (1:4), 29:59’ სილაგავა (1:5), 33:42’ ჩერნიშევი (1:6), 36:06’ ჩიმაკაძე (2:6), 38:20’ სილაგავა (2:7)
გაფრთხილება: 07:29’ ონიანი (ტატ), 07:59’ ლუკავა (ტატ), 14:31’ სიგუნავა (აგო), 29:34’ ბუკია (ტატ), 30:39’ დანელია (აგო)

* * *
ღონისძიების პარტნიორები და მხარდამჭერები არიან: "სოკარი", ტელეკომპანია "SILK", "ნაბეღლავი", იურიდიული ჯგუფი "McGill", "ტატიშვილის სამედიცინო და სპორტული რეაბილიტაციის ცენტრი".

მედიაპარტნიორები: რადიოები, "იმედი", JAKO FM, "კომერსანტი", "თანამგზავრი", ვებპორტალები, sportall.ge, worldsport.ge, sportstar.ge, adjarasport.com, mysports.ge, geosports.ge, tsff.ge, გაზეთი "ლელო". 

სპორტული სააგენტო SBM-ის პრესსამსახური