1-ელ სექტემბერს, პოლონეთთან გასვლითი მატჩით, საქართველოს ახალგაზრდული ნაკრები, გია გეგუჩაძის ხელმძღვანელობით, ევროპის ჩემპიონატის შესარჩევ ციკლში ჩაერთვება. ფაქტია, საფეხბურთო თემში მოლოდინი დიდია. ჯერ ერთი, ნაკრებს სათავეში უდგას კვალიფიციური მწვრთნელი, მეორეც - თაობა კარგია და ის მწვრთნელმა წინა ციკლის ბოლოს უკვე ჩააბა ბრძოლებში, და მესამე - ერთი შეხედვით, წილისყრაში გაგვიმართლა, რაკი მოწინააღმდეგედ არ გვერგო გრანდი. ჩვენი მეტოქეები შესარჩევ ჯგუფში დანიის, პოლონეთის, ფინეთის, ლიტვისა და ფარერების ახალგაზრდული ნაკრებები იქნებიან.
ამას წინათ, საქართველოს ახალგაზრდულმა ნაკრებმა ისლანდიასთან ორი ამხანაგური მატჩი ჩაატარა. პირველი შეხვედრა ქართველებმა 3:1
U21. საქართველო-ისლანდია 4:4 [VIDEO]
U21. საქართველო-ისლანდია 3:1 - რომანი დუბლით [VIDEO]
"ლელო" გეგუჩაძეს დაუკავშირდა. 21-წლამდელთა თავკაცმა მომავალ ამხანაგურ მატჩთან დაკავშირებით საინტერესო სიახლე გაგვიმხილა და არაერთ საინტერესო თემასაც შეეხო...
- რამდენად სასარგებლო იყო საქართველოს ახალგაზრდული ნაკრებისთვის ორი ამხანაგური მატჩი ისლანდიასთან?
- რა თქმა უნდა, ძალიან სასარგებლო იყო ჩვენთვის ეს თამაშები. მეტოქეების მხრივ, დიდი არჩევანი არ გვაქვს. მიმაჩნია, რომ კარგ გუნდს ვეთამაშეთ. ეს შეხვედრები მნიშვნელოვანი იყო უახლოესი რეზერვის შემოწმების კუთხითაც.
ფეხბურთში ტრავმა და დისკვალიფიკაცია ჩვეულებრივი ამბავია. უნდა ვიცოდეთ, რომელ მოთამაშეს შეგვიძლია დავეყრდნოთ; ვის შეუძლია შეცვალოს ფეხბურთელი, რომელიც მიზეზთა გამო არ გვეყოლება...
მოკლედ, ძალიან სასარგებლო სპარინგები იყო.
- პრობლემები და დადებითი ტენდენციები - რა დაგანახათ ისლანდიელებთან შეხვედრებმა?
- პრობლემებით დავიწყებ. ახალგაზრდული ნაკრები პირველად შეიკრიბა ამ შემადგენლობით და, ცხადია, იყო შეთამაშების პრობლემა. მეორე პრობლემა იყო დაცვის თამაში. ორ თამაშში გავუშვით ხუთი გოლი და ეს არის საგანგაშო ტენდენცია, რომელიც აუცილებლად უნდა შევაჩეროთ. დადებითი იყო ის, რომ ორ მატჩში გავიტანეთ 7 გოლი.
რამდენიმე ფეხბურთელმა ითამაშა შედეგიანად, იმის მიუხედავად, რომ კლუბში არ აქვს სათამაშო პრაქტიკა. აქ, უპირველეს ყოვლისა, რომან ჭანტურიას ვგულისხმობ. მას კიდევ შეუძლია მომატება, არ არის ახლა იდეალურ ფორმაში...
ჩვენ ვნახეთ საინტერესო ფორვარდები - იმნაძე და მიქელთაძე. რა თქმა უნდა, მათ ჯერ კიდევ ბევრი უნდა იმუშაონ.
