მეტი ახალი მწვრთნელი ქართულ ფეხბურთში! - ქართულ-უკრაინული დაპირისპირება და 3 შანსი

თითქოს არაფერი ისე არ ჰგავს ერთმანეთს, როგორც ქართული კლუბების ევროტურნირებზე გამოსვლა - ვისი იმედიც მეტად არსებობს, ის ამას თავიდანვე გვიკლავს, ამავდროულად კი, მოულოდნელი სიხარულიც გამოგვერევა. იმედია, წელს ბევრი რამ შეიცვლება და კონფერენს ლიგის ჯგუფურ ეტაპზე ვითამაშებთ. ამის შანსი სამ გუნდს აქვს - თბილისის "დინამოს", ქუთაისის "ტორპედოსა" და გორის "დილას".



უკრაინელი ანდრეი დემჩენკოს "დილა" წინა ევროტურნირებზე ნორმალურად გამოიყურებოდა, მიზნის მისაღწევად კი რაღაც სულ აკლდებოდა. კარგია, რომ გარკვეული შედეგები ამ გამოცდილებამაც გამოიღო. დასაფასებელია ის ბრძოლისუნარიანობა, რაც შოტლანდიელი სპეციალისტის მიერ დამოძღვრილმა "ტორპედომ" გვაჩვენა. იქნებ ქართულ ფეხბურთში მეტი ახალი მწვრთნელის გამოჩენამ, მათ შორის, უცხოელების, ეფექტურობა გაზარდოს. ომარ თეთრაძის "საბურთალოც" ხომ მშვენიერ ფეხბურთს თამაშობს. კარგი და ცუდი ფორმა მწვრთნელებსაც უდგათ და არის მომენტები, როცა უბრალოდ გუნდისთვის ახლის შეთავაზება არ შეგიძლია. ვიცით, ჩვენთან არც ანტონიო კონტე იმუშავებს და არც მწვრთნელებში ვხედავთ ყველა პრობლემას, თუმცა რაღაც ახალი და განსხვავებული გვჭირდება!..



25 ივლისსა და 3 აგვისტოს 3 ქართული კლუბი ითამაშებს. თბილისის "დინამო" მალტის ჩემპიონ "ჰამრუნს" ჯერ ესტუმრება და შემდეგ უმასპინძლებს. სამწუხაროდ, არაერთი ქვეყნის საფეხბურთო ისტორია გაგვიმდიდრებია და იმედია, მათ მალტა არ დაემატება. ზედმეტი ილუზიები ისევ არ გვჭირდება, "ჰამრუნს" ანგარიშგასაწევი გუნდი ჰყავს. მათ იტალიელი მწვრთნელი ძაური ავარჯიშებთ, გუნდში კი არაერთი ლეგიონერია. მალტელთა მეკარე 40 წლის ფედერიკო მარკეტია, მთელი კარიერა სერია "ა"-ში რომ აქვს გატარებული.



ქუთაისის "ტორპედოს" შანსი აქვს, ყაზახურ კლუბებთან მკვეთრად უარყოფითი ბალანსი შეცვალოს, მით უმეტეს, "აქტობესთან", რომელსაც კარგი "ქართული" გამოცდილება გააჩნია. ბოსნიაში გიორგი არაბიძის რესურსი ვნახეთ. მას იქნებ ბოლო შანსი აქვს, იმ მოლოდინების შესაბამისად ათამაშდეს, რაც მასზე იყო გაცემული. ამხელა ნიჭის მქონე ფეხბურთელს უკეთესი კარიერა უნდა ჰქონდეს. ქუთაისელები პირველ მატჩს საკუთარ მოედანზე ჩაატარებენ და სტუმრად უკეთესი ფორით უნდა ჩავიდნენ, ვიდრე ეს ბოსნიაში გააჩნდათ.

კონფერენს ლიგის მეორე საკვალიფიკაციო ეტაპზე ქართულ-უკრაინული დაპირისპირებაც გველის. პოლტავის "ვორსკლა" პოლონეთში გვიმასპინძლებს. ვიქტორ სკრიპკინის გუნდს ბევრი არ გააქვს, მაგრამ ცოტასაც უშვებს. მთავარი გამტანი ალბანელი ტაულანტ სეფერია. მარჯვენა ფლანგზე 27 წლის ბრაზილიელს, ფელიპე როდრიგესს გამოვარჩევთ. გორელთა თავკაცი საკუთარი ქვეყნის გუნდს შეხვდება.

პროგნოზებისგან თავს შევიკავებთ, ისე კი, გადაულახავი ბარიერები ნამდვილად არ გვაქვს!..

გია გეგუჩაძე: ყველას იმედი გვქონდა, რომ შემდეგ ეტაპზე გავიდოდით

კლიაიჩის გმირობა - "ტორპედომ" თითქმის წაგებული მატჩი შემოატრიალა და მეორე ეტაპზე გავიდა [VIDEO]

ყოჩაღ - "დილამ" დაკ-ი დაამარცხა და შემდეგ ეტაპზე გავიდა! [VIDEO]