საქართველოს ქალთა ნაკრები ლიეტუვასთან მატჩებისთვის ემზადება

საქართველოს ქალთა ნაკრები ერთა ლიგის მატჩებისთვის ემზადება.

ირის ანტმანის გუნდი, ერთა ლიგის მესამე შეხვედრას 27 ოქტომბერს, სტუმრად, ლიეტუვის ნაკრების წინააღმდეგ გამართავს. 31 ოქტომბერს, ჩვენი გუნდი ლიეტუვას თბილისში უმასპინძლებს.

საქართველოს ნაკრებმა ოქტომბრის მატჩებისთვის მზადება თბილისში დაიწყო. მოახლოებული შეხვედრებისთვის ირის ანტმანმა ეროვნულ ნაკრებში 23 ფეხბურთელი გამოიძახა.

ირის ანტმანი (საქართველოს ნაკრების მთავარი მწვრთნელი): "ფეხბურთელები მზად არიან მოახლოებული მატჩებისთვის. გვყავს ახალწვეულები, რადგან საქართველოში ვარ, ვესწრები თამაშებს და ვხედავ, ვინ ასრულებს ინდივიდუალურ დავალებებს და მზად არის ნაკრებში სათამაშოდ. ეს ნათლად ჩანს მოედანზე. გამოვიძახეთ საუკეთესო მოთამაშეები, რომლებიც დაგვეხმარებიან ამ ორ ძალიან მნიშვნელოვან შეხვედრაში. ვფიქრობ, კარგად ვაჩვენეთ ჩვენი განვითარება ლუქსემბურგთან მატჩში, მაგრამ ეს არ არის საკმარისი. მინდა, რომ ამ გუნდმა გამარჯვებები მოიპოვოს, რაც ნამდვილად შეუძლიათ. ეს ბევრ ფაქტორზეა დამოკიდებული, თუმცა, რაც მთავარია, ფეხბურთელებს ამის სურვილი აქვთ. გუნდში კარგი განწყობაა, ყველა იბრძვის სასტარტო შემადგენლობაში მოსახვედრად, რაც ნიშნავს, რომ გუნდში ჯანსაღი გარემოა. ამავდროულად, ფეხბურთელებში ძალიან მეგობრული განწყობაა და აქვთ სურვილი მიაღწიონ შედეგს. ასე რომ, მათ ვენდობი და ვიცი, რომ ეს შეუძლიათ"

ნინო პასიკაშვილი (საქართველოს ნაკრების წევრი): "ლიეტუვის ნაკრებს კარგად არ ვიცნობთ, თუმცა ეტაპობრივად შევისწავლით და კარგად გავაანალიზებთ თითოეულ დეტალს. მოსაგებად მივდივართ და საშინაო შეხვედრაშიც, გვსურს, რომ გულშემატკივარი გავახაროთ სამი ქულით".

თამარ ქველიძე (საქართველოს ნაკრების წევრი): "ვემზადებით, რათა თითოეულმა ფეხბურთელმა მაქსიმალურად შეასრულოს საკუთარი დავალება და იმედი მაქვს, რომ სასურველ შედეგს მივიღებთ. თურქეთთან მატჩი შედარებით მეტი ადამიანი იყო მოსული სტადიონზე. ძალიან დადებითი მომენტი იყო, რამაც დიდი მუხტი მოგვცა. ვისურვებდით, რომ შემდეგ თამაშებზეც დავიმსახუროთ მათი გვერდში დგომა".

მეკარე: თეონა სუხაშვილი (სანედი, იონიშკისი, ლიეტუვა), სვეტალნა გაბელაია (კოლხეთი, ხობი), ეკა თაბაგარი (ლანჩხუთი)

დაცვა: მარიამ კალანდაძე (ლანჩხუთი), სოფიკო ნარსია (ლანჩხუთი), სალომე გასვიანი (კვარტალი, თბილისი), გვანცა ქადაგიშვილი (ლანჩხუთი), ნინო გუჯაბიძე (ლანჩხუთი), ნინო ჩხარტიშვილი (ლანჩხუთი), თამარ ტატუაშვილი (ტრაბზონსპორი, თურქეთი), თამარ ქველიძე (ეტლინგვაიერი, გერმანია)