"როცა მეუღლე ცუდად მყავდა, მთელი მკურნალობის ხარჯები საკუთარ თავზე კვირკველიამ აიღო"

რევაზ ჩელებაძე გახარებულია - ალბათ, ვეღარ ითვლის, იმედი მერამდენე ფეხბურთელმა გაუმართლა. 2017 წლის საუკეთესო ფეხბურთელადაც მისი რჩეული, საბა კვირკველია დაასახელეს, რომელიც პატარა ბიჭი იყო, საქართველოში დიდად არ წყალობდნენ.

მაგრამ ვეტერანმა დინამოელმა ხელი მოჰკიდა და რუსეთში წაიყვანა, სადაც საბამ გასაოცარი ნახტომი გააკეთა და 2017 წელი ისეთ მაღალ დონეზე ჩაატარა, ერთი სიმღერის არ იყოს - "მოვა დრო და მოვუყვებით შვილებს".

რევაზ ჩელებაძეს ჯერ საბა კვირკველიაზე ველაპარაკეთ, შემდეგ კი საახალწლო თემასაც "შემოვუსხედით"...

- თქვენი დაკვალიანებული ფეხბურთელი მეორედ გახდა საქართველოს საუკეთესო ფეხბურთელი.
- ჯანოც ხომ იყო? საბა საუკეთესოდ მეორედ აღიარეს და უზომოდ მეამაყება, ასეთი წინსვლა რომ მოახერხა. უცხოეთში ბევრი ფეხბურთელი გამიყვანია - მჟავანაძე, ხიზანეიშვილი, ცხონებული აფხაზავა, ლომაია, ამისულაშვილი, ჯანო, მარცვალაძე, იმედაძე, მაგრამ კვირკველია მათ შორის ერთ-ერთი გამორჩეულია, თუ საუკეთესო არა.

ჩემთვის მისი აღიარება ყველაზე კარგი საახალწლო მილოცვა იყო. საბას ბედნიერ ახალ წელს ვუსურვებ და მჯერა, კიდევ უფრო წარმატებული კარიერაც ექნება. ის არა მხოლოდ კარგი ფეხბურთელი, გულიანი ადამიანიცაა და ბევრჯერ გაუკეთებია სიკეთე.

თანადგომა არ დავიწყებია - ეს ბევრს ნიშნავს. როცა მეუღლე ცუდად მყავდა, თვალის დაუხამხამებლად დამიდგა გვერდში და მთელი მკურნალობის ხარჯები საკუთარ თავზე აიღო. ამის დავიწყება შეუძლებელია. სხვათა შორის, მეამაყება, ნათელმირონობა რომ გვაკავშირებს.

- ბოლო დროს ბევრს წერენ, რომ საბას ინგლისის კლუბი იწვევენ...
- ეს მეც ვიცი, ინგლისში მისი შეძენა "ვესტ ბრომვიჩსა" და "ლესტერს" რომ სურთ. მაგრამ იმაშიც დარწმუნებული ვარ, რომ ბევრად უკეთეს კლუბებში შეუძლია თამაში - მას იმხელა პოტენციალი გააჩნია, რომ "ლივერპულში", "ჩელსიში", "მანჩესტერსა" და თუნდაც ესპანურ გრანდებში ითამაშებს.

მსგავსი მონდომებული და საქმეზე გადამკვდარი ქართველის ნახვა გაგიჭირდებათ. როდესაც ადამიანი ნიჭს შრომას ამატებს, პლუს გულიანი და პატიოსანია, შედეგიც მოდის. საბას კი დიდი პოტენციალი აქვს.

- ანუ ეს დაინტერესებები რეალურია?
- ამაზე ვერაფერს გეტყვით, რადგან მეც თქვენსავით ვიცი. მაგრამ დარწმუნებული ვარ, რომ სიმართლეა და არც მიკვირს.

ინტერვიუს სრული ვერსია იხილეთ Lelo.ge-ზე