ჩემპიონთა ლიგა. 1/8 ფინალი: ველით შექსპირის პირველ სონეტს ლიგაზე

* ტურინის "იუვენტუსი" მეოთხედფინალში მეათედ გასვლას (ბოლო შვიდ სეზონში მესამედ) გასვლას ლამობს.
* "პორტუსთვის" (თუ გავიდა) ისტორიაში მე-7 მეოთხედფინალი იქნება.
* ამ სეზონში "ლესტერ სიტიმ" ყველა საშინაო მატჩი მოიგო ლიგაზე.
* "სევილია" 8 თამაშია, არ დამარცხებულა.
* წინა დაპირისპირების შემდეგ "ლესტერ სიტის" მწვრთნელი შეეცვალა.

ტურინის იუვენტუსის გულშემატკივრებმა უნდა გვაპატიონ - მათმა გუნდმა პირველივე მატჩში გააკეთა საქმე, რომელიც ახლა მხოლოდ ბოლომდეა მისაყვანი. ასე რომ, დღის ცენტრალური შეხვედრა ინგლისის ჩემპიონ "ლესტერსა" და ევროპალიგის გამარჯვებულ "სევილიას" შორისაა.

ორი დიდებული გოლკიპერის დუელის პირველი რაუნდი ჯანლუიჯი ბუფონის გუნდმა მოიგო და, თითქოს, ტურინში იკერ კასილიასის გუნდს იმედი აღარ უნდა ჰქონდეს, მაგრამ მასიმილიანო ალეგრი მიიჩნევს, რომ ყველაფერი შეიძლება მოხდეს, მით უფრო, რომ "პორტუს" ამ სეზონში უკვე მოგებული აქვს იტალიაში 3:0...

ყველას მოეხსენება, რომ "იუვენტუსი" შინ შეუვალია და მხოლოდ იგებს - გუნდმა ბოლო 13 შეხვედრა მოიგო ზედიზედ "იუვენტუს არენაზე". ამას თუ დავურთავთ იტალიის ჩემპიონის სტატისტიკას, ის ყოველთვის გადის შემდეგ ეტაპზე, როცა პირველ საგარეო მატჩში იმარჯვებს, გამოდის, რომ "პორტუს" შანსი მაინც ძალზე მიზერულია. გავიხსენოთ, როდის მოიგო "პორტუმ" იტალიაში 3:0 - ეს იყო ჯგუფური ეტაპისწინა პლეი ოფში, "პორტუმ" "ოლიმპიკოზე" შეარცხვინა "რომა". არადა, თითქოს, პორტუგალიური 1:1-ის მერე ფავორიტი "რომა" იყო.

"პორტუს" რიგებში ლაზარეთი დატოვეს ექტორ ერერამ და ხესუს კორონამ, ორივე მექსიკელს შეუძლია თამაში.

I მატჩში
ტურინულ გრანდს ამ თამაშში ყველაფერი დიდებულად აეწყო. ამას ხელი "პორტუს" ფეხბურთელებმაც შეუწყვეს - კერძოდ, ალექს ტელესმა I ტაიმში სულ რაღაც 73-წამიან შუალედში ორი ყვითელი ბარათი მიიღო და გუნდი 10 კაცის ამარა დატოვა. "იუვემ" მეტოქე მეორე ტაიმში ორწუთიან მონაკვეთში გატეხა. ჯერ შეცვლაზე შესულმა მარკო პიაცამ გაიტანა, შემდეგ - დანი ალვეშმა. ეს იყო მასიმილიანო ალეგრის გუნდის ზედიზედ მერვე გამარჯვება. იტალიურმა მედიამ ალეგრი შეაქო შეცვლების გამოცნობისთვის.

მასიმილიანო ალეგრი (იუვენტუსი): "დარწმუნებული ვარ, "პორტუ" საუკეთესო თამაშს შემოგვთავაზებს. მეტოქემ კარგად იცის, როგორ იმოქმედოს ისეთ სიტუაციაში, რომელშიც ახლაა. ბიჭებს ვაჩვენე მათი თამაში "რომას" წინააღმდეგ, რომ იცოდნენ, რას ელოდონ. აუცილებელია, თამაში ისე დავიწყოთ, თითქოს, ჩვენს დაპირისპირებაში 0:0-ია და ყველაფერი ახლა იწყება.

