ეფენბერგის რჩევა "ბაიერნს": გაუშვით ლევანდოვსკი პსჟ-ში ან "ბარსელონაში"

მიუნხენის "ბაიერნის" ლეგენდა შტეფან ეფენბერგი "რეკორდმაისტერს" მოუწოდებს, რობერტ ლევანდოვსკი, რომელიც მას კლუბის ფილოსოფიისთვის შეუფერებელ ფეხბურთელად მიაჩნია, "პარი სენ-ჟერმენში" ან "ბარსელონაში" გაუშვას.

ცოტა ხნის წინ ლევანდოვსკიმ "ბაიერნის" სატრანსფერო პოლიტიკის გამო უკმაყოფილება გამოთქვა, რაზეც ეფენბერგის პასუხმა არ დააყოვნა:

"ლევანდოვსკი კლუბის ფილოსოფიას უტევს. ული ჰიონესმა უკვე რამდენჯერმე განაცხადა, რომ "ბაიერნი" ახალწვეულებში 100-150 მილიონ ევროს არ გადაიხდის.

რამდენიმე კვირის წინ ვთქვი, რომ თუ "ბაიერნი" ასეთ თანხებს არ გადაიხდის, პსჟ-სა და "ბარსელონას" ჩამორჩება. თუმცა, ლევანდოვსკი ფეხბურთელია და სანამ ის მსგავს განცხადებას გააკეთებს, კარგად უნდა დაფიქრდეს და საკითხი კლუბის შიგნით განიხილოს.

ჩვენ სუპერვარსკვლავები უკვე გვყავს. 100-200 მილიონის ერთ ვარსკვლავში გადახდა? ამ ფასად 5-6 გერმანელ ფეხბურთელს იყიდი, რომლებმაც იციან, როგორ უნდა ითამაშონ გუნდურად.

"ბაიერნს" ვურჩევ, უახლოეს წლებში უცხოელ ვარსკვლავებზე უარი თქვას, მათ შორის, ლევანდოვსკიზეც. დაე, ის პსჟ-ში ან "ბარსელონაში" გადავიდეს. ასეთ შემთხვევაში, მას ეყოლება კლუბი, რომელიც მის სურვილებს შეასრულებს." - წერს ეფენბერგი T-Online-ზე თავის სვეტში.