დადებითი იყო თუნდაც ის, რომ მეორე შეხვედრაში გუნდმა ხასიათის დიდი სიმტკიცე გამოავლინა.
- რას გეგმავთ შესარჩევი ციკლის დაწყებამდე?
- ივნისში არსებულ სანაკრებო პაუზას მაქსიმალურად გამოვიყენებთ. სიახლეა ის, რომ 8 ივნისს, სტუმრად, ბულგარეთის ახალგაზრდულ ნაკრებს ვეთამაშებით. გარდა ამისა, უკვე იცით, რომ 12 ივნისს სტუმრად დავუპირისპირდებით ჩერნოგორიას.
- ხომ არ არიან უცხოეთში მყოფი ქართული ფესვების მქონე ფეხბურთელები, რომლებიც შეიძლება ვიხილოთ საქართველოს ახალგაზრდულ ნაკრებში?
- არიან და ვმუშაობთ კიდეც ამ საკითხზე, თუმცა ვერ ვიტყვი, რომ ამ ეტაპზე აქ რაიმე სერიოზული ძვრები გვაქვს.
- ცალკე მინდა გკითხოთ გიორგი წიტაიშვილზე, ვისაც უკრაინელები თავიანთი ფეხბურთის იმედად მიიჩნევენ. მან თავის დროზე გვითხრა, რომ დაფიქრდება, თუკი საქართველოს ეროვნულ გუნდში დაუძახებენ. გასაგებია, რომ რთულია, მაგრამ აგრძელებთ მუშაობას ამ მიმართულებით?
- ნაწილობრივ, თქვენ უკვე გაეცით ამ კითხვას პასუხი. ჩვენი ძალისხმევა იქითკენაა მიმართული, რომ თავი მოვუყაროთ ყველა უძლიერეს ქართველ ფეხბურთელს.
- ჩვენ ნაკლებად ვიცნობდით ლიტვაში მოთამაშე ლევან მაჭარაშვილს, ვისაც თქვენ ახალგაზრდულ ნაკრებში უხმეთ და შანსიც მიეცით...
- მას ნამდვილად არ დაუტოვებია ცუდი შთაბეჭდილება. ჩვენ გავაგრძელებთ მასთან მუშაობას. უბრალოდ, მაჭარაშვილს აქვს პრობლემა, რომელიც აწუხებს კიდევ რამდენიმე ფეხბურთელს - ბოლომდე უნდა დაიმკვიდროს ადგილი თავისი გუნდის ძირითად შემადგენლობაში. ეს ძალიან მნიშვნელოვანი მომენტია.
ჩემი აზრით, ეს პრობლემა რომ არ იდგეს, თუნდაც საქართველოს ეროვნული ნაკრების დონეზე სხვა შედეგი გვექნებოდა. ჩვენ ეს ნათლად დავინახეთ სერბეთთან შეხვედრაში.
- ახალგაზრდულ ნაკრებებში თაობები ხშირად იცვლება. ეს მომავალ მეტოქეებზე დაკვირვებისას პრობლემას ხომ არ გიქმნით?
- დღეს არსებობს ბევრი საშუალება იმისთვის, რომ მოწინააღმდეგეს დააკვირდე. ჩვენს ჯგუფში, თუ არ ჩავთვლით ივნისის მატჩებს, მეტოქეების და ჩვენი თამაშები ერთმანეთს ემთხვევა. რა თქმა უნდა, ვმუშაობთ ამ მიმართულებით. რაც შეეხება ჩვენს ჯგუფს, ეს რთული ჯგუფია, გრანდი და გამოკვეთილი ფავორიტი არ არის, მაგრამ არიან თანაბარი ძალის გუნდები, რომელთაც დღეს გრანდებიც ანგარიშს უწევენ.