უმთავრესია, მეოთხედფინალში გასვლა, სხვა არაფერი არ ჩაგვეთვლება, აუცილებლად უნდა ვითამაშოთ საკუთარ ძალებში დარწმუნებულებმა და კონცენტრირებულებმა. ფეხბურთში ყველაფერი ელვის სისწრაფით იცვლება, ოქტომბერში ეგონათ, რომ "ბაიერნი" კრიზისში იყო, დღეს ის ლიგის ფავორიტია. ყველას ეგონა, რომ "ბარსელონა" უკვე გავარდნილი იყო პსჟ-სთან დაპირისპირებაში, მაგრამ... დიახ, ფეხბურთში ყველაფერი ძალიან მალე იცვლება".

ნუნუ (პორტუ): "ჩვენ გვაქვს მოქმედების გეგმა, თუმცა როგორია ეს გეგმა ამას არ ვიტყვი და არც სპეკულაციებს დავიწყებ. გუნდში შესანიშნავი, საბრძოლო განწყობაა, რომელიც ჩვენ მოედანზე უნდა გადმოვიტანოთ. ბიჭები 100%-ით მზად არიან საბრძოლველად. ეს იქნება ძალიან გრძელი და მძიმე ორთაბრძოლა. კრეატიულები და ფოკუსირებულები უნდა ვიყოთ. დიდი გუნდის წინააღმდეგ საბრძოლველად ერთობ მოტივირებულები ვართ".

გასულ უქმეებზე
ტურინელებს ძალზე დამღლელი ბრძოლა ჰქონდათ "მილანთან", რომლის შემადგენლობაში სასწაულებს სჩადიოდა ჯიჯი დონარუმა. მეჰდი ბენატიამ გახსნა ანგარიში, თუმცა "მილანმა" პირველივე ტაიმში გაათანაბრა. "იუვემ" 97-ე წუთზე (!) დანიშნული პენალტის წყალობით მოიგო, რომელიც გოლად პაულო დიბალამ აქცია.

"პორტუმ" სტუმრად 4:0 გაანადგურა "არუკა". ტიკინიო სოარეშმა დუბლი შეასრულა, თითო გოლი დანილომ და დიოგო ჟოტამ გაიტანეს. "პორტუმ" ჩემპიონატში ზედიზედ მეცხრე მატჩი მოიგო.



სევილიაში "ლესტერს" უიმედოდ არ წაუგია, მაგრამ კლაუდიო რანიერი მაინც ამ მარცხის მერე გაუშვეს. ამის შემდეგ "მელიები" მოულოდნელად, დიდებულად ათამაშდნენ და ზედიზედ ორი თამაში მოიგეს. რის გამოც, კრეიგ შექსპირი სეზონის ბოლომდე დამტკიცდა გუნდის თავკაცად, მანამდე იგი დროებითი თავკაცი იყო. ახლა "მელიებს", რომლებიც ჩემპიონთა ლიგაზე პირველად თამაშობენ, ისტორიული გამარჯვების იმედი აქვთ.

სხვათა შორის, "სევილიას" არგენტინელი თავკაცი ხორხე სამპაოლი არ მოერიდა უხერხულობას და ინგლისში ღიად გააკრიტიკა "ლესტერის" ხელმღვანელობა, "რომელმაც დაივიწყა, რომ გუნდს ჩემპიონობა რანიერიმ მოუპოვა".

I მატჩში
"სანჩეს პისხუანზე" "სევილიას" უპირატესობა პირველივე ტაიმში აისახა პაბლო სარაბიას თავით გატანილ გოლში. 62-ე წუთზე ხოაკინ კორეამ "სევილიას" უპირატესობა" ორამდე გაზარდა. არ დაგვავიწყდეს, რომ კორეას ჯერ კიდევ მატჩის დასაწყისში მართებდა გატანა, მაგრამ კასპერ შმეიხელმა მას პენალტი აუღო. 73-ე წუთზე ჯეიმი ვარდიმ "ლესტერს" შანსი დაუტოვა, თუმცა მან ამ გოლით კლაუდიო რანიერის ვეღარ უშველა, რომელიც მალევე მოხსნეს.

