მოსკოვის "დინამოს" მწვრთნელი: ამ თამაშს საქართველოსა და რუსეთის დაპირისპირებად არ აღვიქვამთ

თბილისის "ლოკომოტივთან" ევროპა ლიგის საკვალიფიკაციო შეხვედრის წინ მოსკოვის "დინამოს" მთავარმა მწვრთნელმა კირილ ნოვიკოვმა მიხეილ მესხის სახელობის სტადიონის საკონფერენციო დარბაზში 17 წუთის დაგვიანებით მოსვლის შემდეგ ჟურნალისტების შეკითხვებს უპასუხა.

"მოხარული ვარ საქართველოში ყოფნით, აქაური სტუმართმოყვარეობით.

მოწინააღმდეგეზე სრული ინფორმაცია გვაქვს, ბიჭებმა ყველაფერი იციან. ჩვენთვის ცნობილია "ლოკომოტივის" ძლიერი და სუსტი მხარეების შესახებ. მათზე ახლა არ ვილაპარაკებთ. ვნახოთ, ხვალ რა იქნება.

პოლიტიკაში ცხვირს არ ვყოფთ, საქართველოში ფეხბურთის სათამაშოდ ჩამოვედით. ასე რომ, სპორტისაგან შორს მყოფი განცხადებების შესახებ ვერაფერს ვიტყვი, ამ თამაშს საქართველოსა და რუსეთის დაპირისპირებად არანაირად არ აღვიქვამთ.

ფეხბურთი კონტაქტური სპორტია, ჩვენ ვიბრძვით, თუმცა უხეშად არასდროს ვთამაშობთ. შესაძლოა, ხისტი მოქმედებები იყო, თუმცა ჩვენი ფეხბურთელები განზრახ ასე არასდროს იქცევიან.

მამაჩემს ამ პრესკონფერენციაზე შემოსვლის წინ ვესაუბრე. ბევრი რამ მითხრა, მაგალითად, როცა მოსკოვის "დინამო" საქართველოში ევროთასების შეხვედრებს ატარებდა, ადგილობრივი პუბლიკა ისე უჭერდა მხარს, როგორც თავიანთ ფეხბურთელებს. ხვალ, იმედია, არა მე, არამედ ჩემს გუნდს დაიმახსოვრებენ.

მიმაჩნია, რომ ხვალინდელ თამაშში ორივე გუნდს თანაბარი შანსი აქვს, ყველა მატჩი 0:0-დან იწყება და შესაბამისად, გუნდებს გამარჯვების მოპოვების თანაბარი შესაძლებლობა აქვთ".

ჭიაბრიშვილი: მოსკოვის "დინამოსთან" ისე უნდა ვითამაშოთ, როგორც ხვიჩამ ითამაშა

მოსკოვის "დინამოს" ფორვარდმა თბილისის "ლოკომოტივზე" ისაუბრა