მუნდიალი 2018. ფაქტები და სტატისტიკა: რეკორდსმენი იუბილარი

ევროპაში 2018 წლის მუნდიალის საკვალიფიკაციო ეტაპის მეორე წრე დაიწყო. VI ტურის მატჩებში ბევრი საინტერესო ფაქტი დაფიქსირდა, რომელთაც ქვემოთ გაეცნობით. მუნდიალი ევროპაში 31 აგვისტოდან განახლდება...

* მუნდიალის საკვალიფიკაციო ეტაპზე (ევროპაში) 162 მატჩი გაიმართა და 482 გოლი გავიდა. საშუალოდ თამაშში 3 გოლი გადის, რაც მაღალი მაჩვენებელია.

* ევროპულ ეტაპზე მატჩების 63%-ია გამართული.

* ყველაზე მეტი გოლი გაიტანა გერმანიამ - 27. შემდეგ მოდის ბელგია - 24 და პორტუგალია - 22.

* ყველაზე ცოტა გოლი გაიტანეს სან მარინომ და ლიხტენშტაინმა - თითო.

* გერმანიის ნაკრებმა მხოლოდ 1 გოლი გაუშვა; 2-2 გაუტანეს ჩრდილოეთ ირლანდიას, ინგლისს, ხორვატიასა და ბელგიას.

* 30 გოლი გაუშვა სან მარინოს ნაკრებმა, 24-24 - ლიხტენშტაინმა და გიბრალტარმა.

* ყველაზე მეტი გოლი პენალტით პოლონეთის ნაკრებმა გაიტანა - 5.

* 11-11 გოლით რობერტ ლევანდოვსკი (პოლონეთი) და კრიშტიანო რონალდო (პორტუგალია) ლიდერობენ. სტევან იოვეტიჩს (ჩერნოგორია), რომელუ ლუკაკუსა (ბელგია) და ანდრე სილვას (პორტუგალია) 6-6 გოლი აქვთ გატანილი.

* მხოლოდ გერმანია და შვეიცარია ასპარეზობენ ქულის დაუკარგავად.

* ოლივიე ჟირუს გოლი 27-ე აღმოჩნდა მისთვის საფრანგეთის ნაკრებში. იგი ქარიმ ბენზემას გაუთანაბრდა და მასთან ერთად მე-8 ადგილს იყოფს. ნაკრების ყველა დროის საუკეთესო ბომბარდირი ტიერი ანრია - 51 გოლით.

* უესლი სნეიდერი თავის დაბადების დღეზე (33 წლის გახდა) ჰოლანდიის ისტორიაში ყველაზე მეტი კეპის პატრონი გახდა - მან 131-ედ ითამაშა ეროვნულ გუნდში და გადაუსწრო გოლკიპერ ედვინ ვან დერ სარს.

* ანდორის ნაკრებს 13 წლის განმავლობაში (66 მატჩი) არ ჰქონდა ოფიციალური მატჩი მოგებული. 2004 წელს ანდორამ მაკედონია დაამარცხა - 1:0. მუნდიალის საკვალიფიკაციო მატჩებში ანდორამ მხოლოდ მეორედ მოიგო.

* სან მარინომ ზედიზედ სამ შესარჩევ მატჩში გაუშვა ექვსი და მეტი გოლი და მალტის ნაკრების ანტირეკორდი (1996 წ) გაიმეორა.

* ჰარი კეინმა ინგლისის ნაკრებში დებიუტიდან 2 წლისა და 2 თვის მერე მოირგო კაპიტნის სამკლავური.

* ჰარი კეინმა ნაკრებში 2016 წლის მაისის მერე პირველად გაიტანა, 575-წუთიანი მშრალი სერიის მერე.

* ალექს ოქსლეიდ-ჩემბერლენის მშრალი სერია ინგლისის ნაკრებში კიდევ უფრო მეტხანს გრძელდებოდა - 607 წუთი.

* ინგლისის ნაკრებს 2009 წლის მერე არ წაუგია საკვალიფიკაციო მატჩი.

* საფრანგეთის ნაკრებმა შვედეთთან მატჩში 25-ჯერ ჩააწოდა ბურთი საჯარიმოში. ეს 2013 წლის მერე ნაკრების საუკეთესო მაჩვენებელია, თუმცა საქართველოს ნაკრებთან ნაჩვენები რეკორდი - 33 ჩაწოდება, კიდევ დიდხანს იქნება ხელუხლებელი.

* უგო ლორისმა (საფრანგეთი) ნაკრებში 2013 წლის მერე პირველად დაუშვა უხეში შეცდომა, რომელსაც გოლი მოჰყვა.

* სანდრო ვაგნერმა გერმანიის ნაკრების მაისურით პირველი ჰეთ თრიკი შეასრულა.

* გერმანიის ნაკრებში ბოლოს 1985 წელს მოხდა, როცა ერთბაშად სამმა ფეხბურთელმა გაიტანა სადებიუტო გოლი ერთსა და იმავე თამაშში.

