13 აგვისტოს საქართველოს ახალგაზრდული ნაკრები ფეხბურთის ფედერაციის ტექნიკურ ცენტრ "ბასაზე" შეიკრიბება, რათა 15 აგვისტოს ევროპის ჩემპიონატის შესარჩევის ბოლოსწინა შეხვედრაში ხორვატიას უმასპინძლოს. ამ გუნდს "დინამო თბილისის" და საქართველოს ეროვნული ნაკრების ყოფილი მწვრთნელი ივო შუშაკი ხელმძღვანელობს.
შუშაკის სტუმრობა თბილისში ყოველთვის სასიამოვნო იყო საფეხბურთო წრეებისთვის, რადგან ამ ხორვატმა იცის ადამიანებთან ურთიერთობის ყადრი. ჩვენთან მწვრთნელ შუშაკზე კამათობდნენ, მაგრამ როგორც პიროვნებაზე, საკამათო არაფერი იყო - შუშაკს ყველასთან შეეძლო ნორმალური ურთიერთობის დამყარება.
შუშაკი "დინამოში" 2002 წლის იანვარში მივიდა, როცა კლუბის მფლობელი ბადრი პატარკაციშვილი გახლდათ. "დინამო" მაშინ
2002 წელს შუშაკის "დინამომ" საქართველოს ჩემპიონობა ვერ მოიპოვა, ქუთაისის "ტორპედოს" ვერ აჯობა, მომდევნო სეზონში კი საწადელს მიაღწია.
იმ "დინამოს" უშუალო კონკურენტებთან უჭირდა თამაში, სხვა გუნდებთან კი ადვილად ინაგრებდა სამ-სამ ქულას. წარმატებულ სეზონშიც კი შუშაკის გუნდმა მიჯრით ორჯერ წააგო ქუთაისის "ტორპედოსთან". დინამოელებმა მაშინ ზურაბ იონანიძეს ვერაფერი მოუხერხეს, აქაც და იქაც "იონას" გოლებით წააგეს.
რა შანსი ჰქონდა ევროსარბიელზე ისეთ "დინამოს", რომელიც იონანიძის "ტორპედოს" დაეჩაგვრინა? ამაზე მაშინ, ალბათ, ნაკლებად ფიქრობდნენ, "დინამოში" ყველა კმაყოფილი იყო, შუშაკსაც უკვე მოპოვებული ჰქონდა დიდი მხარდაჭერა პატარკაციშვილისგან. შუშაკის "დინამომ" ხომ მოსკოვში "თანამეგობრობის თასიც" მოიგო.
ვიტალი დარასელია, გიორგი ანჩაბაძე, რატი ალექსიძე, ლადო ახალაია, დავით კვირკველია... შუშაკის ხელში ამ ფეხბურთელებმა წინ წაიწიეს. "დინამო" ყველა რგოლში კარგად დაბალანსებული, შეკრული გუნდი იყო, თუმცა ეს იყო და ეს, შემოქმედებითი ელემენტები იმდროინდელ "დინამოს" არ ეტყობოდა.
შუშაკმა თავისი მწვრთნელობითა და ქცევით ავტორიტეტი მოიპოვა. ამასობაში საქართველოს ეროვნული ნაკრები უმწვრთნელოდ დარჩა. არადა, კარს იყო მომდგარი რუსეთთან მატჩი. საქართველოს ფეხბურთის ფედერაციის მაშინდელმა პრეზიდენტმა მერაბ ჟორდანიამ შუშაკს სთხოვა, დროებით გაეწვრთნა ჩვენი ეროვნული გუნდი. შუშაკმაც გამოწვევა მიიღო და ერთხელაც დაარწმუნა ყველა იმაში, რომ მას გონება კარგად უჭრიდა.
ახლაც თვალწინ მიდგას ის მომენტი, როცა რუსეთთან მატჩის დაწყებამდე შუშაკი ზვიადი თვითრწმენით გამოვიდა არენაზე, გასახდელიდან გადმოჭრა მოედანი - საქართველო ამ თამაშს უეჭველი მოიგებს! ასეთნაირად ჩაგვინერგა ყველას რწმენა შუშაკმა.