- საქართველოს ახალგაზრდული ნაკრების ბირთვს ეროვნულ ჩემპიონატში მოთამაშე ფეხბურთელები წარმოადგენენ. 10-გუნდიან პირველობას ჩვენი განსაკუთრებული მოლოდინი უკავშირდება. თქვენ სისტემატურად ესწრებით ჩვენი ჩემპიონატის მატჩებს. როგორ ფიქრობთ, საით მივდივართ?
- კმაყოფილი ვარ იმ ძვრებით, რომელიც საქართველოს ჩემპიონატში მოხდა, იმ ნაბიჯებით, რომელიც იდგმება... ჩვენ ვიცით, რომ შედეგი უცბად არ მოდის. ყველაფერს სჭირდება გარკვეული დრო, მაგრამ მჯერა, რომ საქართველოს ჩემპიონატის უმაღლეს ლიგაში თავს მოიყრიან ძლიერი ფეხბურთელები და ეს ლიგა იქნება ელიტური.
- მნიშვნელოვანი იყო ის, რომ თქვენ ახალგაზრდულ ნაკრებში პირველ ლიგაში მოთამაშე ფეხბურთელებსაც გაუღეთ კარი. თუ იგრძნობა ზღვარი მათსა და უმაღლესი ლიგის მოთამაშეებს შორის?
- ეს ტენდენცია მომავალშიც გაგრძელდება. ლიგების დაყოფა ახლახან მოხდა და მე ვერ ვიტყვი, რომ არის ზღვარი. რაც შეეხება პირველი ლიგის თემას, ჩვენ უნდა ვიაროთ და დავაკვირდეთ არა მხოლოდ პირველი ლიგის, არამედ უფრო დაბალი ლიგის თამაშებსაც. არ გვაქვს იმის ფუფუნება, რომ რომელიმე ტალანტი, რომელიმე ფეხბურთელი გამოგვეპაროს...
- საქართველოს ნაკრებისგან ამ შესარჩევ ჯგუფში ყველა კარგ შედეგს ელის. აქ რამდენიმე ფაქტორი იყრის ერთად თავს - სამწვრთნელო შტაბის, კარგი და უკვე ბრძოლებში გამოცდილი თაობის, ასევე, შესარჩევი ჯგუფის...
- ჩვენ არ უნდა გვქონდეს იმის იმედი, რომ ამ ჯგუფში იოლად გამოგვივა რამე. ეს არის ძლიერი და თანაბარი ჯგუფი. მართალია, ჩვენ ჯერ კიდევ წინა შესარჩევ ციკლში მივეცით ამ ფეხბურთელებს თავის გამოჩენის შანსი, მაგრამ ჩვენს მეტოქეებსაც ჰყავთ ისეთი ფეხბურთელები, რომელთაც უკვე მიიღეს გამოცდილება და ამ შესარჩევ ციკლშიც შეუძლიათ თამაში. მაგალითად, პოლონეთს ხუთი ასეთი მოთამაშე ჰყავს, დანიას კი - ოთხი. თან ახალგაზრდულ დონეზე შედეგები არაპროგნოზირებადია და სასწაულებიც კი ხდება. მაგალითად, ვინ ელოდა, რომ საფრანგეთის 19-წლამდელთა ნაკრები ევროპის ჩემპიონატზე ვერ მოხვდებოდა?
ჩვენი მიზანია, მთელი შესარჩევი ციკლის განმავლობაში ვიყოთ მაქსიმალურად კონცენტრირებულები და ბოლომდე გამოვიყენოთ ჩვენი შანსები.
- დაბოლოს, აზრი უნდა გკითხოთ საქართველოს ნაკრების ორ უკანასკნელ მატჩზეც...
- ჩემი შეფასება დადებითია. ყველამ დავინახეთ, რომ თამაში არის, მაგრამ არ არის შედეგი. თუნდაც სერბეთთან მატჩში, შეიძლებოდა, სხვა შედეგი დამდგარიყო, რომ არა ორი მთავარი პრობლემა - სათამაშო პრაქტიკის ნაკლებობა და კონცენტრაციის დაკარგვა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