* გერმანიის ნაკრებმა უკვე გაიტანა იმაზე მეტი გოლი, ვიდრე წინა საკვალიფიკაციო ციკლში (ევროპის ჩემპიონატი).

* სან მარინოს ფეხბურთელები პირველ ტაიმში ერთხელაც ვერ შეეხნენ ბურთს მეტოქის საჯარიმოში.

* გერმანიის ნაკრებმა ზედიზედ მე-19 საშინაო მატჩში გაიტანა.

* გერმანიის ნაკრებში 11 სასტარტო ფეხბურთელი 11 კლუბს წარადგენდა, ეს კი 1960 წლის მერე ნაკრებში არ მომხდარა.

* გერმანიის ნაკრებს სან მარინოს კარში საშუალოდ 9 გოლი გააქვს, ეს მისთვის საუკეთესო შედეგია.

* იტალიის ნაკრებში დებიუტი ჰქონდა 20 წლის ლორენცო პელეგრინის. ის ამ საკვალიფიკაციო ეტაპზე იტალიის ნაკრების ყველაზე ახალგაზრდა მოთამაშეა (ვინც თუნდაც ერთი წუთი ითამაშა).

* ჯიჯი ბუფონმა იტალიის ნაკრებში 169-ედ ითამაშა. 39 წლის მეკარემ გაასწრო ეკვადორელ ივან ურტადოს (168 მატჩი ნაკრებში) და ახლა მსოფლიოს ტოპ-ხუთეულშია. მას უსწრებენ: მუჰამად ალ დაიე (საუდის არაბეთი, 172 თამაში ნაკრებში), კლაუდიო სუარესი (მექსიკა, 177), ჰუსამ ჰასანი (ეგვიპტე, 178) და აჰმედ ჰასანი (ეგვიპტე, 184).

* მაკედონიის ნაკრებმა მეშვიდედ ითამაშა ესპანეთთან და მეშვიდედ დამარცხდა. ანალოგიური შედეგი მხოლოდ ლიხტენშტაინის ნაკრებს აქვს.

* ისკო ალარკონმა (ესპანეთი) ნაკრებში თავისი პირველი საგოლე პასი მიითვალა. ისკომ ეროვნულ გუნდში მეოცედ ითამაშა.

* რაც ნაკრების წევრია, დავიდ სილვამ (ესპანეთი) პირველად გაიტანა გუნდის ზედიზედ 4 თამაშში.

* უელსის ნაკრებმა ისტორიაში პირველად დაასრულა ზედიზედ 5 მატჩი ფრედ.

* აარონ რემზის (უელსი) ბოლო 6 საერთაშორისო მატჩში 5 გოლში აქვს მონაწილეობა მიღებული (2 გოლი, 3 საგოლე პასი).

* უელსის ნაკრებმა 2018 წლის მუნდიალის საკვალიფიკაციო მატჩებში 8 გოლი გაიტანა, აქედან 5-ში გარეთ ბეილმა მიიღო მონაწილეობა (4 გოლი, 1 საგოლე პასი).

* 2014 წლიდან მოყოლებული, კრის კოულმენის უელსმა მხოლოდ 1 მატჩი დათმო (8 მოიგო და 8 ფრედ დაასრულა).

* ირლანდიის ნაკრების ბოლო 7 საშინაო მატჩიდან 5 გოლი ჯონათან უოლტერსმა გაიტანა.

* მარტინ ო'ნილს ირლანდიის ნაკრების თავკაცის პოსტზე საშინაო მატჩი ჯერ არ წაუგია (5 მოგება, 3 ფრე).

* ანდრე სილვა (პორტუგალია) ყველაზე ახალგაზრდაა მათ შორის, რომელთაც ევროპიდან 6 და მეტი გოლი აქვთ გატანილი მუნდიალის საკვალიფიკაციო ეტაპზე.

* იტალიის ნაკრებმა მუნდიალის საკვალიფიკაციო მატჩებში 5 და მეტი გოლი 1993 წლის მერე პირველად გაიტანა.

* ედერმა ბოლო ხუთ მატჩში შეძლო გოლის გატანა "ინტერისა" და იტალიის ნაკრების შემადგენლობაში.

* მუნდიალის საკვალიფიკაციო ეტაპზე (ევროპიდან) გერმანიის ნაკრებმა ყველა თამაში მოიგო, ყველაზე მეტი გოლი გაიტანა, ყველაზე ნაკლები გაუშვა. იოახიმ ლიოვის გუნდის კარში ყველაზე იშვიათად ურტყამდნენ. გერმანიის ნაკრების ფეხბურთელები ყველაზე იშვიათად ჯარიმდებოდნენ.

* აშშ-ის ნაკრებმა "აცტეკას" სტადიონზე კვლავ ვერ მოიგო - 3 ფრე, 5 წაგება.

ყოველდღიური სპორტული გაზეთი "ლელო"