პარიზული ქურდობები: სილვას - 1.5 მილიონი, ჩუპო მოტინგს - 600 000€...

გუშინ პსჟ-სა და “ნანტს” შორის შეხვედრის მიმდინარეობისას ანხელ დი მარიას სახლი გაქურდეს, მისი ოჯახი კი დაატყვევეს. ამის გარდა, პარიზული გუნდის ბრაზილიელი ლეგიონერის, მარკინიოსის მშობლების ბინაც გაძარცვეს. 

ეს პირველი შემთხვევა არ გახლდათ, როდესაც “პარი სენ ჟერმენის” ფეხბურთელის ბინა გაქურდეს.  

მაურო იკარდი - ძვირფასეულობა, საათები და ტანსაცმელი... ეს ის მცირე ჩამონათვალია, რაც არგენტინელს 30 იანვარს მოჰპარეს. თანხის ზუსტი ღირებულება უცნობია, მაგრამ სავარაუდოდ, დანაკარგი 400 000€-ს აღემატება. 

სერხიო რიკო - 22 იანვარს, იკარდის ბინის გაქურდვამდე 8 დღით ადრე, სერხიო რიკოს სახლიდან 25 000€-ს ღირებულების ძვირფასეულობა მოიპარეს. 

მარკინიოსი - გუშინდელი შემთხვევა მარკინიოსისთვის პირველი არ გახლდათ. 2020 წლის 12 იანვარს, “მონაკოსთან” მატჩის დროს ბრაზილიელის სახლის გასაქურდად 4 შეიარაღებული ადამიანი მივიდა, თუმცა, საბედნიეროდ, ობიექტის დაცვამ პოლიციის გამოძახება მოასწრო.

დანი ალვეში - 2019 წლის თებერვალში, “პარი სენ ჟერმენისა” და “მონპელიეს” მატჩის დროს ბრაზილიელი მცველის ბინიდან გაურკვეველი ღირებულების ძვირფასეულობა მოიპარეს.

ლაივინ კურზავა - 2019 წლის მარტში განაპირა მცველის ბინაში 4 შეიარაღებული ადამიანი შეიჭრა. საბედნიეროდ, მეზობლებმა დაინახეს და პოლიციას თავის დროზე გააგებინეს. საბოლოოდ, მძარცველებმა მიმდებარე ტერიტორია დატოვეს. 

ჩუპო მოტინგი - თავდამსხმელის ბინას ქურდები თავს ორჯერ დაესხნენ. პირველ შემთხვევაში 2018 წლის 28 ნოემბერს, როდესაც ფრანგული კლუბი “ლივერპულს” ეთამაშებოდა, ხოლო მეორედ - იმავე წლის 24 დეკემბერს. საბოლო ჯამში მოპარულია 600 000€-ს ღირებულების ძვირფასეულობა და ტანსაცმელი.

ტიაგო სილვა - ამ ჩამონათვალიდან ყველაზე დიდი ზიანი ბრაზილიელ მცველს მიადგა. 2018 წლის 22 დეკემბერს ქურდმა სეიფი გატეხა და დაახლოებით 1.5 მილიონი ევრო მოიპარა. 

მომზადებულია Marca-ს მიხედვით

“ნანტთან” თამაშის მიმდინარეობისას დი მარიას სახლი გაძარცვეს და ოჯახი დაატყვევეს