14 აგვისტო ქართული ფეხბურთის ისტორიაში, ერთ-ერთ სამარცხვინო დღედ ჩაიწერება, არა იმიტომ, რომ "საბურთალო" ძლიერ მეტოქესთან დამარცხდა, არამედ იმიტომ, რომ სუსტ მეტოქესთან სასაცილოდ გაბითურდა.
მიხეილ მესხის სახელობის სტადიონზე მეტოქის ქომაგის მიერ მოწყობილი ზეიმი, აღელვებული ქართველი ქომაგის მიერ ფეხბურთელთა ბულინგი, ჩხუბი, ბოთლის სროლა მსაჯებისთვის, გინების კორიანტელი - ეს იყო გუშინდელი მატჩის კულმინაცია.
როდესაც პრესკონფერენციაზე მიდიხარ, ათასგვარი კითხვა გიტრიალებს თავში. აზრიც აღარა აქვს ტაქტიკური მონახაზის შეფასებას და ჭიაბრიშვილს მხოლოდ ის ვკითხე, ამ ამბის მერე როგორ შეძლებდა ვინმე ქართველი ხალხის ქართული საკლუბო ფეხბურთისკენ მობრუნებას?
და ამ ამბის მერე როგორ გინდა, რომ ვინმეს უთხრა, ეროვნულ ლიგას რატომ არ უყურებო?
გიორგი ჭიაბრიშვილის ტაქტიკა ამ შეხვედრაში არაფერი იყო სხვა, თუ არა დამწყები ბავშვებისთვის დახაზული სქემა, აი, შენ აქ დადგები და დანარჩენი შენ იცი, არ შემარცხვინოო.
კლუბი, რომელსაც შეთამაშების პრობლემა არ აქვს და მთელი შეხვედრის განმავლობაში ერთ კომბინაციასაც ვერ შემოგთავაზებს, ესეც კატასტროფაა. ვერც იმას იტყვი, მეტოქის მწვრთნელის ტაქტიკითა და კომბინაციებით მოხდა ეს ყველაფერიო - არა, რადგან მასაც შეხვედრაში თითქმის არაფერი გაუკეთებია. "საბურთალო" საკუთარ თავთან დამარცხდა.
თუმცა მარტო მწვრთნელისთვისაც ყველაფრის დაბრალება არ არის სწორი, ფეხბურთელთა მოქმედებები ყველა სახის ლოგიკას მოკლებული იყო. ადამიანებს, რომლებიც მთელ ცხოვრებას ფეხბურთს უძღვნიან, ავიწყდებოდათ საჭირო მომენტში პასის გაცემა, ავიწყდებოდათ საჯარიმოში ასვლა და ფლანგიდან ჩაწოდებებზე დახვედრა, ავიწყდებოდათ პოზიციების განაწილება, ავიწყდებოდათ მეტოქე და "არარატის" ყველა სახიფათო შეტევა "საბურთალოს" გადაცემით იწყებოდა. ბოლოს ისიც დაავიწყდათ, რომ რამდენიმე წუთი იყო დარჩენილი და შეხვედრა უნდა გადაერჩინათ, ამ დროს კი მეტოქის ფეხბურთელებთან საქმის გარჩევა დაიწყეს.
რაც უფრო ნაკლებად ითამაშებენ pubg-ის და რაც უფრო ნაკლებად მოიხმარენ სოციალურ ქსელებს და მეტ დროს ფიზიკურ ან გონებრივ ვარჯიშს დაუთმობენ, მით უფრო მეტი შანსი ექნებათ, გახდნენ უკეთესი ფეხბურთელები.
დამნაშავეა კლუბის ხელმძღვანელობა, მათ არაფერი გაუკეთებიათ იმისთვის, რომ რამდენიმე პოზიცია კვალიფიციური ფეხბურთელებით დაეკომპლექტებინათ.
გჭირდება ჩამშლელი ან შემტევი, რომელიც თავდამსხმელს პასებით მოამარაგებს; მცველი, რომელსაც ფიქრი შეუძლია და გადამწყვეტ მომენტში პენალტით არ დააჯილდოებს გუნდს. შენ კი ამ დროს უშვებ შენს წამყვან ფეხბურთელს ბელორუსის ჩემპიონატის დაბალი დონის გუნდში და იმატებ ერთ ფეხბურთელს, რომელიც შეიძლება ევროტურნირების შესარჩევის დასრულებამდე ფორმაში ვერ შევიდეს - ეს არაპროფესიონალიზმია ან დიდი წარმოდგენა საკუთარ გუნდზე.