კრეიგ შექსპირი (ლესტერი): "კარგად ვიცით, რომ საგარეო გოლის გატანით კარგი შანსი გაგვიჩნდა. დარწმუნებული ვარ, სტადიონზე სპეციალური განწყობა იქნება. ველი, რომ გუნდი "ლივერპულისა" და "ჰალის" დამარცხებებით შეგულიანებული, "სევილიასაც" დაამარცხებს. თვითრწმენა ადგილზეა, ჩვენ მზად ვართ შემტევი ფეხბურთის სათამაშოდ.

ყველაფერი განვიხილეთ და მეტოქე ძალიან სერიოზული გვყავს, მაგრამ უიმედოდ ნამდვილად არ ვართ. შეუძლია თუ არა "ლესტერს" ჩემპიონთა ლიგის მოგება? რატომაც არა".

ხორხე სამპაოლი (სევილია): "ბოლო მატჩებში სტაბილურობა დავკარგეთ, თუმცა ხვალ თქვენ ნამდვილ "სევილიას" იხილავთ, რომელიც შეეცდება, საუკეთესოდ ითამაშოს. უნდა ვაჩვენოთ, რის ხარჯზე ვიბრძვით ლა ლიგაში "ბარსელონასა" და "რეალის" ტოლ-სწორად და ევროპულ ასპარეზზე. ჩემთვის დაბადების დღის ყველაზე კარგი საჩუქარი მეოთხედფინალში გასვლა იქნება".

გასულ უქმეებზე
"სევილიამ" შინ ვერ მოუგო დებიუტანტ "ლეგანესს" - 1:1. სტევან იოვეტიჩმა პირველი ტაიმის მიუწურულს გაათანაბრა და გუნდისთვის ქულა იხსნა.

"ლესტერ სიტის" ამ უქმეებზე არ უთამაშია. ამის მიზეზი ისაა, რომ ინგლისში ასოციაციის თასის მეოთხედფინალური მატჩები გაიმართა, "ლესტერი" კი ამ ტურნირზე აღარ თამაშობს.

სამშაბათი. 14 მარტი
იუვენტუსი-პორტუ 23:45 (2:0)
დისკვალიფიკაცია: - ტელესი
ტრავმა: სტურარო, კიელინი (?) -
სავარაუდო შემადგენლობები
იუვენტუსი (4-2-3-1): ბუფონი - ლიხტშტაინერი, ბარძალი, ბონუჩი, ალექს სანდრო - მარკიზიო, ხედირა - კუადრადო, დიბალა, მანჯუკიჩი - იგუაინი
პორტუ (4-3-3): კასილიასი - მ. პერეირა, მარკანო, ფელიპე, ლაიუნი - დანილო, ანდრე ანდრე, ო. ტორესი - ბრაიმი, ადნრე სილვა, სოარეში
მსაჯი: ოვიდიუ ჰაცეგანი (რუმინეთი)
ურთიერთშეხვედრები: +3=1-0 (7:2)

ლესტერი-სევილია 23:45 (1:2)
დისკვალიფიკაცია: არავინ
ტრავმა: მენდი, ვოგი - ტრემულინა, ვიეტო, კარისო
სავარაუდო შემადგენლობები
ლესტერი (4-4-2): შმეიხელი - სიმპსონი, მორგანი, ჰუთი, ფუხსი - მაჰრეზი, დრინკუოტერი, ნდიდი, ოლბრაიტონი - ოკაზაკი, ვარდი
სევილია (3-4-2-1): ს. რიკო - პარეხა, რამი, მერკადო - მარიანო, ნ'ზონზი, ნასრი, ესკუდერო - იბორა, იოვეტიჩი - ვიტოლო
მსაჯი: რიკარდო დი ფიორე (იტალია)
ურთიერთშეხვედრები: +0=0-1 (1:2)

ყოველდღიური სპორტული გაზეთი "ლელო"