"ლიონმა" გუნდის ნიდერლანდელ მწვრთნელ პიტერ ბოშს ზედიზედ 5 შეხვედრის ვერ მოგება არ აპატია (აქედან 4 წააგო) და კარისკენ მიუთითა. "ოლიმპიკის" ხელმძღვანელობისთვის მოთმინების ფიალა ლიგა 1-ის მე-10 ტურში აივსო, სადაც Parc Olympique Lyonnais-ის ბინადრებმა საკუთარ მოედანზე "ტულუზთან" ფრედ, 1:1 ითამაშეს.
"ლიონმა" ახალ მწვრთნელად ლორან ბლანი დანიშნა. 56 წლის სპეციალისტი, ბოლოს "ალ-რაინს" ავარჯიშებდა, იქამდე კი "ბორდო" საფრანგეთის ნაკრები და პსჟ დაუმოძღვრავს.