ძალიან ცუდი ფაქტი იყო, რომ მოედანზე მხოლოდ "არარატ-არმენიას" ფანკლუბის ხმა ისმოდა. იყო თუ არა იქ "საბურთალოს" ფანკლუბი, ძნელი სათქმელია. იყო რამდენიმეკაციანი ჯგუფი, რომელთა ხმა მგონი მატჩის დასაწყისში ისმოდა, ისიც მათი ტრიბუნის სიახლოვეს.
არადა, ელემენტარულად, თავიანთი სკოლის აღზრდილი ბავშვები რომ შეეკრიბათ და დაერიგებინათ მათთვის საყვირები, დროშები, დოლები და მაისურები, მოედანზე ასეთი სიტუაცია არ იქნებოდა, თუმცა აქაც უცნაურ პრობლემებს ვაწყდებით - არც "საბურთალოს" ბავშვებს უხარიათ მთავარი გუნდის მატჩებზე სიარული, წარმოგიდგენიათ?
საქართველოს ჩემპიონის მაგალითზე, დაშლილი "ტორპედოს" მაგალითზე, ყოველ წელს უმოტივაციო "დინამოს" მაგალითზე, ხომ არ არის დრო, რომ საქართველოს ფეხბურთის ფედერაციამ ქმედითი ნაბიჯები გადადგას? სრულად გადააბაროს კლუბებს საქართველოს ჩემპიონატი, ეს აპრობირებული მეთოდია მთელ ევროპაში. ის ფინანსები კი, რომლებიც ამ კლუბებზე იხარჯება, სხვა საქმეში დააბანდოს.
ფაქტია, კლუბებში საპრიზო თანხად ან ნებისმიერი სახით თანხის მიწოდებას წლებია უკვე შედეგი არ მოაქვს. ფული, რომელიც სახელმწიფოსა და ხალხს ეკუთვნის, გაურკვეველი მენეჯმენტების ხელში უაზროდ იხარჯება და ამას შედეგი არ მოაქვს. თუ კლუბებს შედეგი არ აქვთ, მაშ რისთვის უნდა აფინანსებდეს საზოგადოება მათ? გვინდა კი ასეთი დაფინანსებული ფეხბურთი?
ამას ჯობია, ეს თანხა ფედერაციის აკადემიებში დაბანდდეს, ისეთივეში, როგორიც ლაგოდეხშია. ამ თანხით გარკვეულ პერიოდში ფედერაცია თავისი აკადემიებით მთელი საქართველოს ათვისებას შეძლებდა და ეს ყველაფერი მომავალში ჩადებული ინვესტიცია გამოვიდოდა. სხვა შემთხვევაში ვინღა მოთვლის ქართულ საკლუბო ფეხბურთში დახარჯულ მილიონებს და დასახარჯსაც...
მსაჯს ბოთლი ესროლეს და... - ინციდენტი "საბურთალოს" მატჩზე [VIDEO]
გოლი, რომელიც "საბურთალოს" არ ჩაუთვალეს - იყო თუ არა თამაშგარე? [VIDEO]
ალეკო ელისაშვილი: ფეხბურთი არის სპეკულანტების ასპარეზი, ღირსებისა არაფერი რომ არ შერჩენიათ
კონფლიქტი გულშემატკივრებსა და "საბურთალოს" წარმომადგენლებს შორის [VIDEO]
ვარდან მინასიანი: ჩვენ დავიმსახურეთ ეს მოგება
გიორგი ჭიაბრიშვილი: მე არ ვარ ღირსი ახლა საქართველოს ჩემპიონის მწვრთნელი ვიყო
კატასტროფა - "საბურთალო" "არარატ არმენიასთან" 0:2 დამარცხდა და ევროპა ლიგიდან გავარდა! [VIDEO]
ვინ მოგცათ ამდენის უფლება! თქვენნაირების გამოა ქართული ფეხბურთი ასეთ ჭაობში. სოციალურ ქსელში ყველა მაგარი კაცია თქვე ვაი ბალეიშიკებო. თუ გუნდის ხელმძღვანელობა არ მოგწონთ-გადააყენეთ, მაგრამ ფეხბურთელებს შეეშვით.