მალხაზ ასათიანის თავური გოლით საქართველომ ის თამაში მოიგო. პრესკონფერენციაზე შუშაკს რუსმა ჟურნალისტმა ჰკითხა, იური სიომინი ასათიანს დაცვაში ათამაშებს და თქვენ რატომ გაამწესეთ ის პლეიმეიკერადო. შუშაკმა უპასუხა: მე სხვაზე კარგად ვიცი ასათიანის შესაძლებლობებიო. ის დღე საქართველოსი და შუშაკის იყო.
შუშაკის გაწვრთნილმა საქართველომ მომდევნო შეხვედრაში სტუმრად ირლანდიასთან 0:2 წააგო. ცხადია, ის მარცხი შუშაკის ავტორიტეტს ვერ შეარყევდა, მაგრამ როცა ევროსარბიელზე "დინამო" "ტირანასთან" დამარცხდა, ხორვატ მწვრთნელს წყალი შეუდგა.
"ტირანას" შემდეგ შუშაკმა სეზონი ვერ ჩაამთავრა "დინამოში", 2004 წლის გაზაფხულზე ის წავიდა.
მას არავისთან მოსვლია კონფლიქტი, ბოლომდე შეინარჩუნა ინტილეგენტი ადამიანის რეპუტაცია.
ის ყოველთვის გვამხნევებდა ქართველებს, სლოვენიის ნაკრების მაგალითი მოჰყავდა, დიდი ოსტატები არ ჰყავთ, მაგრამ ევროპის ჩემპიონატის ფინალურ ეტაპზეც ითამაშეს და მუნდიალზეცო.
შუშაკი მსუბუქ ფილოსოფიურ წიგნებს კითხულობდა, "მარლბორო-ლაითს" ეწეოდა, დღისით საჭმელს არ მიირთმევდა, ალკოჰოლიდან კი ოდენ თეთრ ღვინოს ეამხანაგებოდა.
შუშაკი "დინამოდან" ისე წავიდა, რომ საქართველოს მეგობრად დარჩა.
მას შემდეგ ხორვატი არაერთხელ ჩამოვიდა საქართველოში, ახლა კი თავის გუნდს ჩამოჰყვება. ამ შესარჩევში შუშაკის ხორვატიამ ოთარ გაბელიას გაწვრთნილ ქართველ 21-წლამდელებთან შინ 0:1 წააგო და თქმა რად უნდა, რომ რევანშისთვის იბრძოლებს.
შუშაკმა საქართველოსთან მატჩისთვის ეს ფეხბურთელები დაიგულა:
ლორენს კლანიჩი ("ჰაიდუკი"), სიმ ვრსალკო (ზაგრების "დინამო"), მარიო ტიჩინოვიჩი ("ზაგრები"), ჩარლზ ბრუჩიჩი ("ზაგრები"), რენატო კელიჩი("ლიბერეცი"), დენის ვინესი ("ზაგრები"), ფრანკო ანდრიაჩევიჩი ("ჰაიდუკი"), მარსელო ბროზოვიჩი ("ზაგრები"), ანდრეი კრამარიჩი ("ზაგრები"), დეიან გლავიცა ("ბოჰემიანსი"), ანტონი რებიჩი ("სპლიტი"), დუი კოპი (ზაგრების "დინამო"), არინ ედემი (ზაგრების "დინამო"), მიო ჩაკტაში ("ჰაიდუკი"), ანტე ბუდიმარი ("ჰართსი"), ანტონ მაგლიცა ("ჰაიდუკი"), დარიო ზუპარიჩი ("პორტუ"), დავიდ ნქსონი ("ზაგრები"), ფილიპ მრჟლიაკი ("ზაგრები"), ანტონინ ჩულინა ("პაოკი").
შუშაკი ხორვატიის ახალგაზრდულ ნაკრებს მანამდე 1997-2000 წლებში თავკაცობდა, ეს გუნდი კი შარშან ჩაიბარა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
ხორვატებთან მატჩისთვის ახალგაზრდული ნაკრების სია ცნობილია
ჩივაძე VS შუშაკი - ყველა შეტევა და ინიციატივა მომზადებული უნდა იყოს!