ქვეყნის ჩემპიონის სტატუსით მოთამაშე წელგამართულ საბურთალოს ბევრად მეტი მოეთხოვებოდა შემადგენლობისა და პროფესიონალიზმის კუთხით. ბევრი ფეხბურთელი აშკარად ზედმეტს "ერთობა". მაგრამ მათი თამაშის შემხედვარე ვშიშობ რომ ამ გართობაში თუდაც ჩემპიონთა ლიგის თამაშების ყურება არ შედის. უმრავლესობას მგონი საერთოდ არ აინტერესებს იმის ყურება, თუ როგორ თამაშობენ დიდი გუნდების დიდი ფეხბურთელები. როგორ კეთდება პასი, გამჭოლი გადაცემა, გამამწვავებელი ფაზა, უბურთოდ მოძრაობა, პოზიციის შერჩევა.... არა ეს აშკარად არ შედის მათი ინტერესის სფეროში.
ცალკე თემაა ფეხბურთის ფედერაციის როლი ამ ყველაფერში. ისე თუ ასე ფაქტი ის, რომ სახელწიფოსგან ფინანსდება ფეხბურთი. მაგრამ შედეგები მეტყველებს იმაზე, რომ ჩვენი ჯიბიდან გაცემული თანხები სადღაც გაურკვეველ ჯიბეში ინაცვლებს. ფედერაცია აშკარად ვერ უძღვება ეროვნული ჩემპიონატის საკითხებსა და გამოწვევებს. 2006 წლიდან 2011 წლამდე საქართველოში არსებობდა "პროფესიული ფეხბურთის ლიგა" (პფლ). რომელიც პასუხისმგებელი და ორგანიზატორი იყო ეროვნული ჩემპიონატისა. პფლ იყო საზოგადოება, სტრუქტურა თავისი მენეჯმენტით რომელიც მოიპოვებდა ფინანსებს, გააჩნდა კონცეფცია და საკმაოდ ბევრს აკეთებდა ქართული საკლუბო ფეხბურთისათვის. ამ პერიოდში ეროვნული ლიგა ბევრად ძლიერი და კონკურენტუნარიანი იყო. დინამო, ტორპედო, ოლიმპი, ლოკომოტივი, ზესტაფონი, ამერი, თბილისის თბილისი, ვიტჯორჯია, ბორჯომი, სიონი... რამდენი კარგი ლეგიონერი და ლამაზი მატჩი... 2011 წლიდან კი ფედერაციამ ეროვნული ჩემპიონატის მართვის უფლება (ვითომ დროებით) ჩამოართვა პფლ-ს. რა მივიღეთ ამით? მხოლოდ რეგრესი! ეროვნულ ჩემპიონატის გამართულად ფუნქციონირებას და გამოწვევების აღმოფხვრას ესაჭიროება უშუალოდ ამ პრობლემებზე ორიენტირებული ჯგუფი, მენეჯმენტი. აგრეთვე გაუგებარია თუ რატომ გამოატოვებინა ფედერაციამ ეროვნული ჩემპიონატის მატჩები საბურთალოს? ჩემპიონატის გაზაფხული-შემოდგომის პრინციპზე გადასვლის ძირითად მიზეზად ფედერაციამ დაასახელა ევროტურნირების პერიოდში ქართული კლუბების ფორმაში ყოფნის უპირატესობა. ანუ ის, რომ ჩვენი კლუბები ევროტურნირებს შეხვდებოდნენ ფორმაში მყოფები. რაც რათქმუნდა უპირატესობაა, მაგრამ რაში გამოვიყენეთ ეს? საბურთალო ისვენებდა, მაშინ როცა არარატი ეროვნულ ჩემპიონატში შეხვედრებს მართავდა და ამას ტონუსში ყოფნისა და შეთამაშებისათვის იყენებდა. მათ თავად აღნიშნეს ეს ფაქტი. შეთამაშების პრობლემა საბურთალოს არ ქონდა, მაგრამ წუხანდელმა მატჩმა ნათლად დაგვანახა, რომ გუნდი წესიერად ვერ კომბინირებდა, ბურთის გააზრებულ გათამაშებას ვერ ახდენდა. ტურების გამოტოვებამ მოდუნებამდე უფრო მიიყვანა საბურთალო, ვიდრე დაასვენა. არც ისეთი დაძაბული გრაფიკია ჩვენს ჩემპიონატში, რომ ფეხბურთელები ძალიან გადატვირთულები იყვნენ და ამხელა პაუზებს საჭიროებდნენ. ფედერაცია სერიოზულად უნდა დაფიქრდეს საკუთარ კომპეტენციაზე და პასუხისმგებლობა აიღოს გარკვეულ საკითხებზე...
პ.ს. საბურთალოს თამაშებზე ეროვნულ ლიგაში ყველგან კაპიკები გადაყარეთ სტადიონზე ნიშნად მათი სიხარბისა და ფულის მონობისა. ბათუმში მაგას გავაკეთებ აუცილებლად.